২১৫. চীৱৰৰজনকথা

৩৪৪. গিহিপৰিভুত্তং পনাতি গিহিনা পৰিভুত্তং ৱত্থং পন, কিঞ্চি ফলন্তি সম্বন্ধো.

সীতুদকাতি সীতং উদকং. লিঙ্গৱিপল্লাসো হি অযং. উত্তৰাড়ুম্পন্তি এত্থ উত্তৰ উড়ুম্পন্তি পদচ্ছেদং কত্ৱা অকাৰতো উকাৰস্স লোপং কত্ৱা, পুব্বসৰস্স চ দীঘং কত্ৱা ‘‘উত্তৰাড়ুম্প’’ন্তি ৱুচ্চতি. উত্তৰাড়ূতি উত্তৰউদকং. উড়ুসদ্দো হি উদকৱাচকো, তং পাতি ৰক্খতীতি উত্তৰাড়ুম্পং. তস্স সৰূপং দস্সেন্তো আহ ‘‘ৱট্টাধাৰক’’ন্তি. ৰজনন্তি ৰজনছল্লিং. হীতি ফলজোতকো. ৰজনন্তি ৰজনুদকং. হীতি ৱিত্থাৰো. থেৱোতি ৰজনবিন্দু. ন ৱিসৰতীতি ন পগ্ঘৰতি. ৰজনাড়ুঙ্কন্তি এত্থাপি পুৰিমনযেনেৱ পদসিদ্ধি ৱেদিতব্বা. ৰজনউড়ুঙ্কন্তি ৰজনসঙ্খাতস্স উদকস্স গহণত্থায কৰিযতীতি ৰজনউড়ুঙ্কং. দণ্ডকেন নিযুত্তং থালকং দণ্ডকথালকন্তি দস্সেন্তো আহ ‘‘তমেৱ সদণ্ডক’’ন্তি. ৰজনকুণ্ডন্তি ৰজনপক্খিপনং মহাঘটং. অঞ্ঞত্ৰাতি অঞ্ঞং ঠানং. পত্থিন্নসদ্দো থদ্ধপৰিযাযোতি আহ ‘‘থদ্ধ’’ন্তি. দন্তকাসাৱানীতি এত্থ দন্তসদ্দেন তস্স ৱণ্ণো গহেতব্বো, সো এতেসমত্থীতি দন্তানি, দন্তানি চ তানি কাসাৱানি চেতি দন্তকাসাৱানি, তমত্থং দস্সেন্তো আহ ‘‘দন্তৱণ্ণানী’’তি. দন্তৱণ্ণানি কাসাৱানি ধাৰেন্তীতি সম্বন্ধো.