(৩) পাচিত্তিযাদিপঞ্হাৱণ্ণনা

৪৮১. সলাকং দেন্তস্স অস্স ভিক্খুস্স ছেজ্জং হোতীতি যোজনা. ‘‘পাৰাজিকং হোতী’’তি ইমিনা হোতিছেজ্জন্তি পদস্স অত্থং দস্সেতি.

সুপ্পতিট্ঠিতনিগ্ৰোধসদিসং ৰুক্খমূলং, তমেৱ ৱা গহেতব্বং.

তিস্সিত্থিযোতি এত্থ ভুম্মত্থে উপযোগৱচনং, পচ্চত্তৱচনং ৱাতি আহ ‘‘তাসুপী’’তি. ‘‘যং তং মেথুনং নাম ত’’ন্তি ইমিনা ‘‘মেথুনং যং ত’’ন্তি পদানং সমানাধিকৰণভাৱং দস্সেতি. ‘‘ন সেৱতী’’তি ইমিনা ন সেৱেতি এত্থ তিকাৰস্স একাৰাদেসভাৱং (জা. অট্ঠ. ৪.১১.৭৬ পুত্তো ৱা পিতৰং যাচে ৱিয) দস্সেতি. তযো পুৰিসেতি এত্থ ‘‘উপগন্ত্ৱা’’তি পদং অজ্ঝাহৰিত্ৱা সম্বন্ধিতব্বন্তি দস্সেন্তো আহ‘‘তযো পুৰিসেপি উপগন্ত্ৱা’’তি. ইমিনা তযো পুৰিসেতি এত্থ উপযোগত্থে উপযোগৱচনন্তি দস্সেতি. পুৰিমনযং গহেত্ৱা এত্থাপি ‘‘তীসু পুৰিসেসূ’’তি ভুম্মত্থে উপযোগৱচনন্তি অত্থোপি যুজ্জতেৱ. ইমং নযং গহেত্ৱা পুৰিমপদেপি তিস্সিত্থিযো উপগন্ত্ৱাতি উপযোগত্থে উপযোগৱচনন্তি অত্থোপি যুজ্জতেৱ. তস্মা তে দ্ৱে নযা অঞ্ঞমঞ্ঞোপদেসদাযকনযা নামাতি দট্ঠব্বং. ‘‘উভতোব্যঞ্জনসঙ্খাতে’’তি ইমিনা অনৰিযসদ্দেন উভতোব্যঞ্জনোৱ ইধ গহেতব্বোতি দস্সেতি. ‘‘নাচৰতী’’তি ইমিনা ন চাচৰেতি এত্থাপি তিসদ্দস্স একাৰাদেসভাৱমেৱ দস্সেতি. মেথুনধম্মস্স পুব্বভাগং কাযসংসগ্গং আপজ্জিতুং ৱাযমন্তিযা তস্সা ভিক্খুনিযাতি যোজনা.

অস্সাতি গাথায, তিত্থিযো আৰাধকো হোতীতি যোজনা. তত্থেৱাতি তিত্থিযৱত্তে এৱ. অস্সাতি তিত্থিযস্স. তমেৱাতি তিত্থিযৱত্তমেৱ.

সঙ্ঘাদিসেসন্তিআদিগাথা ৱুত্তাতি সম্বন্ধো. তন্তি অজ্ঝোহৰণং.

আকাসগতং সামণেৰন্তি সম্বন্ধো. সঙ্ঘেনপীতি পিসদ্দো ন কম্মাৰহেনেৱাতি দস্সেতি. ‘‘ন কাতব্ব’’ন্তি ইমিনা সঙ্ঘোপি কম্মাৰহোপি ভূমিগতোৱ ৱট্টতীতি দস্সেতি.

অস্সাতি গাথায ৱিনিচ্ছযোতি সম্বন্ধো.

‘‘ন দেতি, ন পটিগ্গণ্হাতী’’তি কিৰিযাপদানং কত্তাৰং দস্সেন্তো আহ ‘‘নাপি উয্যোজিকা’’তিআদি. তস্সাতি অৱস্সুতপুৰিসস্স. ‘‘কাৰণেনা’’তি ইমিনা তেনাতি পদস্স কাৰণত্থং দস্সেতি. এৱসদ্দো পন সম্ভৱৱসেন যোজিতো, ন অঞ্ঞেন কাৰণেনাতি অত্থো, অৱস্সুতস্স পুৰিসস্সাতি সম্বন্ধো. গহণেতি উয্যোজিতায গহণে. তঞ্চ পৰিভোগপচ্চযাতি এত্থ তসদ্দস্স ৱিসযং, পৰিভোগস্স চ সম্বন্ধং দস্সেন্তো আহ ‘‘তঞ্চ পনা’’তিআদি. তত্থ ‘‘আপত্তি’’ন্তি ইমিনা তসদ্দস্স ৱিসযং দস্সেতি. ‘‘তস্সা উয্যোজিতাযা’’তি ইমিনা পৰিভোগস্স সম্বন্ধং দস্সেতি. তস্সাতি উয্যোজিতায.

সত্তৰসকেসু সঙ্ঘাদিসেসেসূতি সম্বন্ধো. ৱজ্জং ন ফুসতীতি পদস্স অত্থং দস্সেন্তো আহ ‘‘অঞ্ঞং নৱং আপত্তি’’ন্তি.

ইতি সেদমোচিকগাথাৱণ্ণনায যোজনা সমত্তা.