পঠমগাথাসঙ্গণিকং

সত্তনগৰেসু পঞ্ঞত্তসিক্খাপদৱণ্ণনা

৩৩৫. অড্ঢুড্ঢসতানীতি পঞ্ঞাসাধিকানি তীণি সতানি. ৱিগ্গহপদেন মনুস্সৱিগ্গহং ৱুত্তং.

অতিৰেকন্তি পঠমকথিনং. কাড়কন্তি সুদ্ধকাড়কং. ভূতন্তি ভূতাৰোচনং. ভিক্খুনীসু চ অক্কোসোতি ‘‘যা পন ভিক্খুনী ভিক্খুং অক্কোসেয্যা’’তি (পাচি. ১০২৯) ৱুত্তং সিক্খাপদং.

দ্ৱেপি চ ভেদাতি দ্ৱে সঙ্ঘভেদসিক্খাপদানি. অন্তৰৱাসকনামেন অঞ্ঞাতিকায ভিক্খুনিযা হত্থতো চীৱৰপটিগ্গহণং ৱুত্তং. সুত্তন্তি সুত্তং ৱিঞ্ঞাপেত্ৱা ৱাযাপনং. ৱিকালেতি ৱিকালভোজনং. চাৰিত্তন্তি পুৰেভত্তং পচ্ছাভত্তং চাৰিত্তং. নহানন্তি ওৰেনদ্ধমাসনহানং.

চীৱৰং দত্ৱাতি সমগ্গেন সঙ্ঘেন চীৱৰং দত্ৱা খিয্যনং. গিৰগ্গন্তি নচ্চগীতং. চৰিযাতি অন্তোৱস্সং চাৰিকচৰণং. তত্থেৱাতি ৱস্সংৱুত্থায চাৰিকং অপক্কমিত্ৱা তত্থেৱ নিৱাসনং পটিচ্চ পঞ্ঞত্তসিক্খাপদং. ছন্দদানেনাতি পাৰিৱাসিকেন ছন্দদানেন.

পাৰাজিকানি চত্তাৰীতি ভিক্খুনীনং অসাধাৰণানি. সোড়সাতি আদিতো পঞ্চ সিক্খাপদানি, কুলদূসনঞ্চাতি ছ, ভিক্খুনীনং অসাধাৰণানি দস নিস্সগ্গিযানি.

চতুত্তিংসাতি পঠমকথিনসুদ্ধকাড়কচীৱৰপটিগ্গহণৰূপিযচীৱৰৱাযাপনকোসেয্যমিস্সকএড়কলোমধোৱাপনদুতিযপত্তৱজ্জিতানি ভিক্খুৱিভঙ্গে দ্ৱাৱীসতি, ভিক্খুনীনং অসাধাৰণানি দ্ৱাদস চাতি চতুত্তিংস. ছপঞ্ঞাসসতন্তি ৱেসালিযাদীসু পঞ্ঞত্তানি দ্ৱত্তিংসসিক্খাপদানি ঠপেত্ৱা সেসা ছপঞ্ঞাসসতং.

দস গাৰয্হাতি ৱোসাসঅপ্পটিসং ৱিদিতসিক্খাপদদ্ৱযঞ্চ ঠপেত্ৱা সেসানি দস পাটিদেসনীযানি. দ্ৱে সত্ততি সেখিযানি সুৰুসুৰুকাৰকসামিসেনহত্থেনপানীযথালকপটিগ্গহণসসিত্থকপত্তধোৱনানি তীণি ঠপেত্ৱা সেসানি সেখিযানি.

সেয্যাতি অনুপসম্পন্নেন সহসেয্যসিক্খাপদং. খণনেতি পথৱীখণনং. গচ্ছ দেৱতেতি ভূতগামসিক্খাপদং ৱুত্তং. সপ্পাণকং সিঞ্চন্তি সপ্পাণোদকসিঞ্চনং. মহাৱিহাৰোতি মহল্লকৱিহাৰো.

অঞ্ঞন্তি অঞ্ঞৱাদকং. দ্ৱাৰন্তি যাৱ দ্ৱাৰকোসা অগ্গড়ট্ঠপনং. সহধম্মোতি সহধম্মিকং ৱুচ্চমানো. পযোপানন্তি সুৰুসুৰুকাৰকসিক্খাপদং.

এড়কলোমোতি এড়কলোমধোৱাপনং. পত্তো চাতি দুতিযপত্তো. ওৱাদোতি ভিক্খুনুপস্সযং উপসঙ্কমিত্ৱা ওৱাদো. ভেসজ্জন্তি চতুমাসপচ্চযপৱাৰণাসিক্খাপদং. আৰঞ্ঞিকোতি চতুত্থপাটিদেসনীযং. ওৱাদোতি ওৱাদায ৱা সংৱাসায ৱা অগমনং.

