চূড়সঙ্গামং

অনুৱিজ্জকস্স পটিপত্তিৱণ্ণনা

৩৬৫. তত্ৰ হীতি তস্মিং সন্নিপাতে. অত্তপচ্চত্থিকাতি লজ্জিপেসলস্স চোদকপাপগৰহীপুগ্গলস্স অনত্থকামা ৱেৰীপুগ্গলা. সাসনপচ্চত্থিকাতি অত্তনো অনাচাৰানুগুণং বুদ্ধৱচনং পকাসেন্তো তণ্হাগতিকা, দিট্ঠিগতিকা চ. অজ্ঝোগাহেত্ৱাতি অলজ্জিঅভিভৱনৱসেন সঙ্ঘমজ্ঝং পৱিসিত্ৱা. সো সঙ্গামাৱচৰোতি সো চোদকো সঙ্গামাৱচৰো নাম. দিট্ঠসুতমুতম্পি ৰাজকথাদিকন্তি দিট্ঠসুতৱসেনেৱ ৰাজচোৰাদিকথং, মুতৱসেনপি অন্নাদিকথঞ্চ অকথেন্তেনাতি যোজেতব্বং. কপ্পিযাকপ্পিযনিস্সিতা ৱাতিআদীসু ৰূপাৰূপপটিচ্ছেদপদেন সকলঅভিধম্মত্থপিটকত্তং দস্সেতি. সমথাচাৰাদীহি পটিসংযুত্তন্তি সকলসুত্তন্তপিটকত্তং. তত্থ সমথাচাৰো নাম সমথভাৱনাক্কমো. তথা ৱিপস্সনাচাৰো. ঠাননিসজ্জৱত্তাদিনিস্সিতাতি সঙ্ঘমজ্ঝাদীসু গৰুচিত্তীকাৰং পচ্চুপট্ঠপেত্ৱা ঠানাদিক্কমনিস্সিতা চেৱ চুদ্দসমহাৱত্তাদিৱত্তনিস্সিতা চ, আদি-সদ্দেন অপ্পিচ্ছতাদিনিস্সিতা চাতি অত্থো. পঞ্হে উপ্পন্নেতি কেনচি উপ্পন্নে পঞ্হে পুচ্ছিতে. ইদঞ্চ উপলক্খণমত্তং, যং কিঞ্চি উপট্ঠিতং ধম্মং ভাসস্সূতি অধিপ্পাযো.

কুলপদেসো নাম খত্তিযাদিজাতিযম্পি কাসিকৰাজকুলাদিকুলৱিসেসো. এতমেৱাহ ‘‘কুলপদেসো খত্তিযকুলাদিৱসেনেৱ ৱেদিতব্বো’’তি. সন্নিপাতমণ্ডলেতি অত্তনো অনুৱিজ্জমানপ্পকাৰং সঙ্ঘস্স ঞাপনত্থং উট্ঠায সঙ্ঘসন্নিপাতমজ্ঝে ইতো চিতো চ পৰেসং মুখং ওলোকেন্তেন ন চৰিতব্বং. যথানিসিন্নেনেৱ ধম্মৱিনযানুগুণং ৱিনিচ্ছযং যথা সব্বে সুণন্তি, তথা ৱত্তব্বন্তি অত্থো.

পাড়িযং অচণ্ডিকতেনাতি অকতচণ্ডভাৱেন, অফৰুসেনাতি অত্থো. ‘‘হিতানুকম্পিনা’’তি এতেন মেত্তাপুব্বভাগো ৱুত্তো. ‘‘কাৰুণিকেন ভৱিতব্ব’’ন্তি ইমিনা অপ্পনাপ্পত্তকৰুণা ৱুত্তা. ‘‘হিতপৰিসক্কিনা’’তি ইমিনা কৰুণাপুব্বভাগো. তেনাহ ‘‘কৰুণা চ কৰুণাপুব্বভাগো চ উপট্ঠাপেতব্বোতি অযং পদদ্ৱযেপি অধিপ্পাযো’’তি. লজ্জিযাতি লজ্জিনী.

অনুযোগৱত্তং কথাপেত্ৱাতি ‘‘কালেন ৱক্খামী’’তিআদিনা (পৰি. ৩৬২) ৱুত্তৱত্তং. অনুযুঞ্জনাচাৰক্কমেনেৱ অনুযুঞ্জনং অনুযোগৱত্তং নাম, তং কথাপেত্ৱা তেনেৱ কমেন অনুযুঞ্জাপেত্ৱাতি অত্থো. উজুমদ্দৱেনাতি এত্থ অজ্ঝাহৰিতব্বপদং দস্সেতি ‘‘উপচৰিতব্বো’’তি. ‘‘ধম্মেসু চ পুগ্গলেসু চা’’তি ইদং ‘‘মজ্ঝত্তেন ভৱিতব্ব’’ন্তি পকতেন সম্বন্ধিতব্বন্তি আহ ‘‘ধম্মেসু চ পুগ্গলেসু চ…পে… মজ্ঝত্তোতি ৱেদিতব্বো’’তি. যঞ্হি যত্থ কত্থচি কত্তব্বং, তং তত্থ অতিক্কমন্তো মজ্ঝত্তো নাম ন হোতি, ধম্মেসু চ গাৰৱো কত্তব্বো. পুগ্গলেসু পন মেত্তাভাৱেন পক্খপাতগাৰৱো. তস্মা ইমং ৱিধিং অনতিক্কন্তোৱ তেসু মজ্ঝত্তোতি ৱেদিতব্বো.

