২১৩. চীৱৰপটিগ্গাহকসম্মুতিকথা

৩৪২. ‘‘যো ন ছন্দাগতিং গচ্ছতী’’তিআদীসু এৱং ৱিনিচ্ছযো ৱেদিতব্বোতি যোজনা. ঞাতকাদীনং চীৱৰন্তি সম্বন্ধো. একচ্চস্মিন্তি জনে. ৱাসদ্দো ৱিকপ্পত্থো. এতেসু তীসু অঞ্ঞতৰেন কাৰণেন ছন্দাগতিং গচ্ছতি নামাতি হি অত্থো. আগতস্সাপি চীৱৰন্তি সম্বন্ধো পিসদ্দো গৰহত্থো. পগেৱ পচ্ছা আগতস্সাতি হি অত্থো. অৱমঞ্ঞন্তি উঞ্ঞাতং. ৱোতি তুম্হাকং. নত্থি কিন্তি যোজনা. মুট্ঠা সতি এতস্সাতি মুট্ঠস্সতি. আগতানম্পি চীৱৰন্তি সম্বন্ধো. পিসদ্দো সম্ভাৱনত্থো. পগেৱ পঠমং আগতানন্তি হি অত্থো. এতং চীৱৰপটিগ্গাহকট্ঠানং নামাতি যোজনা. সন্তসন্তো ৱাতি খেদখেদো ৱা. ইদঞ্চিদঞ্চাতি ইদঞ্চ ইদঞ্চ চীৱৰং. তস্মাতি যস্মা চ গচ্ছতি, যস্মা চ জানাতি, তস্মা. যোতি ভিক্খু. সক্কোতীতি সম্বন্ধো. এৱৰূপো ভিক্খু সম্মনিতব্বোতি যোজনা.

অপলোকনেনপীতি ‘‘ইত্থন্নামং ভিক্খুং চীৱৰপটিগ্গাহকং কাতুং সঙ্ঘং অপলোকেমী’’তি অপলোকনেনপি, সম্মনিতুন্তি সম্বন্ধো. যত্থ পনাতি যস্মিং পন ধুৰৱিহাৰে.

‘‘গহিতট্ঠানেযেৱা’’তি ইমিনা তত্থেৱাতি এত্থ তসদ্দস্স ৱিসযং দস্সেতি. ‘‘ছড্ডেত্ৱা’’তি ইমিনা উজ্ঝিত্ৱাতি এত্থ উধধাতুযা ৱিস্সজ্জনত্থং দস্সেতি. চীৱৰপটিগ্গাহকন্তি পদস্স চীৱৰং পটিগ্গণ্হাতীতি চীৱৰপটিগ্গাহকোতি ৱচনত্থং দস্সেন্তো আহ ‘‘যো’’তিআদি. তত্থ যো পটিগ্গণ্হাতি, সো চীৱৰপটিগ্গাহকো নামাতি যোজনা. ‘‘চীৱৰপটিসামক’’ন্তি ইমিনা চীৱৰং গহিতট্ঠানতো নীহৰিত্ৱা ভণ্ডাগাৰে দহতি ঠপেতীতি চীৱৰনিদহকোতি অত্থং দস্সেতি. যো ন ছন্দাতিং গচ্ছতীতিআদীসু এত্থ এতেসু চ ইতো পৰঞ্চাতি যোজনা.