সেদমোচনগাথাৱণ্ণনা

অৱিপ্পৱাসপঞ্হাৱণ্ণনা

৪৭৯. তহিন্তি তস্মিং পুগ্গলে. অকপ্পিযসম্ভোগো নাম মেথুনধম্মাদি. ‘‘ৱৰসেনাসনৰক্খণত্থায ৱিস্সজ্জেত্ৱা পৰিভুঞ্জিতুং ৱট্টতী’’তি গৰুভণ্ডৱিনিচ্ছযে ৱুত্তো. একাদসাৱন্দিযে পণ্ডকাদযো একাদস. উপেতি সপৰিসং. ন জীৱতি নিম্মিতৰূপত্তা. ‘‘উব্ভক্খকেন ৱদামী’’তি ইমিনা মুখে মেথুনধম্মাভাৱং দীপেতি. অধোনাভিৱিৱজ্জনেন ৱচ্চমগ্গপ্পস্সাৱমগ্গেসু. গামন্তৰপৰিযাপন্নং নদিপাৰং ওক্কন্তভিক্খুনিং সন্ধাযাতি ভিক্খুনিযা গামাপৰিযাপন্নপৰতীৰে নদিসমীপমেৱ সন্ধায ৱুত্তা. তত্থ পৰতীৰে গামূপচাৰো একলেড্ডুপাতো নদিপৰিযন্তেন পৰিচ্ছিন্নো, তস্মা পৰতীৰে ৰতনমত্তম্পি অৰঞ্ঞং ন অত্থি, তঞ্চ তিণাদীহি পটিচ্ছন্নত্তা দস্সনূপচাৰৱিৰহিতং কৰোতি. তত্থ অত্তনো গামে আপত্তি নত্থি. পৰতীৰে পন একলেড্ডুপাতসঙ্খাতে গামূপচাৰেযেৱ পদং ঠপেতি. অন্তৰে অভিধম্মৱসেন অৰঞ্ঞভূতং সকগামং অতিক্কমতি নাম, তস্মা গণম্হা ওহীযনা চ হোতীতি ঞাতব্বং. এত্তাৱতাপি সন্তোসমকত্ৱা ৱিচাৰেত্ৱা গহেতব্বং. ভিক্খূনং সন্তিকে উপসম্পন্না পঞ্চসতা মহাপজাপতিপ্পমুখা. মহাপজাপতিপি হি আনন্দত্থেৰেন দিন্নওৱাদস্স পটিগ্গহিতত্তা ভিক্খূনং সন্তিকে উপসম্পন্না নাম.

পাৰাজিকাদিপঞ্হাৱণ্ণনা

৪৮০. ‘‘দুস্সকুটিং সন্ধাযা’’তি সহ দুস্সেন ৱীতিক্কমনস্স সক্কুণেয্যতায ৱুত্তং. লিঙ্গপৰিৱত্তে পটিগ্গহণস্স ৱিজহনতো সামং গহেত্ৱা ভুঞ্জিতুং ন ৱট্টতি. কাকঊহদনং ৱাতি কাকেন ঊহদনং ৱা. ‘‘তযো পুৰিসেপি উপগন্ত্ৱা’’তি পাঠসেসো.

পাচিত্তিযাদিপঞ্হাৱণ্ণনা

৪৮১. মেথুনধম্মপচ্চযা নাম কাযসংসগ্গো. তংহেতু মেথুনধম্মস্স পুব্বভাগভূতং কাযসংসগ্গং ৱাযামন্তিযাতি অট্ঠৱত্থুপূৰণং সন্ধায. পৰিভোগপ্পচ্চযাতি পৰিভোগকাৰণা. তস্মাতি যস্মা পৰিভোগপ্পচ্চযা আপজ্জতি, তস্মা ভোজনপৰিযোসানে হোতীতি অত্থো. পোৰাণপোত্থকেসু ‘‘তস্সা’’তি পাঠো. ‘‘কাৰণৱচনং সুন্দৰং ভোজনপৰিচ্ছেদদস্সনতো’’তি ৱদন্তি.

সেদমোচনগাথাৱণ্ণনা নিট্ঠিতা.