১২. সত্তসতিকক্খন্ধকৱণ্ণনা

দসৱত্থুকথাৱণ্ণনা

৪৪৬. নিক্খিত্তমণিসুৱণ্ণাতি সিক্খাপদেনেৱ পটিক্খিত্তমণিসুৱণ্ণা. তত্থ মণিগ্গহণেন সব্বং দুক্কটৱত্থু, সুৱণ্ণগ্গহণেন সব্বং পাচিত্তিযৱত্থু গহিতং হোতি. ভিক্খগ্গেন ভিক্খুগণনাযাতি ৱুত্তং হোতি.

৪৪৭. মহিকাতি হিমং. পোসাতি সত্তা. সৰজাতি সকিলেসৰজা. মগাতি মগসদিসা. তস্মিং তস্মিং ৱিসযে, ভৱে ৱা নেতীতি নেত্তি, তণ্হাযেতং অধিৱচনং, তায সহ ৱত্তন্তীতি সনেত্তিকা.

৪৫০-২. অহোগঙ্গোতি পব্বতস্স নামং. অনুমানেস্সামাতি পঞ্ঞাপেস্সাম. আসুতাতি সজ্জিতা, ‘‘অসুত্তা’’তি ৱা পাঠো, অনাৱিলা অপক্কা তৰুণা.

৪৫৩. উজ্জৱিংসু পটিসোতেন গচ্ছিংসু.

৪৫৫. অপ্পেৱ নামাতি সাধু নাম. মূলা দাযকা পেসলকা. ‘‘কুল্লকৱিহাৰেনাতি খুদ্দকৱিহাৰেনা’’তি লিখিতং. ৰূপাৱতাৰত্তা কুল্লকৱিহাৰো নাম. কথং পনেতং পঞ্ঞাযতি, যেন সন্নিধিকতং যাৱজীৱিকং যাৱকালিকেন তদহুপটিগ্গহিতেন সম্ভিন্নৰসং তদহুপটিগ্গহিতসঙ্খযং আগন্ত্ৱা সন্নিধিকতামিসসঙ্খ্যমেৱ গচ্ছতীতি? ৱুচ্চতে – ‘‘যাৱকালিকেন, ভিক্খৱে, যাৱজীৱিকং তদহুপটিগ্গহিত’’ন্তি ৱচনতো পুৰেপটিগ্গহিতং যাৱজীৱিকং তদহুপটিগ্গহিতেনামিসেন চে সম্ভিন্নং, পুৰেপটিগ্গহিতসঙ্খ্যমেৱ গচ্ছতীতি সিদ্ধং. অঞ্ঞথা ‘‘সত্তাহকালিকেন, ভিক্খৱে, যাৱজীৱিকং পটিগ্গহিতং সত্তাহং কপ্পতী’’তি (মহাৱ. ৩০৫) ৱুত্তট্ঠানে ৱিয ইধাপি ‘‘যাৱকালিকেন, ভিক্খৱে, যাৱজীৱিকং পটিগ্গহিতং কালে কপ্পতী’’তি ৱদেয্য, তঞ্চাৱুত্তং. তস্মা পুৰেপটিগ্গহিতং তং আমিসসম্ভিন্নং আমিসগতিকমেৱাতি ৱেদিতব্বং. গণ্ঠিপদে পন ‘‘সন্নিধিকাৰকং খাদনীযং ৱা ভোজনীযং ৱা’’তি (পাচি. ২৫৩) ৱুত্তং. ব্যঞ্জনমত্তং ন গহেতব্বং.

৪৫৭. ইধাতি ইমস্মিং পাঠে. ‘‘‘কালে কপ্পতি, ৱিকালে ন কপ্পতী’তি (মহাৱ. ৩০৫) ৱুত্তৱচনমত্তেন ‘ৱিকালে কপ্পতী’তি ৱিকালভোজনপাচিত্তিযং আৱহং হোতীতি অত্থো, ‘ন কপ্পতী’তি সন্নিধিভোজনপাচিত্তিযং আৱহং হোতীতি অত্থো, যদি সম্ভিন্নৰসং অজ্জপটিগ্গহিতম্পি যাৱজীৱিকন্তি অত্থো’’তি লিখিতং. সুত্তৱিভঙ্গেতি মাতিকাসঙ্খাতে সুত্তে চ তস্স পদভাজনীযসঙ্খাতে ৱিভঙ্গে চাতি অত্থো. ইদং আগতমেৱ. কতৰন্তি? ‘‘অতিক্কামযতো ছেদনক’’ন্তি ইদং.

তিৱিদত্থিপমাণঞ্চে, অদসং তং নিসীদনং;

নিসীদনং কথং হোতি, সদসং তঞ্হি লক্খণং.

তিৱিদত্থিপমাণং তং, দসা তত্থ ৱিদত্থি চে;

তংনিসীদননামত্তা, তস্মিং ছেদনকং সিযা.

অনিসীদননামম্হি, কথং ছেদনকং ভৱে;

ইতি চে নেৱ ৱত্তব্বং, নিসীদনৱিদত্থিতো.

কপ্পতে সদসামত্তং, নিসীদনমিতি কাৰণং;

কথং যুজ্জতি নো চেতং, নিসীদনস্স নামকং.

নিসীদনন্তি ৱুত্তত্তা, পমাণসমতিক্কমা;

তস্সানুমতিহেতুত্তা, তত্থ ছেদনকং ভৱে.

জাতৰূপকপ্পে –

জাতৰূপং পটিক্খিত্তং, পুগ্গলস্সেৱ পাড়িযং;

ন সঙ্ঘস্সাতি সঙ্ঘস্স, তঞ্চে কপ্পতি সব্বসো.

ৱিকালভোজনঞ্চাপি, পুগ্গলস্সেৱ ৱাৰিতং;

ন সঙ্ঘস্সাতি সঙ্ঘস্স, কপ্পতীতি কথং সমং.

সত্তসতিকক্খন্ধকৱণ্ণনা নিট্ঠিতা.

চূড়ৱগ্গৱণ্ণনা নিট্ঠিতা.

নমো তস্স ভগৱতো অৰহতো সম্মাসম্বুদ্ধস্স