২২৫. মতসন্তককথা

৩৬৭. কালঙ্কতেতি এত্থ কৰণং কতন্তি দস্সেন্তো আহ ‘‘কালকিৰিযাযা’’তি. অপলোকেত্ৱাতি ‘‘ইত্থন্নামো ভন্তে ভিক্খু কালঙ্কতো, তস্স তিচীৱৰঞ্চ পত্তঞ্চ গিলানুপট্ঠাকানং দাতুং সঙ্ঘং অপলোকেমী’’তি অপলোকেত্ৱা.

৩৬৯. গিলানুপট্ঠাকলাভেতি গিলানুপট্ঠাকানং লভিতব্বে.

সব্বেপি ভিক্খূতি সম্বন্ধো. তত্থাতি তস্মিং কালঙ্কতে. কিং ৱদন্তি? ‘‘সব্বেপি…পে… সামিনো’’তি ৱদন্তীতি যোজনা. দ্ৱীসু ৱাদেসু পচ্ছিমৱাদো অট্ঠকথাচৰিযেন ৰুচ্চতীতি ৱদন্তি. যন্তি যং ৱত্থু. ‘‘যং অত্থি, তং দাতব্ব’’ন্তি ৱুত্তমেৱত্থং আৱিকৰোন্তো আহ ‘‘অঞ্ঞস্মিং…পে… দাতব্ব’’ন্তি. তন্তি পৰিক্খাৰং.

সমকোতি সমং পমাণমেতস্স ভাগস্সাতি সমকো. সংৱিদহনমত্তমেৱাতি ইদঞ্চিদঞ্চ কৰোহীতি সজ্জনমত্তমেৱ. জেট্ঠকভাগোতি দিগুণভাগো.

যো পনাতি ভিক্খু পন. এত্থাতি বহূসু ভিক্খূসু. যেনাতি যেন কেনচি, দিন্নং পটিযাদিতন্তি সম্বন্ধো. একদিৱসম্পীতি পিসদ্দো পগেৱ দ্ৱীহাদিকেতি দস্সেতি. সোপীতি পিসদ্দো ন কেৱলং বহুদিৱসং উপট্ঠাকোযেৱ, অথ খো সোপীতি দস্সেতি. সমীপন্তি গিলানস্স সন্তিকং. আগচ্ছতীতি সমীপমাগচ্ছতি.

পচ্চাসীসাযাতি ভাগস্স পচ্চাসীসায. ‘‘পুন আগন্ত্ৱা জগ্গিস্সামী’’তি ইমিনা ‘‘পুন আগন্ত্ৱা ন জগ্গিস্সামী’’তি গচ্ছন্তস্স ন দাতব্বন্তি দস্সেতি. ধুৰং নিক্খিপিত্ৱাতি উপট্ঠহনে ধুৰং নিক্খিপিত্ৱা.

মাতুগামোপি হোতূতি যোজনা. তস্স ভিক্খুনোতি কালঙ্কতস্স তস্স ভিক্খুনো. সচেপি সহস্সং অগ্ঘতি, গিলানুপট্ঠাকানংযেৱ দাতব্বন্তি যোজনা. অঞ্ঞন্তি পত্তচীৱৰতো অঞ্ঞং. তেতি গিলানুপট্ঠাকা. অৱসেসন্তি পত্তচীৱৰতো অৱসেসং. ততোতি বহুকমহগ্ঘতো. তিচীৱৰপৰিক্খাৰোতি তিণ্ণং চীৱৰানং পৰিৱাৰো. সব্বঞ্চেতন্তি সব্বমেৱ এতং পৰিক্খাৰং. লভতীতি গিলানুপট্ঠাকো লভতি.

সোতি কালঙ্কতো. কস্সচীতি গহট্ঠস্স ৱা পব্বজিতস্স ৱা. তস্সেৱাতি দিন্নগাহকস্সেৱ. ৰুচিযা এৱাতি কামা এৱ. তত্থ তত্থ সঙ্ঘস্সেৱাতি তস্মিং তস্মিং ৱিহাৰে ঠিতস্স সঙ্ঘস্সেৱ. ইদং ৱিহাৰে ঠপিতপৰিক্খাৰে সন্ধায ৱুত্তং. সচে গামে ৱা অৰঞ্ঞে ৱা ঠপিতা হোন্তি, সকলোৱ সঙ্ঘো ইস্সৰো. কস্মা? সঙ্ঘস্সেৱ দাযজ্জভাৱতো. বহূনম্পীতি তীহি পট্ঠায বহূনম্পি. ঈদিসৱচনং উপনিধায সাসনেপি একো দ্ৱে বহূতি তীণি ৱচনানি অত্থে দিস্সন্তি, সদ্দে পন দ্ৱিৱচনবহুৱচনানং ৱিসেসাভাৱতো দ্ৱিৱচনং নত্থীতি দট্ঠব্বং. অদিন্নমেৱাতি অত্তনোযেৱ অসন্তকত্তা, অঞ্ঞেসম্পি সাধাৰণত্তা চ অদিন্নমেৱ. সচে সব্বে মতা অনুমতিযা দেন্তি, সুদিন্নমেৱ. তন্তি সন্তকং. তেসূতি তেসু সব্বেসু.