৫. খুদ্দকৱত্থুক্খন্ধকৱণ্ণনা

খুদ্দকৱত্থুকথাৱণ্ণনা

২৪৪. পুথুপাণিনা কত্তব্বং কম্মং পুথুপাণিকং.

২৪৫. ‘‘কণ্ণতো নিক্খন্তমুত্তোলম্বকাদীনং কুণ্ডলাদীন’’ন্তি লিখিতং. ‘‘কাযূৰ’’ন্তি পাড়িপাঠো. ‘‘কেযূৰাদীনী’’তি আচৰিযেনুদ্ধটং.

২৪৮. ‘‘সাধুগীতং নাম পৰিনিব্বুতট্ঠানে গীত’’ন্তি লিখিতং. দন্তগীতং গাযিতুকামানং ৱাক্ককৰণীযং. দন্তগীতস্স ৱিভাৱনত্থং ‘‘যং গাযিস্সামা’’তিআদিমাহ.

২৪৯. চতুৰস্সৱত্তং নাম চতুপ্পাদগাথাৱত্তং. ‘‘তৰঙ্গৱত্তাদীনি উচ্চাৰণৱিধানানি নট্ঠপযোগানী’’তি লিখিতং. বাহিৰলোমিন্তি ভাৱনপুংসকং, যথা তস্স উণ্ণপাৱাৰস্স বহিদ্ধা লোমানি দিস্সন্তি, তথা ধাৰেন্তস্স দুক্কটন্তি ৱুত্তং হোতি.

২৫১. ৱিৰূপক্খেহীতিআদি সহযোগকৰণৱচনং. সৰবূতি গেহগোড়িকা. সা কিৰ সেতা সৱিসা হোতি. সোহন্তি যস্স মে এতেহি মেত্তং, সোহং নমো কৰোমি ভগৱতোতি সম্বন্ধো. অঞ্ঞম্হি…পে… ছেতব্বম্হীতি ৰাগানুসযে.

২৫২. উট্টিত্ৱাতি পক্খিপিত্ৱা. ওতৰতূতি ইদ্ধিযা ওতাৰেত্ৱা গণ্হাতু. অনুপৰিযাযীতি অনুপৰিব্ভমি.

২৫৩. ন অচ্ছুপিযন্তীতি ন লগ্গন্তি. ৰূপকাকিণ্ণানীতি ইত্থিৰূপাদীহি ৱোকিণ্ণানি.

২৫৪. আলিন্দকমিড্ঢিকাদীনন্তি পমুখমিড্ঢিকাদীনং. পৰিৱত্তেত্ৱা তত্থেৱাতি এত্থ ‘‘পৰিৱত্তেত্ৱা ততিযৱাৰে তত্থেৱ মিড্ঢিযা পতিট্ঠাতী’’তি লিখিতং. পৰিভণ্ডং নাম গেহস্স বহি কুট্টপাদস্স থিৰভাৱত্থং কতা তনুকমিড্ঢিকা ৱুচ্চতি. এত্থ ‘‘পৰিৱট্টিত্ৱা পত্তো ভিজ্জতীতি অধিকৰণভেদাসঙ্কায অভাৱে ঠানে ঠপেতুং ৱট্টতী’’তি লিখিতং. পত্তমাড়কো ৱট্টিত্ৱা পত্তানং অপতনত্থং ৱট্টং ৱা চতুৰস্সং ৱা ইট্ঠকাদীহি পৰিক্খিপিত্ৱা মাড়কচ্ছন্নেন কতো. ‘‘পত্তমণ্ডলিকা পত্তপচ্ছিকা তালপত্তাদীহি কতা’’তি চ লিখিতং. মিড্ঢন্তে আধাৰকে ঠপেতুং ৱট্টতি পত্তসন্ধাৰণত্থং ৱুত্তত্তা. মঞ্চে আধাৰকেপি ন ৱট্টতি নিসীদনপচ্চযা ৱাৰিতত্তা. আসন্নভূমিকত্তা ওলম্বেতুং ৱট্টতি.

২৫৫. ‘‘অংসকূটে লগ্গেত্ৱাতি ৱচনতো অগ্গহত্থে লগ্গেত্ৱা অঙ্কে ঠপেতুং ন ৱট্টতী’’তি কেচি ৱদন্তি, ন সুন্দৰং, ‘‘ন কেৱলং যস্স পত্তো’’তিআদি যদি হত্থেন গহিতপত্তে ভেদসঞ্ঞা, পগেৱ অঞ্ঞেন সৰীৰাৱযৱেনাতি কত্ৱা ৱুত্তং. পাড়িযং পন পচুৰৱোহাৰৱসেন ৱুত্তং. ঘটিকপালমযং ঘটিকটাহং. ছৱসীসস্স পত্তন্তি ‘‘সিলাপুত্তকস্স সৰীৰং, খীৰস্স ধাৰাতিআদিৱোহাৰৱসেন ৱুত্তং. মঞ্চে নিসীদিতুং আগতোতি অত্থো. ‘‘পিসাচিল্লিকাতি পিসাচদাৰকা’’তিপি ৱদন্তি. দিন্নকমেৱ পটিগ্গহিতমেৱ. চব্বেত্ৱাতি খাদিত্ৱা. অট্ঠিকানি চ কণ্টকানি চ অট্ঠিককণ্টকানি. ‘‘এতেসু সব্বেসু পণ্ণত্তিং জানাতু ৱা, মা ৱা, আপত্তিযেৱা’’তি লিখিতং.

