১০. ভিক্খুনিক্খন্ধকৱণ্ণনা

মহাপজাপতিগোতমীৱত্থুকথাৱণ্ণনা

৪০২-৩. সূনেহীতি সুতেহি. ‘‘সেতট্টিকা নাম ৰোগজাতী’’তি পাড়ি. ‘‘সেতট্ঠিকা’’তি অট্ঠকথা. ‘‘পটিসম্ভিদাপত্তখীণাসৱগ্গহণেন ঝানানিপি গহিতানেৱ হোন্তি. ন হি নিজ্ঝানিকানং সব্বপ্পকাৰা সম্পত্তি ইজ্ঝতী’’তি লিখিতং.

ভিক্খুনীউপসম্পদানুজাননকথাৱণ্ণনা

৪০৪. যদগ্গেন যং দিৱসং আদিং কত্ৱা. তদেৱাতি তস্মিং এৱ দিৱসে. ‘‘অনুঞত্তিযা’’তি পাঠো. ‘‘অনুপঞ্ঞত্তিযা’’তি ন সুন্দৰং.

৪০৫. ‘‘পটিগ্গণ্হামি যাৱজীৱং অনতিক্কমনীযো’’তি ৱত্ৱা ইদানি কিং কাৰণা ৱৰং যাচতীতি চে? পৰূপৱাদৱিৱজ্জনত্থং. দুব্বুদ্ধিনো হি কেচি ৱদেয্যুং ‘‘মহাপজাপতিযা পঠমং সম্পটিচ্ছিতত্তা উভতোসঙ্ঘস্স যথাৱুড্ঢঅভিৱাদনং ন জাতং. গোতমী চে ৱৰং যাচেয্য, ভগৱা অনুজানেয্যা’’তি.

৪০৮. ৱিমানেত্ৱাতি অপৰজ্ঝিত্ৱা.

৪১০-৩. কম্মপ্পত্তাযোপীতি কম্মাৰহাপি. আপত্তিগামিনিযোপীতি আপত্তিং আপন্নাযোপি. দ্ৱে তিস্সো ভিক্খুনিযোতি দ্ৱীহি তীহি ভিক্খুনীহি. ‘‘মনোসিলিকাযা’’তি পাঠো.

৪২০. ‘‘তেন চ ভিক্খু নিমন্তেতব্বো’’তি সামীচিৱসেন ৱুত্তং.

৪২২-৩. ‘‘অনুজানামি…পে… তাৱকালিক’’ন্তি পুগ্গলিকং সন্ধায ৱুত্তং, ন সঙ্ঘিকন্তি আচৰিযো. ‘‘অনুজানামি, ভিক্খৱে, উতুনিযা কটিসুত্তক’’ন্তি ৱচনতো ভিক্খুস্স ৱিনিবন্ধং কটিসুত্তকং ন ৱট্টতি. পগ্ঘৰন্তী ৱিসৱিণা. ৱেপুৰিসিকা মস্সুদাঠী.

৪২৫. তযো নিস্সযেতি ৰুক্খমূলঞ্হি সা ন লভতি.

৪২৬. ভত্তগ্গে সচে দাযকা ভিক্খুনিসঙ্ঘস্স ভুত্তৱতো চতুপচ্চযে দাতুকামা হোন্তি, যথাৱুড্ঢমেৱ.

৪২৭. ৱিকালেতি যাৱ ৱিকালে হোন্তি, তাৱ পৱাৰেসুন্তি অত্থো. অজ্জত্তনাতি অজ্জতনা.

৪২৮. অনুৱাদন্তি ইস্সৰিযট্ঠানং. ইদং সব্বং ‘‘অজ্জতগ্গে ওৱটো ভিক্খুনীনং ভিক্খূসু ৱচনপথো’’তি পঞ্ঞত্তস্স গৰুধম্মস্স ৱীতিক্কমআপত্তিপঞ্ঞাপনত্থং ৱুত্তন্তি ৱেদিতব্বং, অঞ্ঞথা যেসং গৰুধম্মানং পটিগ্গহণেন ভিক্খুনীনং উপসম্পদা অনুঞ্ঞাতা, তেসং ৱীতিক্কমে অনুপসম্পন্নাৱ সিযাতি আসঙ্কা ভৱেয্য.

৪২৯. ইত্থিযুত্তেনাতি ইত্থীহি গাৱীআদীহি ধুৰট্ঠানে যুত্তেন. পুৰিসন্তৰেনাতি পুৰিসেন অন্তৰিকেন. ‘‘পুৰিসদুতিযেনা’’তি লিখিতং, পুৰিসসাৰথিনাতি অধিপ্পাযো. ‘‘বাড়্হতৰং অফাসূ’’তি ৱচনতো গিলানায ৱট্টতিচ্চেৱ সিদ্ধং, ভগৱন্তং আপুচ্ছিত্ৱা অনুঞ্ঞাতট্ঠানে উপসম্পজ্জিস্সামীতি অধিপ্পাযো.