৩৬৬. সংসন্দনত্থন্তি আপত্তি ৱা অনাপত্তি ৱাতি সংসযে জাতে সংসন্দিত্ৱা নিচ্ছযকৰণত্থং ৱুত্তন্তি অধিপ্পাযো. অত্থদস্সনাযাতি সাধেতব্বস্স আপত্তাদিউপমেয্যত্থস্স চোদকচুদিতকে অত্তনো পটিঞ্ঞায এৱ সৰূপৱিভাৱনত্থং. অত্থো জানাপনত্থাযাতি এৱং ৱিভাৱিতো অত্থো চোদকচুদিতকসঙ্ঘানং ঞাপনত্থায নিজ্ঝাপনত্থায, সম্পটিচ্ছাপনত্থাযাতি অত্থো. পুগ্গলস্স ঠপনত্থাযাতি চোদকচুদিতকে অত্তনো পটিঞ্ঞায এৱ আপত্তিযং, অনাপত্তিযং ৱা পতিট্ঠাপনত্থায. সাৰণত্থাযাতি পমুট্ঠসৰাপনত্থায. সৱচনীযকৰণত্থাযাতি দোসে সাৰিতেপি সম্পটিচ্ছিত্ৱা পটিকম্মং অকৰোন্তস্স সৱচনীযকৰণত্থায. ‘‘ন তে অপসাদেতব্বা’’তি ইদং অধিপ্পেতত্থদস্সনং. তত্থ অৱিসংৱাদকট্ঠানে ঠিতা এৱ ন অপসাদেতব্বা, ন ইতৰেতি দট্ঠব্বং.

অপ্পচ্চযপৰিনিব্বানত্থাযাতি আযতিং পটিসন্ধিযা অকাৰণভূতপৰিনিব্বানত্থায. পৰিনিব্বানঞ্হি নাম খীণাসৱানং সব্বপচ্ছিমা চুতিচিত্তকম্মজৰূপসঙ্খাতা খন্ধা, তে চ সব্বাকাৰতো সমুচ্ছিন্নানুসযতায পুনব্ভৱায অনন্তৰাদিপচ্চযা ন হোন্তি অঞ্ঞেহি চ তণ্হাদিপচ্চযেহি ৱিৰহিতত্তা. তস্মা ‘‘অপ্পচ্চযপৰিনিব্বান’’ন্তি ৱুচ্চতি. তন্তি ৱিমুত্তিঞাণদস্সনং. তেনেৱাহ ‘‘তস্মি’’ন্তি. ৱিনযমন্তনাতি ৱিনযৱিনিচ্ছযো. সোতাৱধানন্তি সোতস্স ওদহনং, সৱনন্তি অত্থো. তেনাহ ‘‘যং উপ্পজ্জতি ঞাণ’’ন্তি. যথাৱুত্তায ৱিনযসংৱৰাদিকাৰণপৰম্পৰায ৱিমুত্তিযা এৱ পধানত্তা সা পুন চিত্তস্স ৱিমোক্খোতি উদ্ধটোতি আহ ‘‘অৰহত্তফলসঙ্খাতো ৱিমোক্খো’’তি. অথ ৱা যো যং কিঞ্চি ধম্মং অনুপাদিযিত্ৱা পৰিনিব্বানৱসেন চিত্তস্স চিত্তসন্ততিযা, তপ্পটিবদ্ধকম্মজৰূপসন্ততিযা চ ৱিমোক্খো ৱিমুচ্চনং অপুনপ্পৱত্তিৱসেন ৱিগমো, এতদত্থায এতস্স ৱিগমস্সত্থায এৱাতি এৱং নিগমনৱসেনপেত্থ অত্থো ৱেদিতব্বো.

৩৬৭. অনুযোগৱত্তগাথাসু কুসলেন বুদ্ধিমতাতি সম্মাসম্বুদ্ধেন. কতন্তি নিব্বত্তিতং, পকাসিতন্তি অত্থো. তেনেৱাতিআদীসু তেনেৱ কতাকতস্স অজাননেৱ পুব্বাপৰং অজাননস্স, অঞ্ঞস্সপি ভিক্খুনো যং কতাকতং হোতি, তম্পি ন জানাতীতি অত্থো. অত্তনো সদিসাযাতি যথাৱুত্তেহি দোসেহি যুত্ততায অত্তনা সদিসায.

অনুৱিজ্জকস্স পটিপত্তিৱণ্ণনা নিট্ঠিতা.