৭. তিণৱত্থাৰকাদিকথা

২১২. কক্খড়তায ৱাড়তাযাতি এত্থ কক্খড়স্স ভাৱো কক্খড়তা, ৱাড়স্স ভাৱো ৱাড়তাতি ৱচনত্থং দস্সেন্তো আহ ‘‘কক্খড়ভাৱায চেৱ ৱাড়ভাৱায চা’’তি. ইমিনা তাপচ্চযস্স সমূহত্থঞ্চ স্ৱত্থঞ্চ পটিক্খিপতি. ‘‘কক্খড়তায ৱাড়তাযা’’তি ব্যঞ্জনতোযেৱ নানং, ন অত্থতো. ভেদাযাতি এত্থ অঞ্ঞস্স ভেদং পটিক্খিপন্তো আহ ‘‘সঙ্ঘভেদাযা’’তি. গিলানেপীতি পিসদ্দো অঞ্ঞে পন কা কথাতি দস্সেতি. তত্থেৱাতি অধিকৰণৱূপসমট্ঠানেযেৱ. ‘‘একতো’’তি ইমিনা একজ্ঝন্তি পদস্স ‘‘একতো’’তি পদেন সমানতং দস্সেতি, একসদ্দতো জ্ঝপচ্চযো চ তোপচ্চযো চ ৱিসেসো, ‘‘তিণৱত্থাৰকসদিসত্তা’’তি ইমিনা সদিসূপচাৰং দস্সেতি. তিণেহি অৱত্থৰিতব্বন্তি তিণৱত্থাৰং, গূথমুত্তং, তিণৱত্থাৰমিৱ তিণৱত্থাৰকং. এত্থ অধিকৰণমেৱ মুখ্যতো লব্ভতি, সমথো পন ফলূপচাৰতো, সদিসত্থে কপচ্চযো. তমেৱত্থং পাকটং কৰোন্তো আহ ‘‘যথা হী’’তিআদি. ঘট্টিযমানং গূথং ৱা মুত্তং ৱাতি যোজনা. ‘‘ঘট্টিযমান’’ন্তি পদং হেতুঅন্তোগধৱিসেসনং, ‘‘বাধতী’’তি ইমিনা সম্বন্ধিতব্বং. সুপ্পটিচ্ছাদিতস্স পন অস্স গূথমুত্তস্সাতি যোজনা. ‘‘সুপ্পটিচ্ছাদিতস্সা’’তি পদম্পি হেতুঅন্তোগধৱিসেসনমেৱ, ‘‘ন বাধতী’’তি ইমিনা সম্বন্ধিতব্বং. যং অধিকৰণং সংৱত্ততীতি সম্বন্ধো. মূলানুমূলন্তি মূলঞ্চ অনুমূলঞ্চ মূলানুমূলং. তন্তি অধিকৰণং. ইমিনা কম্মেনাতি তিণৱত্থাৰককম্মেন. গূথং তিণেহি পটিচ্ছন্নং সুৱূপসন্তং হোতি ৱিয তিণৱত্থাৰকেন পটিচ্ছন্নং সুৱূপসন্তং হোতীতি যোজনা. ইতীতি তস্মা.

২১৩. থুল্লৱজ্জন্তি এত্থ থুল্লচ্চযস্সাপি থুল্লৱজ্জত্তা ইধ পাৰাজিকসঙ্ঘাদিসেসমেৱাধিপ্পেতন্তি আহ ‘‘পাৰাজিকঞ্চেৱ সঙ্ঘাদিসেসঞ্চা’’তি. গিহিপটিসংযুত্তন্তি এত্থ গিহীনং পটিসংযুত্তং গিহিপটিসংযুত্তন্তি ৱচনত্থং দস্সেন্তো আহ ‘‘গিহীন’’ন্তিআদি. ‘‘হীনেনা’’তি পদং ‘‘খুংসনৱম্ভন’’ ইতি পদেনেৱ সম্বন্ধিতব্বং. ধম্মিকপটিস্সৱেসূতি নিমিত্তত্থে ভুম্মৱচনং.

২১৪. কম্মৱাচাপৰিযোসানে ৱুট্ঠিতা হোন্তীতি সম্বন্ধো. তত্থাতি অধিকৰণৱূপসমট্ঠানে. অঞ্ঞাৱিহিতাপীতি অধিকৰণৱিনিচ্ছযতো অঞ্ঞস্মিং ঠানে চিত্তং আৱিহিতাপি ঠপিতাপি. উপসম্পদমণ্ডলতোতি উপসম্পদসীমবিম্বতো, যে পনাতি ভিক্খূ পন, দিট্ঠাৱিকম্মং কৰোন্তীতি ৱা অনাগতাতি ৱা নিসিন্নাতি ৱা সম্বন্ধো. তেহি ৱাতি অধিকৰণং ৱিনিচ্ছিনন্তেহি ভিক্খূহি ৱা. তত্থাতি অধিকৰণৱিনিচ্ছিতট্ঠানং. ছন্দং দত্ৱাতি ছন্দং সঙ্ঘস্স দত্ৱা. পৰিৱেণাদীসূতিআদিসদ্দেন আৱাসাদযো সঙ্গণ্হাতি. তেতি ভিক্খূ.