২১১. কম্বলানুজাননাদিকথা

৩৩৮. কাসীনন্তি কাসীনং জনপদানং, কাসিৰট্ঠে নিৱাসীনং জনানং ৱা. পসেনদিস্সাতি পচ্চুট্ঠং, পটিপক্খং ৱা সেনং জিনাতীতি পসেনদি জকাৰস্স দকাৰং কত্ৱা. এসাতি এসো কাসিৰাজা. ‘‘সহস্স’’ন্তি ইমিনা কাসিসদ্দস্স সঙ্কেতসঙ্খ্যং দস্সেতি. তংঅগ্ঘনকোতি তেন কাসিনা অগ্ঘনকো. কস্মা অড্ঢকাসীতি (থেৰীগা. অট্ঠ. ২৫) ৱুত্তোতি আহ ‘‘অযং পনা’’তিআদি. অযন্তি কম্বলো. পনাতি কাৰণত্থজোতকো. যস্মাতি হি অত্থো.

৩৩৯. ভঞ্জিতব্বং খোমাদীনি পঞ্চ সুত্তানি মিস্সিত্ৱা অৱমদ্দিতব্বন্তি ভঙ্গন্তি দস্সেন্তো আহ ‘‘ভঙ্গং নামা’’তিআদি. ৱাকমযমেৱাতি ভঙ্গনামকেন ৱাকেন নিব্বত্তমেৱ.

৩৪০. তেতি ভিক্খূ, সল্লক্খিংসু কিৰাতি সম্বন্ধো. এতস্সাতি পদস্স, অত্থন্তি সম্বন্ধো. ন অচ্ছিংসূতি ন আসিংসু, ন ৱসিংসূতি অত্থো. নাকামাতি এত্থ কমুধাতু ইচ্ছত্থো যকাৰলোপোতি আহ ‘‘ন অনিচ্ছাযা’’তি. দাতব্বোতি ভাগো দাতব্বো. উপচাৰেতি সুসানস্স সমীপে. ‘‘অকামা ভাগং দাতু’’ন্তি ৱচনস্স অনেকন্তভাৱং দস্সেতুং ৱুত্তং ‘‘যদি পনা’’তিআদি. ইধাতি ইমং সুসানং. ‘‘সম্পত্তা গণ্হন্তূ’’তি দেন্তীতি যোজনা. যেনাতি ভিক্খুনা. সদিসা ওক্কমিংসূতি এত্থ সদিসসদ্দো সমপৰিযাযোতি আহ ‘‘সমং ওক্কমিংসূ’’তি. সমন্তি ভাৱনপুংসকো. সমানদিসাযাতি ৱা দস্সেন্তো আহ ‘‘একদিসায ৱা’’তি. এত্থ পন যকাৰলোপো দট্ঠব্বো. বহিমেৱাতি সুসানতো বহি এৱ. কতিকন্তি কতেন পৱত্তং সঙ্গৰং.