২১৪. ভণ্ডাগাৰসম্মুতিআদিকথা

৩৪৩. যো ৱিহাৰো ৱা যো অড্ঢযোগো ৱা হোতি, সো ৱিহাৰাদিকো সম্মনিতব্বোতি যোজনা. ‘‘আৰামিকসামণেৰাদীহী’’তি পদং ৱিৱিত্তত্থে অপাদানং, কৰণম্পি যুজ্জতি. পচ্চন্তসেনাসনং পন ন সম্মনিতব্বং চোৰাদিউপদ্দৱত্তা. ৱিহাৰমজ্ঝেযেৱাতি ভণ্ডাগাৰৱিহাৰমজ্ঝেযেৱ.

যস্সাতি ভণ্ডাগাৰস্স. ইদং পদং ‘‘ছদনাদীসূ’’তি পদে সামী, ‘‘নত্থী’’তি পদে সম্পদানং. যস্স পনাতি ভণ্ডাগাৰস্স পন. যত্থ কত্থচীতি যস্মিং কস্মিংচি ঠানে. যেনাতি পতিতহেতুনা. মূসিত্ৱা খাদতীতি মূসিকো. আদিসদ্দেন গোধামঙ্গুসাদযো সঙ্গণ্হাতি. উপ ভুসং, উপগুহিত্ৱা ৱা চিনন্তীতি উপচিকা. তন্তি ওৱস্সনাদিং. হীতি সচ্চং, যস্মা ৱা. এৱন্তিআদি নিগমনং.

চীৱৰপটিগ্গাহকাদীহীতি আদিসদ্দেন চীৱৰনিদহকভণ্ডাগাৰিকে সঙ্গণ্হাতি. তত্থাতি তেসু. চীৱৰপটিগ্গাহকেন ন গণ্হিতব্বন্তি সম্বন্ধো. তাৱাতি চীৱৰনিদহকভণ্ডাগাৰিকানং, তেহি ৱা পঠমং. যং যন্তি চীৱৰং. তথেৱাতি যথা ৱিসুং ৱিসুং কত্ৱা গণ্হতি, তথেৱ. চীৱৰনিদহকেনাপীতি পিসদ্দো ন কেৱলং পটিগ্গাহকেনেৱ, অথ খো নিদহকেনপীতি সম্পিণ্ডেতি. তথেৱাতি যথা নিদহকো আচিক্খতি, তথেৱ. ততোতি তেহি চীৱৰেহি, ৱিভত্তঅপাদানং, তেসু চীৱৰেসু ৱা নিদ্ধাৰণং. তদেৱাতি সঙ্ঘেন ৱুত্তচীৱৰমেৱ.

ইতীতিআদি নিগমনং. ভগৱতা অনুঞ্ঞাতোতি সম্বন্ধো. ভণ্ডাগাৰন্তি ভণ্ডস্স ঠপনোকাসং অগাৰং. ভণ্ডাগাৰিকোতি ভণ্ডাগাৰে নিযুত্তো. বাহুল্লিকতাযাতি পচ্চযবাহুল্লেন নিযুত্তভাৱত্থং. এৱং সন্তে কিমত্থায অনুঞ্ঞাতোতি আহ ‘‘অপি চা’’তিআদি. অনুগ্গহায অনুঞ্ঞাতোতি সম্বন্ধো. হীতি ৱিত্থাৰো. নেৱ জানেয্যুন্তি যোজনা. দ্ৱে দ্ৱে ৱা চীৱৰেতি সম্বন্ধো. সঙ্গহং কাতুন্তি সঙ্ঘেন সঙ্গহং কাতুং.

ন ৱুট্ঠাপেতব্বোতি এত্থ অত্থুদ্ধাৰৱসেন অঞ্ঞেপি অৱুট্ঠাপনীযে দস্সেন্তো আহ ‘‘অঞ্ঞেপী’’তিআদি. হীতি ৱিত্থাৰো. তত্থাতি চতূসু. সঙ্ঘো পন দেতীতি সম্বন্ধো. উপকাৰতায চাতি সঙ্ঘস্স উপকাৰতায চ. এত্থ চ পুৰিমেসু তীসু একোযেৱ হেতু, পচ্ছিমে পন দ্ৱে হেতৱোতি দট্ঠব্বং.

