২২৪. গিলানৱত্থুকথা

৩৬৫. মঞ্চকে নিপাতেসুন্তি এত্থ মঞ্চকে নিপাতনং নাম মঞ্চকে নিপজ্জাপনন্তি আহ ‘‘মঞ্চকে নিপজ্জাপেসু’’ন্তি. মুত্তকৰীসকিলিট্ঠন্তি মুত্তকৰীসেহি কিলিট্ঠং. যোতি যো কোচি. মন্তি মম. তমত্থং দস্সেন্তো আহ ‘‘ওৱাদানুসাসনীকৰণেনা’’তি. মম ওৱাদস্স চ অনুসাসনিযা চ কৰণেনাতি অত্থো. এত্থাতি ‘‘যো ভিক্খৱে মং উপট্ঠহেয্যা’’তিআদিপাঠে. সুত্তস্স নেয্যত্থত্তা অগহেতব্বত্থং দস্সেন্তো আহ ‘‘ভগৱতো চা’’তিআদি. যস্সাতি গিলানস্স. উপজ্ঝাযাদযোতি এত্থ আদিসদ্দেন আচৰিযসদ্ধিৱিহাৰিকঅন্তেৱাসিকসমানুপজ্ঝাযকসমানাচৰিযকসঙ্খাতে পঞ্চ জনে সঙ্গণ্হাতি. একচাৰিকো ৱা হোতীতি সম্বন্ধো. সঙ্ঘত্থেৰোপীতি পিসদ্দো পগেৱ অঞ্ঞেসন্তি দস্সেতি.

৩৬৬. অভিক্কমন্তং ৱাতি এত্থ অভিমুখং কমতীতি অভিক্কমন্তোতি ৱুত্তে ৱড্ঢনত্থোতি আহ ‘‘ৱড্ঢন্তং ৱা’’তি. আবাধং নাৱিকৰোতীতি সম্বন্ধো. ইমিনা অন্তপচ্চযস্স সৰূপং দস্সেতি. ইদং নাম ভোজনন্তি সম্বন্ধো. সংৱিধাতুন্তি এত্থ সংৱিপুব্বো ধাধাতু কৰধাত্ৱত্থো, কৰধাতু চ সব্বধাত্ৱত্থো, তস্মা ৱুত্তং ‘‘ভেসজ্জং যোজেতু’’ন্তি. অস্সাতি গিলানুপট্ঠাকস্স. অন্তৰসদ্দস্স মজ্ঝত্থাদযো পটিক্খিপন্তো আহ ‘‘কাৰণং ৱুচ্চতী’’তি.