১. পঠমঅনিযতসিক্খাপদৱণ্ণনা

৪৪৪-৫. উদ্দেসন্তি উদ্দিসনং, আসাড়্হিনক্খত্তং নাম ৱস্সূপগমপূজা. সোতস্স ৰহোতি এত্থ ৰহো-ৱচনসামঞ্ঞতো ৱুত্তং দুট্ঠুল্লসামঞ্ঞতো দুট্ঠুল্লাৰোচনপ্পটিচ্ছাদনসিক্খাপদেসু পাৰাজিকৱচনং ৱিয. তস্মা ‘‘চক্খুস্স ৰহেনেৱ পন পৰিচ্ছেদো কাতব্বো’’তি ৱুত্তং. কথং পঞ্ঞাযতীতি চে? ‘‘মাতুগামো নাম তদহুজাতাপি দাৰিকা’’তি ৱচনতো, ‘‘অলংকম্মনিযেতি সক্কা হোতি মেথুনং ধম্মং পটিসেৱিতু’’ন্তি ৱচনতো চ ৰহোনিসজ্জস্সাদো চেত্থ মেথুনসন্নিস্সিতকিলেসো, ন দুতিযে ৱিয দুট্ঠুল্লৱাচস্সাদকিলেসো, তস্মা চ পঞ্ঞাযতি ‘‘সোতস্স ৰহো নাধিপ্পেতো’’তি. কেচি পন ‘‘তঞ্চ লব্ভতীতি ৱচনস্স দস্সনত্থং ৱুত্তং, তেন দুতিযে ৱুত্তা ৱিঞ্ঞূ পটিবলা গহিতা হোতী’’তি ৱদন্তি. যেন ৱা সাতি এত্থ ৱা-সদ্দো ‘‘তেন সো ভিক্খু কাৰেতব্বো ৱা’’তি যোজেতব্বো, সো চ ৱিকপ্পত্থো, তস্মা কাৰেতব্বো ৱা পটিজানমানো, ন ৱা কাৰেতব্বো অপ্পটিজানমানোতি অত্থো. তেন ৱুত্তং অট্ঠকথাযং ‘‘পটিজানমানোৱ তেন সো ভিক্খু কাৰেতব্বো…পে… ন কাৰেতব্বো’’তি. তস্মা এৱ পাড়িযং তদত্থদ্ৱযদস্সনত্থং ‘‘সা চে এৱং ৱদেয্যা’’তিআদি ৱুত্তং. ‘‘সদ্ধেয্যৱচসা’’তি ইমিনা সোতাপন্না অত্থভঞ্জনকং ন ভণন্তি, সেসং ভণন্তীতি ৱাদীনং ৱাদো পটিসেধিতো হোতি. ‘‘দিট্ঠ’’ন্তি ৱুত্তত্তা ‘‘ওলোকেসী’’তি সুন্দৰং. ৰক্খেয্যাসীতি মম ৱিসেসং কস্সচি নাৰোচেয্যাসীতি অধিপ্পাযো.

৪৪৬. ‘‘সা চে এৱং ৱদেয্য ‘অয্যস্স মযা সুতং নিসিন্নস্স মাতুগামং দুট্ঠুল্লাহি ৱাচাহি ওভাসেন্তস্সা’’’তি, ইদং কিমত্থমেত্থ ৱুত্তং, ন অধিপ্পেতঞ্হেতং ইধ সোতস্স ৰহো নাধিপ্পেতোতি কত্ৱাতি চে? অলংকম্মনিযট্ঠানে দুট্ঠুল্লৱাচাপি লব্ভতি, ন পন নালংকম্মনিযট্ঠানে মেথুনন্তি দস্সনত্থং ৱুত্তন্তি ৱেদিতব্বন্তি. যথা এতং, তথা ‘‘সা চে এৱং ৱদেয্য ‘অয্যস্স মযা সুতং মাতুগামস্স সন্তিকে অত্তকামপাৰিচৰিযায ৱণ্ণং ভাসন্তস্সা’’’তি এতম্পি ইধ লব্ভতি, ন দুতিযে নালংকম্মনিযট্ঠানত্তাতি একে. কঙ্খাৱিতৰণিযং (কঙ্খা. অট্ঠ. দুতিযানিযতসিক্খাপদৱণ্ণনা) ইধাপি দুতিযানিযতাধিকাৰে পাৰাজিকাপত্তিঞ্চ পৰিহাপেত্ৱা দুট্ঠুল্লৱাচাপত্তিযা ৱুত্তত্তা পঠমানিযতে দুট্ঠুল্লৱাচাপত্তি ন ৱুত্তাতি চে? ‘‘সা চে’’তি তস্সা পাড়িযা পোত্থকা সোধেতব্বা. গণ্ঠিপদে চ ‘‘ইধ সিক্খাপদে মেথুনকাযসংসগ্গৰহোনিসজ্জানমেৱাগতত্তা চক্খুস্সৰহোৱ পমাণ’’ন্তি লিখিতং, দুতিযানিযতাধিকাৰে চ ‘‘অনন্ধো কাযসংসগ্গং পস্সতি, অবধিৰো দুট্ঠুল্লং সুণাতি, কাযচিত্ততো কাযসংসগ্গো, ৱাচাচিত্ততো দুট্ঠুল্লং, উভযেহি উভয’’ন্তি চ লিখিতং. অট্ঠকথাযং ‘‘সমুট্ঠানাদীনি পঠমপাৰাজিকসদিসানেৱা’’তি ৱুত্তত্তাপি দুট্ঠুল্লৱাদো ন সুন্দৰো ‘‘তদহুজাতা’’তি ৱুত্তত্তাতি.

পঠমঅনিযতসিক্খাপদৱণ্ণনা নিট্ঠিতা.