৫. সঞ্চৰিত্তসিক্খাপদৱণ্ণনা

২৯৭. অহম্হি দুগ্গতাতি অহং অম্হি দুগ্গতা. অহং খ্ৱয্যোতি এত্থ অয্যোতি বহুৱচনং হোতি.

২৯৮. ওযাচন্তীতি নীচং কত্ৱা দেৱে যাচন্তি. আযাচন্তীতি উচ্চং কত্ৱা আদৰেন যাচন্তি. অলঙ্কাৰাদীহি মণ্ডিতো কেসসংৱিধানাদীহি পসাধিতো. ‘‘মণ্ডিতকৰণে দুক্কট’’ন্তি ৱদন্তি.

পদভাজনীযৱণ্ণনা

৩০৩. সহ পৰিদণ্ডেন ৱত্তমানাতি অত্থো. ছন্দৱাসিনী নাম ‘‘পিযা পিযং ৱসেতী’’তি পাড়ি, পুৰিসং ৱাসেতীতি অধিপ্পাযো. ‘‘পিযো পিযং ৱাসেতী’’তি অট্ঠকথা.

তং কিৰিযং সম্পাদেস্সতীতি অৱস্সং আৰোচেন্তিযা চে আৰোচেতীতি অত্থো. দ্ৱিন্নং মাতাপিতূনং চে আৰোচেতি, সঙ্ঘাদিসেসোতি ৱিনযৱিনিচ্ছযে ‘‘ৱত্থু ওলোকেতব্ব’’ন্তি ৱুত্তং. ৱত্থুম্হি চ ‘‘উদাযিত্থেৰো গণিকায আৰোচেসী’’তি ৱুত্তং. তং ‘‘মাতাদীনম্পি ৱদতো ৱিসঙ্কেতো নত্থী’’তি অট্ঠকথাৱচনতো নিপ্পযোজনং. তং পনেতন্তি আচৰিযস্স ৱচনং. মাতুৰক্খিতং ব্ৰূহীতি পেসিতস্স গন্ত্ৱা মাতাপিতুৰক্খিতং ৱদতো তস্স তস্সা মাতুৰক্খিতভাৱেপি সতি ৱিসঙ্কেতমেৱ, কস্মা? ‘‘পিতুৰক্খিতাদীসু অঞ্ঞতৰং ৱদন্তস্স ৱিসঙ্কেত’’ন্তি ৱুত্তত্তা ইতৰথা আদি-সদ্দো নিৰত্থকো সিযা. একং দসকং ইতৰেন দসকেন যোজেত্ৱা পুব্বে সুক্কৱিস্সট্ঠিযং ৱুত্তনযত্তা মাতুৰক্খিতায মাতা অত্তনো ধীতুসন্তিকং পহিণতীতি গহেতব্বং.

৩৩৮. অনভিনন্দিত্ৱাতি ৱচনমত্তমেৱ, যদিপি অভিনন্দতি, যাৱ সাসনং নাৰোচেতি, তাৱ ‘‘ৱীমংসিতো’’তি ন ৱুচ্চতি. সাসনাৰোচনকালেতি আণাপকস্স সাসনৱচনক্খণে. ততিযপদে ৱুত্তনযেনাতি একঙ্গসম্পত্তিযা দুক্কটন্তি অত্থো. ৱত্থুগণনায সঙ্ঘাদিসেসোতি উভযৱত্থুগণনায কিৰ.

৩৩৯. চতুত্থে অনাপত্তীতি এত্থ পন ‘‘পটিগ্গণ্হাতি ন ৱীমংসতি ন পচ্চাহৰতি, অনাপত্তীতি এত্থ ৱিয ‘গচ্ছন্তো ন সম্পাদেতি, আগচ্ছন্তো ৱিসংৱাদেতী’তি অনাপত্তিপাড়িযাপি ভৱিতব্বন্তি দস্সনত্থং ৱুত্ত’’ন্তি ৱদন্তি, একচ্চেসু পোত্থকেসু ‘‘অত্থী’’তিপি.

ৱিনীতৱত্থুৱণ্ণনা

৩৪১. অলংৱচনীযাতি ন ৱচনীযা, নিৱাৰণে অলং-সদ্দো. থেৰপিতা ৱদতীতি জিণ্ণপিতা ৱদতীতি অত্থো. কিঞ্চাপি এত্থ ‘‘ইত্থী নাম মনুস্সিত্থী ন যক্খী ন পেতী ন তিৰচ্ছানগতা, পুৰিসো নাম মনুস্সপুৰিসো ন যক্খো’’তিআদি নত্থি, তথাপি কাযসংসগ্গাদীসু ‘‘মনুস্সিত্থী’’তি ইত্থীৱৱত্থানস্স কতত্তা ইধাপি মনুস্সিত্থী এৱাতি পঞ্ঞাযতি. মেথুনপুব্বভাগত্তা মনুস্সউভতোব্যঞ্জনকো চ থুল্লচ্চযৱত্থুকোৱ হোতি, সেসা মনুস্সপণ্ডকউভতোব্যঞ্জনকতিৰচ্ছানগতপুৰিসাদযো দুক্কটৱত্থুকাৱ মিচ্ছাচাৰসাসনঙ্গসম্ভৱতোতি ৱেদিতব্বং. যথাসম্ভৱং পন ৱাৰা উদ্ধৰিতব্বা. পঞ্ঞত্তিঅজাননে ৱিয অলংৱচনীযভাৱাজাননেপি অচিত্তকতা ৱেদিতব্বা. দুট্ঠুল্লাদীসুপীতি ‘‘ইমস্মিম্পী’’তি ৱুত্তমেৱ হোতি. ‘‘লেখং নেত্ৱা পটিলেখং আৰোচিতস্সাপি সঞ্চৰিত্তং নত্থি সঞ্চৰিত্তভাৱমজানন্তস্সা’’তি ৱদন্তি, ৱীমংসিত্ৱা গহেতব্বং.

সঞ্চৰিত্তসিক্খাপদৱণ্ণনা নিট্ঠিতা.