অধিকৰণভেদং

উক্কোটনভেদাদিকথাৱণ্ণনা

৩৪১. ‘‘অলং আৱুসো’’তি অত্তপচ্চত্থিকে সঞ্ঞাপেত্ৱাতি পত্তচীৱৰাদিঅত্থায অলং ভণ্ডনাদিকৰণন্তি ৱিৱাদাদীসু দোসদস্সনমত্তেন সঞ্ঞাপেত্ৱা অঞ্ঞমঞ্ঞং খমাপেত্ৱা ৱূপসমেন্তি, ন পন অঞ্ঞমঞ্ঞং আপত্তানাপত্তিদস্সনৱসেনাতি অধিপ্পাযো. তেনাহ ‘‘পাড়িমুত্তকৱিনিচ্ছযেনেৱা’’তি.

ৱিসমানি কাযকম্মাদীনি নিস্সিতো ভিক্খু ৱিসমনিস্সিতো নাম, মিচ্ছাদিট্ঠিনিস্সিতো গহননিস্সিতো, বলৱন্তে পুৰিসে নিস্সিতো বলৱনিস্সিতো নামাতি দস্সেন্তো ‘‘একো ৱিসমানী’’তিআদিমাহ.

উক্কোটনভেদাদিকথাৱণ্ণনা নিট্ঠিতা.

অধিকৰণনিদানাদিৱণ্ণনা

৩৪২. আপত্তিং নিস্সায উপ্পজ্জনকআপত্তিৱসেনাতি পৰেসং, অত্তনো চ আপত্তিং পটিচ্ছাদেন্তানং ৱজ্জপটিচ্ছাদীনং পাৰাজিকাদিআপত্তিমেৱ সন্ধায ৱুত্তং, ন সব্বাপত্তিযো. কিচ্চং নিস্সায উপ্পজ্জনককিচ্চানন্তি উক্খেপনীযাদিকম্মং নিস্সায উপ্পজ্জনকানং তদনুৱত্তিকায ভিক্খুনিযা যাৱততিযানুস্সাৱনানং কিচ্চানং ৱসেন, ন সব্বেসং কিচ্চানং ৱসেনাতি.

৩৪৪. পাড়িযং ‘‘কতিহি অধিকৰণেহী’’তি পুচ্ছায ‘‘একেন অধিকৰণেন কিচ্চাধিকৰণেনা’’তি ৱুত্তং. ‘‘কতিসু ঠানেসূ’’তি পুচ্ছায ‘‘তীসু ঠানেসু সঙ্ঘমজ্ঝে, গণমজ্ঝে, পুগ্গলস্স সন্তিকে’’তি ৱুত্তং. ‘‘কতিহি সমথেহী’’তি পুচ্ছায ‘‘তীহি সমথেহী’’তি ৱুত্তং. তীহিপি এতেহি একো ৱূপসমনপ্পকাৰোৱ পুচ্ছিতো, ৱিস্সজ্জিতো চাতি ৱেদিতব্বো.

৩৪৮. ৱিৱাদাধিকৰণং হোতি অনুৱাদাধিকৰণন্তিআদীসু ৱিৱাদাধিকৰণমেৱ অনুৱাদাধিকৰণাদিপি হোতীতি পুচ্ছায ৱিৱাদাধিকৰণং ৱিৱাদাধিকৰণমেৱ হোতি, অনুৱাদাদযো ন হোতীতি ৱিস্সজ্জনং.

অধিকৰণনিদানাদিৱণ্ণনা নিট্ঠিতা.

সত্তসমথনানাত্থাদিৱণ্ণনা

৩৫৪. অধিকৰণপুচ্ছাৱিস্সজ্জনে পাড়িযং ৱিপচ্চযতায ৱোহাৰোতি ৱিৰূপৱিপাকায অঞ্ঞমঞ্ঞং দুক্খুপ্পাদনায কাযৱচীৱোহাৰো. মেধগন্তি ৱুদ্ধিপ্পত্তো কলহো.

অনুসম্পৱঙ্কতাতি ৱিপত্তিচোদনায অনু অনু সংযুজ্জনৱসেন নিন্নতা.

