কথিনভেদৱণ্ণনা

কথিনঅত্থতাদিৱণ্ণনা

৪০৩-৪. কিন্তি কথং. অনাদিযদানং তাৱকালিকৱত্থু. ‘‘অনাগতৱসেন অনন্তৰা হুত্ৱা’’তি উদকাহৰণাদিপযোগস্স ধোৱনাদিপুব্বকৰণস্স পচ্ছা উপ্পজ্জনতো, ধোৱনাদিকিৰিযঞ্চ সন্ধায পযোগকৰণতো ৱুত্তং. পুৰেজাতপচ্চযে পনেস পযোগোতি অত্থো. একং ধম্মম্পি ন লভতি অত্তনো পুৰেজাতস্স নত্থিতায.

কথিনাদিজানিতব্বৱিভাগৱণ্ণনা

৪১২. ৰূপাদিধম্মেসূতি ৱণ্ণগন্ধাদিঅট্ঠকেসু. ‘‘ৱস্সানস্স পচ্ছিমো মাসো’’তি (পাৰা. ২১৮) ৱুত্তত্তা পচ্ছিমে মাসে যস্মিং ৱা তস্মিং ৱা দিৱসে অত্থৰিতুং ৱট্টতীতি সিদ্ধং.

৪১৫. ‘‘আদিচ্চবন্ধুনাতি ৱুত্তত্তা থেৰৱচন’’ন্তি ৱদন্তি.

পলিবোধপঞ্হাব্যাকৰণকথাৱণ্ণনা

৪১৫-৬. সন্নিট্ঠানন্তিকো কথং বহিসীমায উদ্ধৰীযতি? ভিক্খু অকতচীৱৰং সমাদায পক্কমতি ‘‘ন পচ্চেস্স’’ন্তি, তস্স বহিসীমাগতস্স এৱং হোতি ‘‘নেৱিমং চীৱৰং কাৰেস্স’’ন্তি, এৱমেতস্স বহিসীমাগতস্স উদ্ধৰীযতি. কথং অন্তোসীমায? অকতচীৱৰং সমাদায পক্কমতি ‘‘ন পচ্চেস্স’’ন্তি, ততো তত্থ ফাসুৱিহাৰং অলভন্তো তমেৱ ৱিহাৰং আগচ্ছতি, তস্স চীৱৰপলিবোধোযেৱ ঠিতো, সো চ ‘‘নেৱিমং চীৱৰং কাৰেস্স’’ন্তি চিত্তে উপ্পন্নে ছিজ্জতি, তস্মা ‘‘অন্তোসীমায উদ্ধৰীযতী’’তি ৱুত্তং. সন্নিট্ঠানন্তিকং দুৱিধং ‘‘ন পচ্চেস্স’’ন্তি আৱাসপলিবোধং ছিন্দিত্ৱা ততো পুনপি তমেৱ ৱিহাৰং আগন্ত্ৱা ‘‘নেৱিমং চীৱৰং কাৰেস্স’’ন্তি সন্নিট্ঠানং কৰোতি, বহিসীমায ঠত্ৱা ‘‘নেৱিমং চীৱৰং কাৰেস্সং ন পচ্চেস্স’’ন্তি চিত্তুপ্পাদেন সন্নিট্ঠানন্তিকং হোতি. গাথাযম্পি ‘‘দ্ৱে পলিবোধা অপুব্বং অচৰিম’’ন্তি ইদং ইমমেৱ সন্ধায. ‘‘আসাৱচ্ছেদিকো কথং অন্তোসীমায? আসীসিতেন ‘তুম্হে ৱিহাৰমেৱ পত্থেথ, অহং পহিণিস্সামী’তি ৱুত্তো পুব্বে ‘ন পচ্চেস্স’ন্তি আৱাসপলিবোধং ছিন্দিত্ৱা গতো পুন তং ৱিহাৰং গন্ত্ৱা তেন ‘নাহং সক্কোমি দাতু’ন্তি পহিতো হোতী’’তি লিখিতং. ‘‘অত্থাৰে হি সতি উদ্ধাৰো নামা’’তি অত্থাৰং ৱিনা উদ্ধাৰং ন লভন্তি, তস্মা ৱুত্তং. পুৰিমা দ্ৱেতি ‘‘দ্ৱে কথিনুদ্ধাৰা একুপ্পাদা একনিৰোধা’’তি ৱুত্তাধিকাৰে পঠমং ৱুত্তা অন্তৰব্ভাৰসহুব্ভাৰা. ন পক্কমনন্তিকাদযো দ্ৱে. একতো নিৰুজ্ঝন্তীতি উদ্ধাৰভাৱং পাপুণন্তীতি অত্থো.

কথিনভেদৱণ্ণনা নিট্ঠিতা.

পঞ্ঞত্তিৱগ্গৱণ্ণনা নিট্ঠিতা.