৪. পৱাৰণাক্খন্ধকৱণ্ণনা

অফাসুকৱিহাৰকথাৱণ্ণনা

২১০. ‘‘সঙ্ঘং আৱুসো পৱাৰেমী’’তি ৱুত্তত্তা পচ্ছাপি ‘‘ৱদতু মং সঙ্ঘো’’তি ৱত্তব্বং ৱিয দিস্সতি. অযং পনেত্থ অধিপ্পাযো – যস্মা অহং সঙ্ঘং পৱাৰেমি, তস্মা তত্থ পৰিযাপন্না থেৰা, মজ্ঝিমা, নৱা ৱা অৱিসেসেনাযস্মন্তো সব্বেপি মং ৱদন্তূতি.

পৱাৰণাভেদৱণ্ণনা

২১২. দ্ৱেমা, ভিক্খৱে, পৱাৰণাতি এত্থ তাদিসে কিচ্চে সতি যত্থ কত্থচি পৱাৰেতুং ৱট্টতি. তেনেৱ মহাৱিহাৰে ভিক্খূ চাতুদ্দসিযং পৱাৰেত্ৱা পন্নৰসিযং কাযসামগ্গিং ইদানিপি দেন্তি. চেতিযগিৰি মহাদস্সনত্থম্পি অট্ঠমিযং গচ্ছন্তি, তম্পি চাতুদ্দসিযং পৱাৰেতুকামানংযেৱ হোতি. ‘‘সত্তাহং অনাগতায পৱাৰণায সকৰণীযো পক্কমতি, অনাপত্তীতি ৱচনতো ইদং আচিণ্ণ’’ন্তি লিখিতং. ‘‘নো চে অধিট্ঠহেয্য, আপত্তি দুক্কটস্সা’’তি একস্স ৱুত্তদুক্কটং, তস্সেৱ ৱুত্তং পুব্বকিচ্চঞ্চ সঙ্ঘগণানম্পি নেতব্বং.

পৱাৰণাদানানুজাননকথাৱণ্ণনা

২১৩. তেন চ ভিক্খুনাতি পৱাৰণাদাযকেন.

অনাপত্তিপন্নৰসকাদিকথাৱণ্ণনা

‘‘তস্সা চ পৱাৰণায আৰোচিতায সঙ্ঘেন চ পৱাৰিতে সব্বেসং সুপ্পৱাৰিতং হোতীতি ৱচনতো কেৱলং পৱাৰণায পৱাৰণাদাযকোপি পৱাৰিতোৱ হোতী’’তি ৱদন্তীতি.

২২২. অৱুট্ঠিতায পৰিসাযাতি পৱাৰেত্ৱা পচ্ছা অঞ্ঞমঞ্ঞং কথেন্তিযা. একচ্চায ৱুট্ঠিতাযাতি একচ্চেসু যথানিসিন্নেসু একচ্চেসু সকসকট্ঠানং গতেসু. পুন পৱাৰেতব্বন্তি পুনপি সব্বেহি সমাগন্ত্ৱা পৱাৰেতব্বং. আগচ্ছন্তি সমসমা, তেসং সন্তিকে পৱাৰেতব্বন্তি ‘‘গতে অনানেত্ৱা নিসিন্নানংযেৱ সন্তিকে পৱাৰেতব্বং, উপোসথক্খন্ধকেপি এসেৱ নযো’’তি লিখিতং. সব্বায ৱুট্ঠিতায পৰিসায আগচ্ছন্তি সমসমা, তেসং সন্তিকে পৱাৰেতব্বন্তি ‘‘যদি সব্বে ৱুট্ঠহিত্ৱা গতা, সন্নিপাতেতুঞ্চ ন সক্কা, একচ্চে সন্নিপাতাপেত্ৱা পৱাৰেতুং ৱট্টতী’’তি ৱদন্তি. কস্মা? ঞত্তিং ঠপেত্ৱা কত্তব্বসঙ্ঘকম্মাভাৱা ৱগ্গং ন হোতি কিৰ. এত্থ পন একচ্চেসু গতেসুপি সব্বেসু গতেসুপি সব্বে সন্নিপাতাপেত্ৱা ঞত্তিং অট্ঠপেত্ৱা কেৱলং পৱাৰেতব্বং. একচ্চে সন্নিপাতাপেত্ৱা পৱাৰেতুং ন ৱট্টতি ‘‘সঙ্ঘং, ভন্তে, পৱাৰেমী’’তি ৱচনতো. সব্বেপি হি সন্নিপতিতা পচ্ছা দিট্ঠং ৱা সুতং ৱা পৰিসঙ্কিতং ৱা ৱত্তাৰো হোন্তি. অনাগতানং অত্থিভাৱং ঞত্ৱাপি একচ্চানং সন্তিকে পৱাৰণাৱচনং ৱিয হোতি. সম্মুখীভূতে চত্তাৰো সন্নিপাতাপেত্ৱা নিস্সগ্গিযং আপন্নচীৱৰাদিনিস্সজ্জনং ৱিয পৱাৰণা ন হোতি সব্বাযত্তত্তা. ‘‘সমগ্গানং পৱাৰণা পঞ্ঞত্তা’’তি ৱচনঞ্চেত্থ সাধকং. ‘‘ইতো অঞ্ঞথা ন ৱট্টতি অট্ঠকথাযং অননুঞ্ঞাতত্তা’’তি উপতিস্সত্থেৰো ৱদতি. ‘‘থোকতৰেহি তেসং সন্তিকে পৱাৰেতব্বং ঞত্তিং অট্ঠপেত্ৱাৱা’’তি ৱুত্তং. আগন্তুকা নাম নৱমিতো পট্ঠাযাগতা ৱা ৱজসত্থনাৱাসু ৱুত্থৱস্সা ৱা হোন্তি.

২৩৭. ‘‘দসৱত্থুকা মিচ্ছাদিট্ঠি হোতি তথাগতোতিআদী’’তি লিখিতং. ‘‘নত্থি দিন্নন্তিআদী’’তি ৱুত্তং.

২৩৯. ‘‘উপপৰিক্খিত্ৱা জানিস্সামাতি তেন সহ পৱাৰেতব্ব’’ন্তি লিখিতং.

পৱাৰণাক্খন্ধকৱণ্ণনা নিট্ঠিতা.