২২৩. উপনন্দসক্যপুত্তৱত্থুকথা

৩৬৪. এত্থাতি উপনন্দৱত্থুম্হি. তস্সাতি উপনন্দস্স. গামকাৱাসিনোতি গামকে আৱাসিনো. অযন্তি উপনন্দো. মুখৰোতি মুখং খৰং এতস্সাতি মুখৰো খকাৰলোপো, অথ ৱা মুখং এতস্সত্থীতি মুখৰো মন্তুত্থে পৱত্তো ৰপচ্চযো নিন্দত্থৱাচকো. লহুকাপত্তীতি দুক্কটাপত্তি. তস্সেৱাতি গহিতভিক্খুস্সেৱ. ধুৰনিক্খেপে সতীতি যোজনা.

একস্স পুগ্গলস্সত্থায অধিপ্পিযতে ইচ্ছিযতেতি একাধিপ্পাযো, একপুগ্গলপটিৱীসো, তেনাহ ‘‘একপুগ্গলপটিৱীসমেৱা’’তি. যথা যথাতি যেন যেনাকাৰেন. যোতি পটিৱীসো. ‘‘তথা তথা’’তি অজ্ঝাহৰিতব্বো. তত্থাতি ‘‘ইধ পনা’’তিআদিৱচনে. একেকস্মিং আৱাসেতি সম্বন্ধো. ৱাসদ্দো অঞ্ঞেপি দ্ৱীহদ্ৱীহাদিৱাৰে সঙ্গণ্হাতি. যন্তি পটিৱীসং. একো পুগ্গলোতি একো নিচ্চাৱাসো পুগ্গলো. এৱন্তি উপড্ঢে দিয্যমানে. যত্থ ৱা পনাতি এত্থ যসদ্দস্স ৱিসযং দস্সেতুং ৱুত্তং ‘‘এৱং পুৰিমস্মি’’ন্তি. পুৰিমস্মিং আৱাসেতি সম্বন্ধো. ততোতি এত্থ তসদ্দস্স ৱিসযং দস্সেন্তো আহ ‘‘বহুতৰং ৱসিতৱিহাৰতো’’তি. ইদঞ্চাতি ‘‘অমুত্ৰ উপড্ঢো চীৱৰপটিৱীসো দাতব্বো’’তি ৱচনঞ্চ. একসীমৱিহাৰেহীতি একিস্সং উপচাৰসীমাযং ঠিতেহি ৱিহাৰেহি. নানাসীমৱিহাৰেতি নানাউপচাৰসীমাযং ঠিতে ৱিহাৰে. সেনাসনগ্গাহোতি পুৰিমউপচাৰসীমাযং সেনাসনগ্গাহো. তত্থাতি পস্সম্ভনৱিহাৰে. সেসন্তি চীৱৰতো সেসং. সব্বত্থাতি সব্বেসু ৱিহাৰেসু. অন্তোসীমগতস্সাতি অন্তোউপচাৰসীমাযং গতস্স, ভিক্খুনোতি সম্বন্ধো. চীৱৰং সেনাসনগ্গাহস্সেৱ পাপুণাতি, সেসং পন আমিসভেসজ্জাদিসব্বং অঞ্ঞৱিহাৰতো আগন্ত্ৱা অন্তোসীমগতস্স পাপুণাতীতি অধিপ্পাযো.