সম্মুখীভূতেনাতি অঞ্ঞমঞ্ঞস্স মুখে সংৱিজ্জমানো, সন্নিপতিতো ৱা সম্মুখো, সম্মুখো হুত্ৱা ভূতো সম্মুখীভূতো. ভূসদ্দযোগত্তা অকাৰস্সীকাৰো হোতি, অন্তোউপচাৰসীমাযং ঠিতো সঙ্ঘো. তমত্থং দস্সেন্তো আহ ‘‘অন্তোউপচাৰসীমাযং ঠিতেনা’’তি. কোলাহলন্তি বহুজনেহি সন্নিপতিত্ৱা একতো কতং অব্যত্তসদ্দং. তদাকাৰং দস্সেন্তো আহ ‘‘অম্হাক’’ন্তিআদি. ‘‘চীৱৰভাজকেসূ’’তিআদিনা অগতিগমনাকাৰং দস্সেতি, তং সুৱিঞ্ঞেয্যমেৱ. তুলাভূতোতি তুলায সদিসো হুত্ৱা ভূতো, তুলায সদিসভাৱং পত্তো ৱা. মজ্ঝত্তোতি মজ্ঝে ঠিতো অত্তা সভাৱো এতস্সাতি মজ্ঝত্তো.

ইদন্তি চীৱৰং. ঘনন্তি নিৰন্তৰং. তনুকন্তি ৱিৰড়ং. এত্থ ‘‘উচ্চিনিত্ৱা’’তি ইমিনা ৱত্থস্স পমাণেন উচ্চিননং দস্সেতি. ‘‘তুলযিত্ৱা’’তি ইমিনা অগ্ঘেন তুলনং দস্সেতি. ৱণ্ণাৱণ্ণং কত্ৱাতি ৱণ্ণঞ্চ অৱণ্ণঞ্চ খুদ্দকঞ্চ পমাণং, মহন্তঞ্চ পমাণং কত্ৱাতি অত্থো. একচ্চানি চীৱৰানি অপ্পগ্ঘানি হোন্তি, একচ্চানি মহগ্ঘানীতি ৱুত্তং হোতি. দসদসঅগ্ঘনকন্তি দসহি দসহি কহাপণেহি অগ্ঘনকং. যন্তি চীৱৰং, বন্ধিত্ৱাতি নৱগ্ঘনকং একগ্ঘনকেন, অট্ঠগ্ঘনকঞ্চ দ্ৱিঅগ্ঘনকেন বন্ধিত্ৱাতি অত্থো. সমে পটিৱীসেতি সমপমাণে পটিৱীসে ঠপেত্ৱা, ইমিনা ‘‘ৱণ্ণাৱণ্ণ’’ন্তি এত্থ ৱণ্ণসদ্দো পমাণত্থোতি দীপেতি. দস দস ভিক্খূতি ইদং উপলক্খণৱসেন ৱুত্তং অঞ্ঞেনাকাৰেনাপি গণেতুং সক্কুণেয্যত্তা. ভণ্ডিকন্তি চীৱৰভণ্ডেন নিযুত্তং পুটং. কুসোতি সলাকদণ্ডো.

অত্তিস্সৰাতি অত্তনাৱ অত্তানং ইস্সৰা. অঞ্ঞেসং ৱত্তপটিপত্তিন্তি সম্বন্ধো. উপড্ঢভাগোতি ভিক্খূনং লদ্ধভাগতো উপড্ঢো ভাগো. যে পনাতি সামণেৰা পন. সমভাগোতি ভিক্খূনং ভাগেন সমো ভাগো. ইদঞ্চাতি ‘‘উপড্ঢপটিৱীস’’ন্তি ৱচনঞ্চ, কথিতন্তি সম্বন্ধো. সমকমেৱাতি ভিক্খুসামণেৰানং সমপমাণমেৱ. তত্ৰুপ্পাদৱস্সাৱাসিকন্তি তস্মিং ৱিহাৰে উপ্পাদেন মূলেন উপ্পাদিতং ৱস্সাৱাসিকং. ফাতিকম্মন্তি ৱড্ঢনকম্মং ‘‘যত্তকেন ৱিনযাগতেন সম্মুঞ্জনিবন্ধনাদিনা হত্থকম্মেন ৱিহাৰস্স ঊনতা ন হোতি, তত্তকং কত্ৱাতি অত্থো. এতন্তি ফাতিকম্মং কত্ৱা গহণং. হীতি সচ্চং. এত্থাতি তত্ৰুপ্পাদৱস্সাৱাসিকগহণে. সব্বেসন্তি অখিলানং ভিক্খুসামণেৰানং. ভণ্ডাগাৰিকচীৱৰেপীতি ভণ্ডাগাৰে ঠপিতে অকালচীৱৰেপি. পিসদ্দেন তত্ৰুপ্পাদৱস্সাৱাসিকমপেক্খতি. সামণেৰা উক্কুট্ঠিং কৰোন্তীতি সম্বন্ধো. অপহৰিতকন্তি হৰিতৱিৰহিতং. ৰঙ্গছল্লিন্তি ৰজনচ্ছৱিং. এতন্তি উক্কুট্ঠিকৰণতো সমভাগদানং, ৱুত্তন্তি সম্বন্ধো. যে চাতি সামণেৰা চ. ৱিৰজ্ঝিত্ৱা কৰোন্তীতি কত্তব্বকালেসু অকত্ৱা যথিচ্ছিতক্খণে কৰোন্তি. তেতি সামণেৰে. সমপটিৱীসো দাতব্বোতি ‘‘কৰিস্সামা’’তি পটিঞ্ঞাতমত্তেন সমো পটিৱীসো দাতব্বো.