২৫৬. ৱিপ্ফাড়েত্ৱাতি ফাড়েত্ৱা. কিণ্ণেন পূৰেতুন্তি সুৰাকিণ্ণেন পূৰেতুং. বিদলকং নাম দিগুণকৰণসঙ্খাতস্স কিৰিযাৱিসেসস্স অধিৱচনং. কস্স দিগুণকৰণং? যেন কিলঞ্জাদিনা মহন্তং কথিনমত্থতং, তস্স. তঞ্হি দণ্ডকথিনপ্পমাণেন পৰিযন্তে সংহৰিত্ৱা দিগুণং কাতব্বং. অঞ্ঞথা খুদ্দকচীৱৰস্স অনুৱাতপৰিভণ্ডাদিৱিধানকৰণে হত্থস্স ওকাসো ন হোতি. সলাকায সতি দ্ৱিন্নং চীৱৰানং অঞ্ঞতৰং ঞত্ৱা সিব্বিতাসিব্বিতং সুখং পঞ্ঞাযতি. দণ্ডকথিনে কতে ন বহূহি সহাযেহি পযোজনং. ‘‘অসংকুটিত্ৱা চীৱৰং সমং হোতি. কোণাপি সমা হোন্তী’’তি লিখিতং, ‘‘হলিদ্দিসুত্তেন সঞ্ঞাকৰণ’’ন্তি ৱুত্তত্তা হলিদ্দিসুত্তেন চীৱৰং সিব্বেতুম্পি ৱট্টতীতি সিদ্ধং. তত্থ হি কেচি অকপ্পিযসঞ্ঞিনো. পটিগ্গহো নাম অঙ্গুলিকোসো.

২৫৭-৮. পাতীতি পটিগ্গহসণ্ঠানং. পটিগ্গহত্থৱিকন্তি অঙ্গুলিকোসত্থৱিকং. সূচিসত্থকানং পুব্বে আৱেসনত্থৱিকায অনুঞ্ঞাতত্তা ‘‘অনুজানামি, ভিক্খৱে, ভেসজ্জত্থৱিক’’ন্তি ৱুত্তং. এত্থ সূচিসত্থকাদীনিপি ঠপেতব্বানীতি নিদানং সূচেতি. সচেপি উপনন্দো ভিক্খু অলজ্জী, তথাপি সন্তকমেতং অমূলচ্ছেদকতভিক্খুনো লজ্জিনোপি সমানস্স কপ্পতীতি যুজ্জতি. ন সম্মতীতি ন পহোতি.

২৬০-১. বহি কুট্টস্স সমন্ততো নীচৱত্থুকং কত্ৱা ঠিতং ‘‘মণ্ডলিক’’ন্তি ৱুচ্চতি. জন্তাঘৰপ্পটিচ্ছাদিনা ছন্নস্স নগ্গিযং যস্স ন পঞ্ঞাযতি, তস্সেৱ পৰিকম্মং কাতব্বং. এস নযো উদকৱত্থপটিচ্ছাদীসুপি.

২৬২-৩. পণিযা নাম পণিযকাৰকা. আকড্ঢনযন্তং আকড্ঢিযমানং কূপস্স উপৰিভাগে পৰিব্ভমতি. অৰহটঘটিযন্তং সকটচক্কসণ্ঠানযন্তং. তস্স অৰে অৰে ঘটিকানি বন্ধিত্ৱা একেন, দ্ৱীহি ৱা পৰিব্ভমিযমানস্স উদকনিব্বাহনং ৱেদিতব্বং. আৱিদ্ধপক্খপাসং নাম যত্থ মণ্ডলাকাৰেন পক্খপাসা বজ্ঝন্তি আৱিদ্ধৱত্থতা ৱিয আৱিদ্ধপক্খপাসকা. পুব্বে পত্তসঙ্গোপনত্থং, ইদানি ঠপেতব্বং ভুঞ্জিতুং আধাৰকো অনুঞ্ঞাতো.

২৭৩. পৰগলং গচ্ছতীতি ইমস্স পযোগাভাৱা ৱট্টতি. কম্মসতেনাতি মহতা উস্সাহেন.

২৭৭-৮. লোহভণ্ডং নাম কংসতো সেসলোহভণ্ডং. মুদ্দিককাযবন্ধনং নাম চতুৰস্সং অকত্ৱা সজ্জিতং. পামঙ্গদসা চতুৰস্সা. মুদিঙ্গসণ্ঠানেনাতি সঙ্ঘাটিযা মুদিঙ্গসিব্বনাকাৰেন ৱৰকসীসাকাৰেন. পৱনন্তোতি পাসন্তো. ‘‘দসামূল’’ন্তি চ লিখিতং. অকাযবন্ধনেন সঞ্চিচ্চ ৱা অসঞ্চিচ্চ ৱা গামপ্পৱেসনে আপত্তি. ‘‘সৰিতট্ঠানতো বন্ধিত্ৱা পৱিসিতব্বং, নিৱত্তিতব্বং ৱা’’তি লিখিতং.

২৭৯. সত্তঙ্গুলং ৱা অট্ঠঙ্গুলং ৱাতি এত্থ ‘‘সুগতঙ্গুলেনা’’তি অৱুত্তত্তা পকতিঅঙ্গুলেন সাৰুপ্পত্থায ৱড্ঢেত্ৱাপি কৰোন্তি চে, ন দোসো.

২৮০. তালৱণ্টাকাৰেন সীহড়িত্থীনং ৱিয.

খুদ্দকৱত্থুক্খন্ধকৱণ্ণনা নিট্ঠিতা.