দুতিযগাথাসঙ্গণিকৱণ্ণনা

কাযিকাদিআপত্তিৱণ্ণনা

৪৭৪-৫. নিদানুদ্দেসং ৱিনা সেসুদ্দেসাভাৱা ‘‘সব্বপাতিমোক্খুদ্দেসানঞ্চ সঙ্গহো হোতী’’তি ৱুত্তং. ৱিনযে গৰুকা ৱিনযগৰুকা. ইদং পন দ্ৱীসু গাথাসু কিঞ্চাপি আগতং, অঞ্ঞেহি পন মিস্সেত্ৱা ৱুত্তভাৱা নানাকৰণং পচ্চেতব্বং. নৱসু ঠানেসু কম্মং হোতীতি কম্মঞত্তি হোতি. ৱাচাতি ৱচীসম্ভৱা. অদ্ধানহীনো ঊনৱীসতিৱস্সো. ‘‘অপিচেত্থাতি কুৰুন্দিৱাদো’’তি ৱুত্তং. ৱনপ্পতিন্তি এৱং অদিন্নাদানে আগতং ৱনপ্পতিং. ৱিস্সট্ঠিছড্ডনেতি সুক্কৱিস্সট্ঠিযং. দুক্কটা কতাতি দুক্কটং ৱুত্তং. আমকধঞ্ঞং ৱিঞ্ঞাপেত্ৱা ভুঞ্জন্তিযা পুব্বপযোগে দুক্কটং, অজ্ঝোহাৰে পাচিত্তিযং.

পাচিত্তিযৱণ্ণনা

৪৭৬. মহাসঙ্ঘিকা সামণেৰেপি আপত্তিং দেসাপেন্তি কিৰ, তেন ৱুত্তং ‘‘ন দেসাপেতব্বা’’তি, দণ্ডকম্মং পন তেসং কাতব্বং তথাৰূপে ওড়াৰিকৱীতিক্কমে.

অৱন্দনীযপুগ্গলাদিৱণ্ণনা

৪৭৭. দসসতং আপত্তিযোতি সহস্সং আপত্তিযো. চম্পাযং ৱিনযৱত্থুস্মিন্তি চম্পেয্যক্খন্ধকে. অধম্মেন ৱগ্গন্তিআদীনি চত্তাৰি কম্মানিযেৱ ভগৱতা ৱুত্তানীতি অত্থো. ন কেৱলং আপত্তিযেৱ, অথ খো ছ সমথা…পে… সম্মুখাৱিনযেন সম্মন্তি, সমাযোগং গচ্ছন্তি সম্মুখাৱিনযেন সম্পযোগং গচ্ছন্তীতি অত্থো. ৱিনা সমথেহি সম্মতি, সমথভাৱং গচ্ছতি. পটিসেধত্থে সতি ৱিনা সমথেহীতি সমথেহি ৱিনাতি অত্থো.

সোড়সকম্মাদিৱণ্ণনা

৪৭৮. অসুত্তকন্তি সুত্তৱিৰহিতং, উসুত্তং তত্ৰ নত্থীতি অধিপ্পাযো.

দুতিযগাথাসঙ্গণিকৱণ্ণনা নিট্ঠিতা.