৩. দুট্ঠুল্লৱাচাসিক্খাপদৱণ্ণনা

২৮৩. ততিযে তযো সঙ্ঘাদিসেসৱাৰা তযো থুল্লচ্চযৱাৰা তযো দুক্কটৱাৰা তযো কাযপটিবদ্ধৱাৰাতি দ্ৱাদস ৱাৰা সৰূপেন আগতা. তত্থ তযো সঙ্ঘাদিসেসৱাৰা দুতিযসিক্খাপদে ৱুত্তাতি তিণ্ণং ৱীসতিকানং একেকমূলা ৱাৰাতি ৱেদিতব্বা, তস্মা ইধ ৱিসেসাতি পণ্ণাস ৱাৰা সংখিত্তা হোন্তি, অঞ্ঞথা ইত্থী চ হোতি ৱেমতিকো সাৰত্তো চ, ভিক্খু চ নং ইত্থিযা ৱচ্চমগ্গং পস্সাৱমগ্গং আদিস্স ৱণ্ণম্পি ভণতি…পে… আপত্তি থুল্লচ্চযস্স. ইত্থী চ হোতি পণ্ডকপুৰিসসঞ্ঞী তিৰচ্ছানগতসঞ্ঞী সাৰত্তো চ, ভিক্খু চ নং ইত্থিযা ৱচ্চমগ্গং পস্সাৱমগ্গং আদিস্স ৱণ্ণম্পি ভণতি অক্কোসতিপি, আপত্তি থুল্লচ্চযস্স. পণ্ডকো চ হোতি পণ্ডকসঞ্ঞী সাৰত্তো চ, ভিক্খু চ নং পণ্ডকস্স ৱচ্চমগ্গং আদিস্স ৱণ্ণম্পি ভণতি, আপত্তি থুল্লচ্চযস্সাতি এৱমাদীনং আপত্তিট্ঠানানং অনাপত্তিট্ঠানতা আপজ্জেয্য, ন চাপজ্জতি, পণ্ডকে ইত্থিসঞ্ঞিস্স দুক্কটন্তি দীপেতুং ‘‘ইত্থী চ পণ্ডকো চ উভিন্নং ইত্থিসঞ্ঞী আপত্তি সঙ্ঘাদিসেসেন দুক্কটস্সা’’তি ৱুত্তত্তা ‘‘পণ্ডকে পণ্ডকসঞ্ঞিস্স থুল্লচ্চয’’ন্তি ৱুত্তমেৱ হোতি, তস্মা সব্বত্থ সংখিত্তৱাৰেসু থুল্লচ্চযট্ঠানে থুল্লচ্চযং, দুক্কটট্ঠানে দুক্কটম্পি ৱুত্তমেৱ হোতীতি ৱেদিতব্বং. তথা ‘‘ইত্থী চ হোতি ৱেমতিকো সাৰত্তো চ, ভিক্খু চ নং ইত্থিযা ৱচ্চমগ্গং পস্সাৱমগ্গং ঠপেত্ৱা অধক্খকং উব্ভজাণুমণ্ডলং আদিস্স ৱণ্ণম্পি ভণতি…পে… থুল্লচ্চযস্সা’’তিআদিনা নযেন থুল্লচ্চযখেত্তেপি যথাসম্ভৱং উদ্ধৰিতব্বা. তথা ‘‘ইত্থী চ হোতি ৱেমতিকো সাৰত্তো চ, ভিক্খু চ নং ইত্থিযা কাযপটিবদ্ধং আদিস্স ৱণ্ণম্পি ভণতি…পে… দুক্কটস্সা’’তিআদিনা নযেন কাযপটিবদ্ধৱাৰাপি যথাসম্ভৱং উদ্ধৰিতব্বা. কাযপ্পটিবদ্ধৱাৰত্তিকং ৱিয নিস্সগ্গিযৱাৰত্তিকং লব্ভমানম্পি আপত্তিৱিসেসাভাৱতো ন উদ্ধটং. কাযপ্পটিবদ্ধৱাৰত্তিকে পন দিন্ননযত্তা তম্পি তদনুলোমা ৱাৰা চ উদ্ধৰিতব্বা. সব্বত্থ ন-ৱিঞ্ঞূ তৰুণদাৰিকা, মহল্লিকা উম্মত্তিকাদিকা চ অনধিপ্পেতা, পগেৱ পাকতিকা তিৰচ্ছানগতিত্থীনং, তথা পণ্ডকাদযোপীতি ৱেদিতব্বা. সেসং দুতিযে ৱুত্তনযেনেৱ ৱেদিতব্বং.