‘‘সকং ভাগং দাতু’’ন্তি ইদং ৱুত্তন্তি সম্বন্ধো. কিং সন্ধায ৱুত্তন্তি আহ ‘‘ভণ্ডাগাৰতো…পে… সন্ধাযা’’তি. পহতাযাতি পহৰিতব্বায, পহনিতব্বায ৱা. তস্মাতি যস্মা সন্ধায ৱুত্তং, তস্মা. অনীহটেসূতি ভণ্ডাগাৰতো অনীহৰিতেসু. ইমস্স ভিক্খুনোতি উত্তৰিতুকামস্স ইমস্স ভিক্খুনো. তুলাযাতি মানেন.

তেসূতি সাটকেসু, একো সাটকোতি যোজনা. সব্বেসু পাতিতেসূতি সম্বন্ধো. এত্তকেনাতি দ্ৱাদসগ্ঘনকেন. তং সুত্ৱাতি ভিক্খূনং তং ৱচনং সুত্ৱা. সব্বত্থাতি সব্বস্মিং সঙ্ঘগণসন্তকে. অনুপ্পদানেন খিপিযতি পক্খিপিযতীতি অনুক্খেপন্তি দস্সেন্তো আহ ‘‘অনুক্খেপং নামা’’তিআদি. যত্তকং অগ্ঘন্তি সম্বন্ধো. তত্তকেন অগ্ঘেন অগ্ঘনকেতি যোজনা. ৱিকল্লকাতি ৱিকলস্স ভাৱো ৱিকল্লং, চীৱৰপুগ্গলানং অপহোনকভাৱো, তদেৱ ৱিকল্লকা. ‘‘তত্থা’’তি পাঠসেসো, তেসু দ্ৱীসু ৱিকল্লকেসূতি অত্থো. অত্থীতি সংৱিজ্জন্তি, নিপাতোযং. ছিন্দন্তেহি চ দাতব্বানীতি সম্বন্ধো. দাতব্বানীতি চ ছিন্দিতব্বানি. দাসদ্দো হি অৱখণ্ডনত্থো. দাতুন্তি অৱখণ্ডিতুং. এৱন্তিআদি নিগমনং. এত্থাতি এতেসু ৱিকল্লকেসু. তন্তি চীৱৰং. অথাতি তোসিততো পৰং. তত্থাতি একস্স ভিক্খুনো কোট্ঠাসে. সামণকন্তি সমণস্স অনুৰূপং. যোতি ভিক্খু. তেনাতি পৰিক্খাৰেন. ইদম্পীতি অঞ্ঞং সামণকস্স পৰিক্খাৰস্স ঠপনম্পি. পিসদ্দেন পুৰিমং ৱত্থছিন্দনমপেক্খতি.

ৱগ্গন্তি সমূহং. অট্ঠ ৱা নৱ ৱা ভিক্খূ হোন্তীতি যোজনা. তেসন্তি অট্ঠন্নং ৱা নৱন্নং ৱা. এৱন্তিআদি নিগমনং. অযং অপহোনকভাৱোতি যোজনা. পুন চীৱৰস্সেৱ ৱিকল্লকভাৱং দস্সেন্তো আহ ‘‘অথৱা’’তিআদি. এত্থ পুৰিমনযে চীৱৰস্স চ পুগ্গলস্স চ ৱিকল্লকং হোতি, পচ্ছিমে চীৱৰস্সেৱাতি অযমেতেসং ৱিসেসো.