অব্ভুস্সহনতাতি অতিৱিয সঞ্জাতুস্সাহতা. অনুবলপ্পদানন্তি চোদকানম্পি উপত্থম্ভকৰণং. কম্মসঙ্গহাভাৱেনাতি সঙ্ঘসম্মুখতাদিমত্তস্স সম্মুখাৱিনযস্স সঙ্ঘাদীহি কত্তব্বকিচ্চেসু সঙ্গহাভাৱা.

সত্তসমথনানাত্থাদিৱণ্ণনা নিট্ঠিতা.

অধিকৰণভেদৱণ্ণনানযো নিট্ঠিতো.

দুতিযগাথাসঙ্গণিকং

চোদনাদিপুচ্ছাৱিস্সজ্জনাৱণ্ণনা

৩৫৯. দুতিযগাথাসঙ্গণিকায ‘‘চোদনা কিমত্থাযা’’তিআদিকা পুচ্ছা উপালিত্থেৰেন কতা. ‘‘চোদনা সাৰণত্থাযা’’তিআদিৱিস্সজ্জনং ভগৱতা ৱুত্তং. উপালিত্থেৰো সযমেৱ পুচ্ছিত্ৱা ৱিস্সজ্জনং অকাসীতিপি ৱদন্তি.

মন্তগ্গহণন্তি তেসং ৱিচাৰণাগহণং, সুত্তন্তিকত্থেৰানং, ৱিনযধৰত্থেৰানঞ্চ অধিপ্পাযগহণন্তি অত্থো. পাটেক্কং ৱিনিচ্ছযসন্নিট্ঠাপনত্থন্তি তেসং পচ্চেকং অধিপ্পাযং ঞত্ৱা তেহি সমুট্ঠাপিতনযম্পি গহেত্ৱা ৱিনিচ্ছযপৰিযোসাপনত্থন্তি অধিপ্পাযো.

‘‘মা খো তুৰিতো অভণী’’তিআদিনা অভিমুখে ঠিতং কঞ্চি অনুৱিজ্জকং ওৱদন্তেন ৱিয থেৰেন অনুৱিজ্জকৱত্তং কথিতং.

অনুযুঞ্জনৱত্তন্তি অনুযুজ্জনক্কমং, তং পন যস্মা সব্বসিক্খাপদৱীতিক্কমৱিসযেপি তংতংসিক্খাপদানুলোমেন কত্তব্বং, তস্মা ‘‘সিক্খাপদানুলোমিক’’ন্তি ৱুত্তং. অত্তনো গতিং নাসেতীতি অত্তনো সুগতিগমনং ৱিনাসেতি.

অনুসন্ধিত-সদ্দো ভাৱসাধনোতি আহ ‘‘অনুসন্ধিতন্তি কথানুসন্ধী’’তি. ৱত্তানুসন্ধিতেনাতি এত্থাপি এসেৱ নযো. ৱত্তানুসন্ধিতেনাতি আচাৰানুসন্ধিনা, আচাৰেন সদ্ধিং সমেন্তিযা পটিঞ্ঞাযাতি অত্থো. তেনাহ ‘‘যা অস্স ৱত্তেনা’’তিআদি.

পাড়িযং সঞ্চিচ্চ আপত্তিন্তিআদি অলজ্জিলজ্জিলক্খণং ভিক্খুভিক্খুনীনং ৱসেন ৱুত্তং তেসঞ্ঞেৱ সব্বপ্পকাৰতো সিক্খাপদাধিকাৰত্তা. সামণেৰাদীনম্পি সাধাৰণৱসেন পন সঞ্চিচ্চ যথাসকং সিক্খাপদৱীতিক্কমনাদিকং অলজ্জিলজ্জিলক্খণং ৱেদিতব্বং.

কথানুসন্ধিৱচনন্তি চুদিতকঅনুৱিজ্জকানং কথায অনুসন্ধিযুত্তং ৱচনং ন জানাতি, তেহি একস্মিং কাৰণে ৱুত্তে সযং তং অসল্লক্খেত্ৱা অত্তনো অভিৰুচিতমেৱ অসম্বন্ধিতত্থন্তি অত্থো. ৱিনিচ্ছযানুসন্ধিৱচনঞ্চাতি অনুৱিজ্জকেন কতস্স আপত্তানাপত্তিৱিনিচ্ছযস্স অনুগুণং, সম্বন্ধৱচনঞ্চ.

চোদনাদিপুচ্ছাৱিস্সজ্জনাৱণ্ণনা নিট্ঠিতা.