৪৩০. সা কেনচিদেৱ অন্তৰাযেনাতি সব্বন্তৰাযসঙ্গহনৱচনং, তস্মা তং ন অন্তৰাযং কিত্তেত্ৱা, ৱুত্তন্তৰাযেন ‘‘ৰাজন্তৰাযেনা’’তি সাধেতব্বন্তি আচৰিযো.

৪৩১-২. ‘‘নৱকম্মন্তি কত্ৱা ‘এত্তকানি ৱস্সানি ৱসতূ’তি অপলোকেত্ৱা সঙ্ঘিকভূমিদান’’ন্তি লিখিতং. ‘‘সাগাৰ’’ন্তি ৱুত্তত্তা অগাৰপটিসংযুত্তৰহোনিসজ্জসিক্খাদিৱজ্জিতাতি কেচি, যুত্তমেতং. কস্মা? ‘‘সহাগাৰসেয্যমত্তং ঠপেত্ৱা’’তি অট্ঠকথাযং ৱুত্তত্তা. ‘‘অনুজানামি, ভিক্খৱে, পোসেতু’’ন্তি ৱচনতো পোসনযুত্তকম্মং সব্বং ৱট্টতি মাতুযা, ন অঞ্ঞেসং. ৱসিতুং চে ন সক্কোতি দুতিযং ৱিনা, সম্মন্নিত্ৱাৱ দাতব্বা তায ইতি নো মতি. কিত্তকং কালং? ৱসিত্ৱা চে দুতিযা গন্তুমিচ্ছতি, অঞ্ঞং সম্মন্নিতুং যুত্তাৱ. সা ৱিজাতা লভেতি আচৰিযো.

৪৩৪. ‘‘ইদং ওদিস্স অনুঞ্ঞাতং ৱট্টতীতি একতো ৱা উভতো ৱা অৱস্সৱে সতিপি ৱট্টতী’’তি লিখিতং. ‘‘কেসচ্ছেদাদিকং কম্মং অনুজানামি সাদিতুং ’’ইচ্চেৱ ৱুত্তত্তা ৱুত্তং ‘‘তদঞ্ঞে সাদিতু’’ন্তি. ‘‘কেসচ্ছেদাদিকং কম্মং অনুজানামি, ভিক্খৱে’’তি অৱত্ৱা এত্তকং যস্মা ‘‘সাদিতু’’ন্তি ভাসিতং, তস্মা সা ৱিচিকিচ্ছায উভতোপি অৱস্সৱে অপি পাৰাজিকখেত্তেন সা পাৰাজিকং ফুসতি. ইতি অট্ঠকথাস্ৱেতং সব্বাসুপি ৱিনিচ্ছিতং. ওদিস্সকাভিলাপো হি অঞ্ঞথা নিব্বিসেসতো তং পমাণং. যদি তথা ভিক্খুস্স কপ্পতি ৱিচিকিচ্ছা.

কালমোদিস্স নং পদং, ন সত্তোদিস্সকঞ্হি তং;

অথ ভিক্খুনিযা এৱ, কালমোদিস্স ভাসিতং.

এৱং পাৰাজিকাপত্তি, সিথিলাৱ কতা সিযা;

সব্বসো পিহিতং দ্ৱাৰং, সব্বপাৰাজিকস্মিন্তি.

নিৰত্থকভাৱতো, উব্ভজাণুমণ্ডলে;

তস্মা ন সাদিযন্তীতি, নিদানৱচনক্কমং.

নিস্সায সত্থুনা ৱুত্তং, সাদিতুন্তি ন অঞ্ঞথা;

অত্তনো পণ্হিসম্ফস্সং, সাদিতুং যেন ৱাৰিতং.

অপি পাৰাজিকক্খেত্তে, কথং দ্ৱাৰং দদেয্য সো;

তথাপি বুদ্ধপুত্তানং, বুদ্ধভাসিতভাসিতং.

ৱচনঞ্চ সমানেন্তো, নো চেত্থ যুত্তিকথা ধীৰা;

কেসচ্ছেদাদিকম্মস্স, অৱস্সং কৰণীযতো.

চিত্তস্স চাতিলোলত্তা, গণস্স চ অঙ্গসম্পদা-

ভাৱা ভিক্খুনীনং মহেসিনা, ৰক্খিতুঞ্চ অসঙ্কত্তা;

ননু মোদিস্সকং কতন্তি.

ভিক্খুনিক্খন্ধকৱণ্ণনা নিট্ঠিতা.