২১০. ৱৰযাচনকথা

৩৩৭. কতং ভত্তকিচ্চং যেনাতি কতভত্তকিচ্চো, তস্মিং সতীতি সম্বন্ধো. ৱুত্তনযেনেৱাতি ৰাহুলৱত্থুম্হি (মহাৱ. অট্ঠ. ১০৫) ৱুত্তনযেনেৱ. ইদং ৱত্থন্তি ইদং সিৱেয্যকং ৱত্থং, উপ্পন্নন্তি সম্বন্ধো. ‘‘তাৱা’’তি অজ্ঝাহৰিতব্বো. এত্থন্তৰেতি এতস্মিং ৱত্থুপ্পন্নকালমজ্ঝে. কোচি ভিক্খূতি সম্বন্ধো. তেনাতি পংসুকূলিকহেতুনা. অযন্তি জীৱকো. গহপতিচীৱৰন্তি এত্থ গহপতীনং চীৱৰন্তি অত্থং পটিক্খিপন্তো আহ ‘‘গহপতীহি দিন্নং চীৱৰ’’ন্তি. ৱত্থদানানিসংসপটিসংযুত্তাযাতি ‘‘ৱত্থদো হোতি ৱণ্ণদো’’তিআদিকায (সং. নি. ১.৪২) ৱত্থদানস্স আনিসংসেন পটিসংযুত্তায. ৱিচ্ছাৱসেন ৱুত্তো ‘‘ইতৰীতৰেনা’’তি সব্বনামসদ্দো অনিযমত্থোতি আহ ‘‘অপ্পগ্ঘেনপি মহগ্ঘেনপি যেন কেনচী’’তি. পাৱাৰোতি উত্তৰাসঙ্গো. সো হি পাৰুপনত্থায ৱৰিযতি ইচ্ছিযতীতি পাৱাৰোতি ৱুচ্চতি. ‘‘কপ্পাসাদিভেদো’’তি ইমিনা তস্স সৰূপং দস্সেতি. পকতিকোজৱমেৱাতি পকতিযা ভিক্খূনং সাৰুপ্পং কোজৱমেৱ. সোড়সনাটকিত্থীনং ঠত্ৱা নচ্চযোগ্যত্তা মহতী পিট্ঠি এতস্সাতি মহাপিট্ঠিযং, তমেৱ কোজৱং মহাপিট্ঠিযকোজৱং. তস্স কিৰ লোমানি চতুৰঙ্গুলাধিকানি হোন্তি.