১০. কোসম্বকক্খন্ধকৱণ্ণনা

কোসম্বকৱিৱাদকথাৱণ্ণনা

৪৫১. সুত্তন্তিকোতি এত্থ কিঞ্চাপি ‘‘ৱিনযধৰো মাতিকাধৰো’’তি ৱুত্তং, উভতোৱিভঙ্গং পন সন্ধায ৱুত্তং, ন খন্ধকভাণকো হোতি. আৱুসো এত্থ আপত্তীতি ৱচনং উপাদায ‘‘সো তস্সা আপত্তিযা আপত্তিদিট্ঠি হোতী’’তি ৱুচ্চতি. পচ্ছা ৱিনযধৰো ‘‘ৱত্থুম্হি সতি পমাণং, ন পঞ্ঞত্তিয’’ন্তি সতিং পটিলভিত্ৱা তস্সা আপত্তিযা আপত্তিদিট্ঠি অহোসি, তেন ৱুত্তং অন্তে ‘‘অঞ্ঞে ভিক্খূ তস্সা আপত্তিযা আপত্তিদিট্ঠিনো হোন্তী’’তি.

৪৫৫. ‘‘যথা মযা ঞত্তী’’তি লিখন্তি ‘‘পঞ্ঞত্তা’’তি একৱচনত্তা.

দীঘাৱুৱত্থুকথাৱণ্ণনা

৪৫৮. ‘‘ভূতপুব্বং, ভিক্খৱে, বাৰাণসিযং ব্ৰহ্মদত্তো’’তি লিখন্তি. পুৰাণপোত্থকেসু ‘‘বাৰাণসিয’’ন্তি নত্থি, ‘‘নত্থিভাৱোৱ সুন্দৰো’’তি ৱদন্তি.

পালিলেয্যকগমনকথাৱণ্ণনা

৪৬৭. ৰক্খিতৱনসণ্ডেতি সঙ্গীতিত্থেৰেহি সুৱিঞ্ঞেয্যং কত্ৱা ৱুত্তং. ‘‘পালিলেয্যোতি গামো, তস্স ৱসেনা’’তিপি ৱদন্তি, তং ধম্মপদট্ঠকথায ন ৱিৰুজ্ঝতি.

অট্ঠাৰসৱত্থুকথাৱণ্ণনা

৪৭৩. ন ত্ৱেৱ…পে… পটিবাহিতব্বন্তি ৱদামীতি এত্থ সেনাসনাৰহস্স যো সেনাসনং পটিবাহতি, তস্সেৱ আপত্তি দুক্কটস্স. ‘‘কলহকাৰকাদীনমেত্থ ওকাসো নত্থীতিআদিকং সঙ্ঘস্স কতিকং ৱত্ৱা তং ন পঞ্ঞাপেন্তস্স ৱা ‘অহং বুদ্ধো’তি পসয্হ অত্তনা অত্তনো পঞ্ঞাপেত্ৱা গণ্হন্তং ‘যুত্তিযা গণ্হথা’তি ৱত্ৱা ৱাৰেন্তস্স ৱা দোসো নত্থি. ইধ কলহৱূপসমনত্থং আগতানং কোসম্বিকানম্পি ‘যথাৱুড্ঢ’ন্তি অৱত্ৱা ‘ৱিৱিত্তে অসতি ৱিৱিত্তং কত্ৱাপি দাতব্ব’ন্তি ৱুত্তত্তা ৱিৱিত্তং কত্ৱা দেন্তং পটিবাহেন্তস্সেৱ আপত্তীতি কিৰ অযমত্থো পাৰিৱাসিকাদীনং ৱিহাৰপৰিযন্তদাপনেন সাধিতব্বো’’তি লিখিতং.

সঙ্ঘসামগ্গীকথাৱণ্ণনা

৪৭৫. ‘‘অথ খো তে উক্খিত্তানুৱত্তকা ভিক্খূ তং উক্খিত্তকং ভিক্খুং ওসাৰেত্ৱা যেন উক্খেপকা ভিক্খূ…পে… তস্স ৱত্থুস্স ৱূপসমায সঙ্ঘসামগ্গিং কৰোমা’’তি ৱচনং দুৱিঞ্ঞেয্যৱিনিচ্ছযং ৱিনযলক্খণকুসলস্স. ৱিজ্জমানে হি কাৰকসঙ্ঘে ইতৰো সঙ্ঘো ওসাৰিতুং ন লভতি. ওসাৰেন্তো চে, তে ভিক্খূ কাৰকসঙ্ঘেন সমানলদ্ধিকভাৱং পত্তত্তা তেন সমানসংৱাসকা হোন্তি, ততো উক্খেপকানং ছন্দং অগ্গহেত্ৱা ওসাৰেন্তানং কম্মং কুপ্পতি, তস্মা ‘‘তেন হি, ভিক্খৱে, তং ভিক্খুং ওসাৰেথা’’তি (মহাৱ. ৪৭৪) ভগৱতো ৱচনেন উক্খিত্তানুৱত্তকা ওসাৰেসুং, উদাহু নিস্সীমং গন্ত্ৱা, উদাহু ইতৰেসং ছন্দং গহেত্ৱা ওসাৰেসুং, ননু এতেসমঞ্ঞতৰেনেত্থ ভৱিতব্বং, ন চ পনেতং সব্বগণ্ঠিপদেসু ৱিচাৰিতং. অযং পনেত্থ তক্কো –

‘‘যস্মিং ৱত্থুস্মিং সঙ্ঘেন, কতকম্মস্স ভিক্খুনো;

সতি তস্মিং ন অঞ্ঞস্স, পটিপ্পস্সম্ভনং খমং.

‘‘ৱিৰমন্তে ততো দোসো, অপি সঙ্ঘো অকাৰকো;

ওসাৰেতুং অলং যস্মা, কাৰকো অনুলোমিকো’’তি.

৪৭৭. ‘‘অট্ঠ দূতঙ্গানি নাম সোতা চ হোতি, সাৱেতা চ উগ্গহেতা চ ধাৰেতা চ ৱিঞ্ঞাতা চ ৱিঞ্ঞাপেতা চ কুসলো চ সহিতাসহিতদস্সনো চ অকলহকাৰকো চাতি এতানী’’তি ৱুত্তং.

কোসম্বকক্খন্ধকৱণ্ণনা নিট্ঠিতা.

মহাৱগ্গস্স লীনত্থপকাসনা নিট্ঠিতা.

নমো তস্স ভগৱতো অৰহতো সম্মাসম্বুদ্ধস্স