২২২. সঙ্ঘিকচীৱৰুপ্পাদকথা

৩৬৩. অঞ্ঞত্থাতি দিন্নট্ঠানতো অঞ্ঞত্থ. হটানিপি চীৱৰানি তুয্হেৱ সন্তকানীতি যোজনা. তেসন্তি চীৱৰানং. অঞ্ঞোতি এককৱস্সাৱাসিকতো অঞ্ঞো. পঞ্চমাসে তং সব্বং তস্সেৱ ভিক্খুনো হোতীতি সম্বন্ধো. যন্তি চীৱৰং, তং সব্বং চীৱৰন্তি সম্বন্ধো. যম্পীতি চীৱৰম্পি. সোতি ভিক্খু, গণ্হাতীতি সম্বন্ধো. ৱস্সাৱাসত্থাযাতি ৱস্সং আৱাসস্স ভিক্খুনো অত্থায. ঠপিতউপনিক্খেপতোতি ৱেয্যাৱচ্চকৰেহি ৱড্ঢিং পযোজেত্ৱা ঠপিতউপনিক্খেপতো. তত্ৰুপ্পাদতোতি তস্মিং ৱিহাৰে উপ্পাদতো নাড়িকেৰআৰামাদিতো. ইদন্তি ৱক্খমানং. এত্থাতি ‘‘তস্সেৱ তানি চীৱৰানি যাৱ কথিনস্স উব্ভাৰাযা’’তি ৱচনে. যন্তি চীৱৰং. পন সদ্দো ৱিসেসত্থজোতকো. ইদন্তি পদালঙ্কাৰমত্তং. ইধাতি ইমস্মিং ৱিহাৰে. অভিলাপমত্তন্তিপি ৱদন্তি. অনত্থতকথিনস্সাপীতি পিসদ্দো পগেৱ অত্থতকথিনস্সাতি দস্সেতি. পঞ্চমাসেতি অচ্চন্তসংযোগত্থে উপযোগৱচনং. ততোতি পঞ্চমাসতো. অতীতৱস্সে ৱস্সংৱুত্থসঙ্ঘস্স ইদং ৱস্সাৱাসিকং দেতি কিং? উদাহু অনাগতৱস্সেতি যোজনা. পিট্ঠিসমযেতি গিম্হানং পঠমদিৱসতো পট্ঠায যাৱ অস্সযুজপুণ্ণমী, তাৱ পিট্ঠিসমযে.

ৱস্সানতোতি ৱস্সানমাসতো. এত্থাতি এতেসু চীৱৰেসু. কেচি ভিক্খূতি সম্বন্ধো. তমত্থন্তি তস্স সঙ্ঘিকচীৱৰস্স কাৰণং. তত্থেৱাতি গতট্ঠানে এৱ. এসাতি সঙ্ঘিকচীৱৰহাৰকো ভিক্খু. তত্ৰাতি ৱিহাৰাদীসু. নন্তি চীৱৰহাৰকং ভিক্খুং.

ৱত্তং ৱিত্থাৰেত্ৱা দস্সেন্তো আহ ‘‘তেন হী’’তিআদি. তেন ভিক্খুনা ভাজেতব্বানীতি সম্বন্ধো. তস্সেৱাতি অধিট্ঠহন্তস্সেৱ.

একেকং ভাগন্তি সম্বন্ধো. এত্থ ঠানে অহমেৱ অস্মীতি যোজনা. দুগ্গহিতানি হোন্তীতি সঙ্ঘিকানেৱ হোন্তীতি অধিপ্পাযো. ময্হমেৱিমানি চীৱৰানীতি ইস্সৰৱসেন গহণে দুগ্গহিতানি. ময্হেতানি পাপুণন্তীতি অনিস্সৰৱসেন গহণে সুগ্গহিতানীতি ৱিসেসো.

পাতিতে কুসেতি এত্থ তপচ্চযস্স পচ্চুপ্পন্নকালিকভাৱং দস্সেন্তো আহ ‘‘এককোট্ঠাসে’’তিআদি. গহিতমেৱাতি এককোট্ঠাসে পাতিতস্স কুসদণ্ডস্স ৱসেন ‘‘ইমস্সিদ’’ন্তি এককোট্ঠাসে ৱিদিতে সব্বেসং ৱিদিতত্তা গহিতমেৱাতি অধিপ্পাযো.

ইতোৱাতি সচীৱৰভত্ততোৱ. ৱিসুং সজ্জিযমানেতি চীৱৰে চ ভত্তে চ ৱিসুং সজ্জিযমানে.

যথা পুৰিমেসু দ্ৱীসু ৱত্থূসু ‘‘অদংসূ’’তি ৱুত্তং, তথা অৱত্ৱা কস্মা ইধ ‘‘দেন্তী’’তি ৱুত্তন্তি আহ ‘‘সণিকং সণিকং দেন্তিযেৱা’’তি. সণিকং সণিকং দেন্তে দানকিৰিযায অনুপচ্ছিন্নত্তা ‘‘দেন্তী’’তি পচ্চুপ্পন্নৱসেন ৱুত্তন্তি অধিপ্পাযো. পচ্ছিন্নদানত্তাতি পচ্ছিন্নদানকিৰিযভাৱতো. ইদং পন ৱত্থু উপ্পন্নন্তি সম্বন্ধো. ইমে চ থেৰাতি নিলৱাসিআদযো ৱিনযধৰপামোক্খা ইমে চ থেৰা.