পদভাজনীযৱণ্ণনা

২৮৫. ৱুত্তনযমেৱাতি ‘‘কাযসংসগ্গে ইত্থিলক্খণেনা’’তি লিখিতং. ‘‘ইত্থিলক্খণেনা’’তি কিৰ মহাঅট্ঠকথাপাঠো. সীসং ন এতীতি অক্কোসনং ন হোতি, ঘটিতে পন হোতি. তত্ৰাযং ৱিসেসো – ইমেহি তীহি ঘটিতে এৱ সঙ্ঘাদিসেসো ৱচ্চমগ্গপস্সাৱমগ্গানং নিযতৱচনত্তা, অচ্চোড়াৰিকত্তা ৱা, ন অঞ্ঞেহি অনিমিত্তাসীতিআদীহি অট্ঠহি. তত্থ অলোহিতাসি, ধুৱলোহিতাসি, ধুৱচোড়াসি, পগ্ঘৰণীসি, ইত্থিপণ্ডকাসি, ৱেপুৰিসিকাসীতি এতানি ছ মগ্গানং অনিযতৱচনানি, অনিমিত্তাসি, নিমিত্তমত্তাসীতি দ্ৱে পদানি অনচ্চোড়াৰিকানি চ, যতো অট্ঠপদানি ‘‘সঙ্ঘাদিসেসং ন জনেন্তী’’তি ৱুত্তানি, তস্মা তানি থুল্লচ্চযৱত্থূনি. পৰিব্বাজকৱত্থুম্হি ৱিয অক্কোসমত্তত্তা দুক্কটৱত্থূনীতি একে. ইত্থিপণ্ডকাসি, ৱেপুৰিসিকাসীতি এতানেৱ পদানি সকলসৰীৰসণ্ঠানভেদদীপকানি সুদ্ধানি সঙ্ঘাদিসেসং ন জনেন্তি সকলসৰীৰসামঞ্ঞত্তা, ইতৰানি জনেন্তি অসামঞ্ঞত্তা. তানি হি পস্সাৱমগ্গমেৱ দীপেন্তি সিখৰণী-পদং ৱিয. উভতোব্যঞ্জনাসীতি ৱচনং পন পুৰিসনিমিত্তেন অসঙ্ঘাদিসেসৱত্থুনা মিস্সৱচনং. পুৰিসউভতোব্যঞ্জনকস্স চ ইত্থিনিমিত্তং পটিচ্ছন্নং, পুৰিসনিমিত্তং পাকটং হোতি. যদি তম্পি জনেতি, কথং অনিমিত্তাসীতিআদিপদানি ন সঙ্ঘাদিসেসং জনেন্তীতি একে, তং ন যুত্তং. পুৰিসস্সপি নিমিত্তাধিৱচনতো, ‘‘মেথুনুপসংহিতাহি সঙ্ঘাদিসেসো’’তি মাতিকায লক্খণস্স ৱুত্তত্তা চ মেথুনুপসংহিতাহিপি ওভাসনে পটিৱিজানন্তিযা সঙ্ঘাদিসেসো, অপ্পটিৱিজানন্তিযা থুল্লচ্চযং, ইতৰেহি ওভাসনে পটিৱিজানন্তিযা থুল্লচ্চযং, অপ্পটিৱিজানন্তিযা দুক্কটন্তি একে, সব্বং সুট্ঠু ৱিচাৰেত্ৱা গহেতব্বং.

২৮৭. হসন্তোতি যং উদ্দিস্স ভণতি, সা চে পটিৱিজানাতি, সঙ্ঘাদিসেসো.

ৱিনীতৱত্থুৱণ্ণনা

২৮৯. ‘‘পটিৱুত্তং নামা’’তি পাঠো. নো-সদ্দো অধিকো. ‘‘অক্খৰলিখনেনপি হোতী’’তি ৱদন্তি, তং আৱজ্জনসমনন্তৰৱিধিনা সমেতি চে, গহেতব্বং.

দুট্ঠুল্লৱাচাসিক্খাপদৱণ্ণনা নিট্ঠিতা.