২২৭. কুসচীৰাদিপটিক্খেপকথা

৩৭১. ‘‘অক্কনাড়ময’’ন্তি ইমিনা অক্কনাড়েন নিব্বত্তং অক্কনাড়ন্তি ৱচনত্থং দস্সেতি. মকচিমযোতি এত্থ মকচিসদ্দেন পোত্থকসদ্দস্স গন্থাদযো অত্থে নিৱত্তেতি. মযসদ্দেন পুৰিমনযেনেৱ নিব্বত্ততদ্ধিতং দস্সেতি. সেসানীতি অক্কনাড়পোত্থকেহি সেসানি কুসচীৰাদীনি. তেসূতি কুসচীৰাদীসু.

৩৭২. তিপট্টচীৱৰস্স ৱাতি ইদং দ্ৱিপট্টচীৱৰস্স মজ্ঝে দানং সন্ধায ৱুত্তং. তেসন্তি সব্বনীলকাদীনং. কঞ্চুকন্তি ৱাৰণং. তঞ্হি কচিযতি কাযে বন্ধিযতীতি কঞ্চুকোতি ৱুচ্চতি. ৱেঠনেপীতি উণ্হীসেপি. তঞ্হি যস্মা যেন সীসে ৱেঠিযতি, তস্মা ৱেঠনন্তি ৱুচ্চতি. ৰুক্খছল্লিমযন্তি এত্থ ৰুক্খছল্লিসদ্দেন তিৰীটসদ্দস্স ৱক্কলত্থং দস্সেতি. ৱক্কলঞ্হি নিৱসনানং অঙ্গপচ্চঙ্গং তিৰোভাৱং পটিচ্ছন্নভাৱং এতি গচ্ছতি অনেনাতি ৱা ৰুক্খং তিৰোপটিচ্ছন্নং হুত্ৱা এতি পৱত্ততীতি ৱা তিৰীটন্তি ৱুচ্চতি. অভিধানে (অভিধানপ্পদীপিকাযং ৪৪২ গাথাযং) পন তৰীটন্তি তকাৰে ইকাৰৱিৰহিতো পাঠো অত্থি. পাদপুঞ্জনন্তি পাদো পুজিযতি সোধিযতি অনেনাতি পাদপুঞ্জনং, তালুজো ততিযক্খৰো.

৩৭৪. সন্তে পতিৰূপকে গাহকেতি এত্থ পতিৰূপকো নাম পক্কমন্তস্স ভিক্খুনো সন্দিট্ঠসম্ভত্তো. ইমিনা পতিৰূপকে গাহকে অসতি অদত্ৱা সঙ্ঘেন ভাজিতে সুভাজিতমেৱাতি দস্সেতি. সত্ত জনাতি পক্কমন্তউম্মত্তকখিত্তচিত্তৱেদনট্টা চত্তাৰো, উক্খিত্তকা তযোতি সত্ত জনা.