৫. চম্মক্খন্ধকৱণ্ণনা

সোণকোড়িৱিসৱত্থুকথাৱণ্ণনা

২৪২. অসীতিযা …পে… কাৰেতীতি ‘‘অসীতি গামিকসহস্সানি সন্নিপাতাপেত্ৱা’’তি ইমস্স কাৰণৱচনং. তত্থ ‘‘গামানং অসীতিযা সহস্সেসূ’’তি ৱত্তব্বে ‘‘অসীতিযা গামসহস্সেসূ’’তি ৱুত্তং. গামপ্পমুখা গামিকা, তেসং সহস্সানি. ‘‘কম্মচিত্তীকতানী’’তি উপচাৰেন ৱুত্তং. কম্মপচ্চযউতুসমুট্ঠানে হি তেসং অঞ্জনৱণ্ণভাৱো. ‘‘কেনচিদেৱ কৰণীযেনা’’তি ৱত্তব্বে ‘‘কেনচিদেৱা’’তি ৱুত্তং. এত্থ এৱং-সদ্দো ওপম্মে পৱত্ততি. এৱমুপমানোপদেসপুচ্ছাৱধাৰণপটিঞ্ঞাতওপম্মে. পুৰতো পেক্খমানানন্তি অনাদৰত্থে সামিৱচনং. ততো পন ভগৱতো গন্ধকুটিযা কৱাটং সুবদ্ধং পস্সিত্ৱা ইচ্ছিতাকাৰকুসলতায ইদ্ধিযা গন্ত্ৱা কুটিং পৱিসিত্ৱা আৰোচেসি. ৱিহাৰপচ্ছাযাযন্তি ৱিহাৰস্স ৱড্ঢমানচ্ছাযাযং. ‘‘অহো নূনাতি অহো মহন্তো’’তি লিখিতং. ভগৱতো সম্বহুলেহি সদ্ধিং আহিণ্ডনং আযস্মতো সোণস্স ৱীৰিযাৰম্ভনিদস্সনেন অনাৰদ্ধৱীৰিযানং উত্তেজনত্থং, এৱং সুখুমালানং পাদৰক্খণত্থং উপাহনা অনুঞ্ঞাতাতি দস্সনত্থঞ্চ.

সোণস্সপব্বজ্জাকথাৱণ্ণনা

২৪৩. তত্থ চ নিমিত্তং গণ্হাহীতি তেসং ইন্দ্ৰিযানং আকাৰং উপলক্খেহি.

২৪৪. অধিমুত্তো হোতীতি পটিৱিজ্ঝিত্ৱা পচ্চক্খং কত্ৱা ঠিতো হোতি. নেক্খম্মাধিমুত্তোতিআদীহি নিব্বানং, অৰহত্তঞ্চ ৱুত্তং. ‘‘তঞ্হি সব্বকিলেসেহি নিক্খন্তত্তা ‘নেক্খম্ম’ন্তি চ গেহতো পৱিৱিত্তত্তা ‘পৱিৱেকো’তি চ ব্যাপজ্জাভাৱতো ‘অব্যাপজ্জ’ন্তি চ অৰহত্তং উপাদানস্স খযন্তে উপ্পন্নত্তা ‘উপাদানক্খযো’তি চ তণ্হায খযন্তে উপ্পন্নত্তা ‘তণ্হক্খযো’তি চ সম্মোহাভাৱতো ‘অসম্মোহো’তি চ ৱুচ্চতী’’তি ৱুত্তং. সব্বেহি অৰহত্তং ৱুত্তন্তি কেচি. সিযা খো এৱমস্সাতি কদাচি এৱমস্স, অস্স ৱা আযস্মতো এৱং সিযা. পচ্চাগচ্ছন্তো জানন্তো. কৰণীযমত্তানন্তি অত্তনো. সো এৱ ৱা পাঠো. নেক্খম্মাধিমুত্তোতি ইমস্মিংযেৱ অৰহত্তং কথিতং. সেসেসু নিব্বানন্তি কেচি. অসম্মোহাধিমুত্তোতি এত্থেৱ নিব্বানং. সেসেসু অৰহত্তন্তি কেচি. ‘‘সব্বেস্ৱেৱেতেসু উভযম্পী’’তি ৱদন্তি. পৱিৱেকঞ্চ চেতসো, অধিমুত্তস্স, উপাদানক্খযস্স চাতি উপযোগত্থে সামিৱচনং. আযতনানং উপ্পাদঞ্চ ৱযঞ্চ দিস্ৱা.