৩৩৭. ‘‘যে চ যাৱততিযকা’’তি পঞ্হস্স ‘‘ইমে খো যাৱততিযকা’’তি ৱিস্সজ্জনং ৱত্ৱা তদনন্তৰং ‘‘সাধাৰণং অসাধাৰণ’’ন্তিআদিপঞ্হানং ৱিস্সজ্জনে ৱত্তব্বে যস্মা তং অৱত্ৱা ‘‘কতি ছেদনকানী’’তিআদিকে অট্ঠ পঞ্হে অন্তৰা ৱিস্সজ্জেত্ৱা তেসং অনন্তৰা ‘‘ৱীসং দ্ৱে সতানি ভিক্খূনং…পে… ছচত্তাৰীসা ভিক্খূনং, ভিক্খুনীহি অসাধাৰণা’’তিআদিনা উক্কমেনেৱ সাধাৰণাদিপঞ্হা ৱিস্সজ্জিতা, তস্মা তং উক্কমৱিস্সজ্জনকাৰণং দস্সেতুং ‘‘যস্মা পন যে চ যাৱততিযকাতি অযং পঞ্হো’’তিআদিমাহ.

৩৩৮. ধোৱনঞ্চ পটিগ্গহোতিআদিগাথা অট্ঠকথাচৰিযানং গাথাৱ. ছব্বস্সানি নিসীদনন্তি দ্ৱে সিক্খাপদানি. দ্ৱে লোমাতি তিযোজনাতিক্কমধোৱাপনৱসেন দ্ৱে এড়কলোমসিক্খাপদানি. ৱস্সিকা আৰঞ্ঞকেন চাতি ৱস্সিকসাটিকা পৰিযেসনঅৰঞ্ঞকেসু সেনাসনেসু ৱিহৰণসিক্খাপদেন সহ.

পণীতন্তি পণীতভোজনৱিঞ্ঞাপনং. ঊনন্তি ঊনৱীসতিৱস্সূপসম্পাদনং. মাতুগামেন সদ্ধিন্তি সংৱিধায গমনং ৱুত্তং. যা সিক্খাতি যং সিক্খাপদং. নিসীদনে চ যা সিক্খাতি পমাণাতিক্কন্তনিসীদনকাৰাপনে যং সিক্খাপদং. তথা ৱস্সিকা যা চ সাটিকাতি এত্থাপি.

পাড়িযং সতং সত্ততি ছচ্চেৱিমে হোন্তি উভিন্নং অসাধাৰণাতি ভিক্খূনং ভিক্খুনীহি অসাধাৰণা ছচত্তাৰীস, ভিক্খুনীনং ভিক্খূহি অসাধাৰণা তিংসাধিকং সতঞ্চাতি এৱং উভিন্নং অসাধাৰণা চ ছসত্ততিঅধিকং সতং সিক্খাপদানীতি অত্থো. সতং সত্ততি চত্তাৰীতি উভিন্নং সাধাৰণসিক্খানং গণনা চতুসত্ততিঅধিকং সতং সিক্খাপদানীতি অত্থো.

ৱিভত্তিযোতি আপত্তিক্খন্ধা চেৱ উপোসথপৱাৰণাদযো চ অধিপ্পেতা. তে হি পাৰাজিকাদিভেদেন, ভিক্খুউপোসথাদিভেদেন চ ৱিভজীযন্তি. তেনাহ ‘‘ৱিভত্তিযো’’তিআদি. তেসন্তি অট্ঠন্নং পাৰাজিকাদীনং. দ্ৱীহীতিআদি ৱিৱাদাধিকৰণাদীনং সমথেহি ৱূপসমদস্সনং.

সত্তনগৰেসু পঞ্ঞত্তসিক্খাপদৱণ্ণনা নিট্ঠিতা.

পাৰাজিকাদিআপত্তিৱণ্ণনা

৩৩৯. ইদন্তি ‘‘পাৰাজিকন্তি যং ৱুত্ত’’ন্তিআদিনা ৱুত্তং ৱচনং সন্ধায ৱদতি. ইদঞ্হি হেট্ঠা ‘‘গৰুক লহুক’’ন্তিআদিনা উদ্ধটপঞ্হেসু অনাগতম্পি ‘‘সব্বানিপেতানি ৱিযাকৰোহি, হন্দ ৱাক্যং সুণোম তে’’তি এত্থ যথাৱুত্তানি অঞ্ঞানিপি ‘‘সব্বানিপেতানি ৱিযাকৰোহি, হন্দ ৱাক্যং সুণোমা’’তি এৱং গহিতমেৱাতি দস্সেন্তো ‘‘ইমিনা পন আযাচনৱচনেন সঙ্গহিতস্সা’’তিআদি ৱুত্তং.

অতিৱস্সতীতি ওৱস্সতি, ৱস্সোদকং পৱিসতীতি অত্থো. ধম্মানন্তি যথা চতুপচ্চযে ধাৰযতীতি ধম্মো, তেসং. তেনাহ ‘‘সঙ্খতধম্মান’’ন্তি. গাথাসঙ্গণিকন্তি গাথাসঙ্গহো, তে তে অত্থা গাথাহি সঙ্গহেত্ৱা গণীযন্তি কথীযন্তি এত্থাতি হি গাথাসঙ্গণিকং.

পাৰাজিকাদিআপত্তিৱণ্ণনা নিট্ঠিতা.

পঠমগাথাসঙ্গণিকৱণ্ণনানযো নিট্ঠিতো.