৪. অত্তকামপাৰিচৰিযসিক্খাপদৱণ্ণনা

২৯০. চতুত্থে তযো সঙ্ঘাদিসেসৱাৰা আগতা, সেসা সত্তপঞ্ঞাস ৱাৰা থুল্লচ্চযদুক্কটাপত্তিকায সংখিত্তাতি ৱেদিতব্বা, ততো অঞ্ঞতৰো অসম্ভৱতো ইধ ন উদ্ধটো. সেসযোজনক্কমো ৱুত্তনযেন ৱেদিতব্বো. নগৰপৰিক্খাৰেহীতি পাকাৰপৰিখাদীহি নগৰপৰিৱাৰেহি. সেতপৰিক্খাৰোতি সেতালঙ্কাৰো, সীলালঙ্কাৰোতি অত্থো (সং. নি. অট্ঠ. ৩.৫.৪). চক্কৱীৰিযোতি ৱীৰিযচক্কো. ৱসলং দুগ্গন্ধন্তি নিমিত্তং সন্ধাযাহ, তদেৱ সন্ধায ‘‘কিং মে পাপকং, কিং মে দুগ্গন্ধ’’ন্তি ৱুত্তং.

২৯১. সন্তিকেতি যত্থ ঠিতো ৱিঞ্ঞাপেতি. ‘‘পঠমৱিগ্গহে সচে পাড়িৱসেন যোজেতীতি কামহেতুপাৰিচৰিযাঅত্থো. সেসন্তি ‘অধিপ্পাযো’তি পদং ব্যঞ্জনং অত্থাভাৱতো. দুতিযে পাড়িৱসেন কামহেতু-পদানি ব্যঞ্জনানি তেসং তত্থ অত্থাভাৱতো. এৱং চত্তাৰি পদানি দ্ৱিন্নং ৱিগ্গহানং ৱসেন যোজিতানীতি অপৰে ৱদন্তী’’তি ৱুত্তং.

২৯৫. এতেসু সিক্খাপদেসু মেথুনৰাগেন ৱীতিক্কমে সতি সঙ্ঘাদিসেসেন অনাপত্তি. তস্মা ‘‘কিং ভন্তে অগ্গদানন্তি. মেথুনধম্ম’’ন্তি ইদং কেৱলং মেথুনধম্মস্স ৱণ্ণভণনত্থং ৱুত্তং, ন মেথুনধম্মাধিপ্পাযেন তদত্থিযা ৱুত্তন্তি ৱেদিতব্বং, পৰস্স ভিক্খুনো কামপাৰিচৰিযায ৱণ্ণভণনে দুক্কটং. ‘‘যো তে ৱিহাৰে ৱসতি, তস্স অগ্গদানং দেহী’’তি পৰিযাযৱচনেনপি দুক্কটং. ‘‘অত্তকামপাৰিচৰিযায ৱণ্ণং ভাসেয্য. যা মাদিসং সীলৱন্ত’’ন্তি চ ৱুত্তত্তাতি একে. পঞ্চসু অঙ্গেসু সব্ভাৱা সঙ্ঘাদিসেসোৱাতি একে. ৱিচাৰেত্ৱা গহেতব্বং. গণ্ঠিপদে পন ‘‘ইমস্মিং সিক্খাপদদ্ৱযে কাযসংসগ্গে ৱিয যক্খিপেতীসু দুট্ঠুল্লত্তকামৱচনে থুল্লচ্চয’ন্তি ৱদন্তি. অট্ঠকথাসু পন নাগত’’ন্তি লিখিতং. ‘‘উভতোব্যঞ্জনকো পন পণ্ডকগতিকোৱা’’তি ৱদন্তি.

অত্তকামপাৰিচৰিযসিক্খাপদৱণ্ণনা নিট্ঠিতা.