সব্বনীলিকাদিপটিক্খেপকথাৱণ্ণনা

২৪৬. ‘‘ৰঞ্জনচোড়কেন পুঞ্ছিত্ৱা’’তি পাঠো. ‘‘খল্লকাদীনি অপনেত্ৱা’তি ৱুত্তত্তা দ্ৱে তীণি ছিদ্দানি কত্ৱা ৱড়ঞ্জেতুং ৱট্টতী’’তি ৱদন্তানং ৱাদো ন গহেতব্বো.

যানাদিপটিক্খেপকথাৱণ্ণনা

২৫৪. ‘‘চতুৰঙ্গুলাধিকানী’’তি ৱুত্তত্তা চতুৰঙ্গুলতো হেট্ঠা ৱট্টতীতি একে. উভতোলোহিতকূপধানন্তি এত্থ ‘‘কাসাৱং পন ৱট্টতি, কুসুম্ভাদিৰত্তমেৱ ন ৱট্টতী’’তি লিখিতং.

সব্বচম্মপটিক্খেপাদিকথাৱণ্ণনা

২৫৫. কিস্স ত্যাযন্তি কিস্স তে অযং.

২৫৬. গিহিৱিকতন্তি গিহীনং অত্থায কতং. ‘‘যত্থ কত্থচি নিসীদিতুং অনুজানামীতি অত্থো’’তি লিখিতং. কিঞ্চাপি দীঘনিকাযট্ঠকথাযং ‘‘ঠপেত্ৱা তূলিকং সব্বানেৱ গোনকাদীনি ৰতনপৰিসিব্বিতানি ৱট্টন্তী’’তি ৱুত্তং, অথ খো ৱিনযপৰিযাযং পত্ৱা গৰুকে ঠাতব্বতো ইধ ৱুত্তনযেনেৱেত্থ অত্থো গহেতব্বো. ‘‘তত্থ পন সুত্তন্তিকদেসনায গহট্ঠাদীনম্পি ৱসেন ৱুত্তত্তা তেসং সঙ্গণ্হনত্থং ঠপেত্ৱা ‘তূলিকং…পে… ৱট্টন্তী’তি ৱুত্তং ৱিয খাযতীতি অপৰে’’তি ৱুত্তং.

২৫৯. মিগমাতুকোতি তস্স নামং. ৱাতমিগোতি চ তস্স নামং. ‘‘কাড়সীহো কাড়মুখো কপী’’তি লিখিতং. চম্মং ন ৱট্টতীতি যেন পৰিযাযেন চম্মং ৱট্টিস্সতি, সো পৰতো আৱি ভৱিস্সতি. ‘‘অত্তনো পুগ্গলিকৱসেন পৰিহাৰো পটিক্খিত্তো’’তি ৱুত্তং. ‘‘ন, ভিক্খৱে, কিঞ্চি চম্মং ধাৰেতব্ব’’ন্তি এত্তাৱতা সিদ্ধে ‘‘ন, ভিক্খৱে, গোচম্ম’’ন্তি ইদং পৰতো ‘‘অনুজানামি, ভিক্খৱে, সব্বপচ্চন্তিমেসু জনপদেসু চম্মানি অত্থৰণানী’’তি এত্থ অনুমতিপ্পসঙ্গভযা ৱুত্তন্তি ৱেদিতব্বং.

চম্মক্খন্ধকৱণ্ণনা নিট্ঠিতা.