১১. পঞ্চসতিকক্খন্ধকৱণ্ণনা

সঙ্গীতিনিদানকথাৱণ্ণনা

৪৩৭. ছিন্নপাতন্তি ভাৱনপুংসকং, তেনাকাৰেন পতন্তীতি অত্থো. উপদ্দুতা চ মযং হোমাতি অতীতত্থে ৱত্তমানৱচনং, অহুম্হাতি অত্থো. অথ ৱা তস্মিং সতি হোম. ‘‘পঞ্চ ভিক্খুসতানী’’তি গণনৱসেন ৱত্ৱা ‘‘ৱস্সং ৱসন্তা’’তি পুগ্গলনিদ্দেসো কতো.

খুদ্দানুখুদ্দককথাৱণ্ণনা

৪৪৩. ‘‘ৱস্সিকসাটিকং অক্কমিত্ৱা’’তি ৱচনতো ভগৱতো চতুত্থচীৱৰম্পি অত্থীতি সিদ্ধং. তেনেৱাহ চীৱৰক্খন্ধকে ‘‘চতুত্থং চীৱৰং পাৰুপী’’তি.

৪৪৪. ‘‘অপিচ যথেৱ মযা’’তিআদি সঙ্গীতিযা অগ্গহণাধিপ্পাযৱসেন ৱুত্তং, কিন্তু সুসঙ্গীতা আৱুসো থেৰেহি ধম্মো চ ৱিনযো চ. অপিচাহং নাম তথেৱাহং ধাৰেস্সামীতি যথেৱ মযা ভগৱতো সম্মুখা সুতং সম্মুখা পটিগ্গহিতং, তথেৱ থেৰেহি ভগৱতা সযমেৱ এতদগ্গং আৰোপিতেহি, তস্মা সুসঙ্গহিতা সঙ্গীতীতি ৱুত্তং হোতি.

ব্ৰহ্মদণ্ডকথাৱণ্ণনা

৪৪৫. ‘‘ত্ৱংযেৱ আণাপেহী’’তি এত্তকমেৱ ৱুত্তং, থেৰা পন ব্ৰহ্মদণ্ডং কত্ৱা ৱুত্তংযেৱ ‘‘ছন্নস্সা’’তিআদিমাহংসূতি ৱেদিতব্বং. এত্থ চ আনন্দত্থেৰো ৱিয অঞ্ঞোপি সঙ্ঘেন আণত্তো ভিক্খু ব্ৰহ্মদণ্ডকতেন ভিক্খুনা আলপিতুং লভতি, ন অঞ্ঞো. উজ্জৱনিকাযাতি পটিসোতগামিনিযা. আগমা নু খো ইধ আগমা নু খ্ৱিধ. আগমা খো ইধ, তে ওৰোধা ইধ আগমা খো. ‘‘ভিসিচ্ছৱীতি ভিসিত্থৱিকা’’তি লিখিতং. সব্বেৱিমেতি সব্বমেৱ. কুলৱং গমেন্তীতি নিৰত্থকৱিনাসং গমেন্তি. কুচ্ছিতো লৱো কুলৱো, অনযৱিনাসোতি ৱুত্তং হোতি. ইমায খো পন ‘‘ধম্মৱিনযসঙ্গীতিযা’’তি ৱত্তব্বে ৱিসেসেন ৱিনযস্স সাসনমূলভাৱদস্সনত্থং, তস্মিং ঠিতে সকলসাসনঠিতিসিদ্ধিদীপনত্থঞ্চ ‘‘ইদং ৱো কপ্পতি, ইদং ৱো ন কপ্পতী’’তি ৱত্থুস্মিং আৰদ্ধত্তা, ইমিস্সা চ পৰিযত্তিযা ৱিনযপিটকত্তা ‘‘ৱিনযসঙ্গীতিযা’’তি ইধ ৱুত্তং.

পঞ্চসতিকক্খন্ধকৱণ্ণনা নিট্ঠিতা.