২০৯. সমত্তিংসৱিৰেচনকথা

৩৩৬. কিংপনাতি এত্থ কিংসদ্দো অনিযমত্থো. লূখো কিং, ন লূখো কিন্তি হি অত্থো. ‘‘সিনেহপানং পন তেমেতী’’তি চ ‘‘কৰোতী’’তি চ সম্বন্ধো. সব্বত্থাতি সকলকাযে. সিৰাতি কণ্ডৰা. অযন্তি জীৱকো. ওড়াৰিকদোসহৰণত্থন্তি ওড়াৰিকস্স দোসস্স অপনযনত্থং. পকতত্তেতি পকতিসঙ্খাতে সভাৱে সতীতি সম্বন্ধো. ভগৱা ভন্তেতি যোজনা. কুতোতি কস্স সন্তিকা. ৱট্টতি নু খোতি চিন্তেসীতি যোজনা. ততোতি চিন্তনতো. সোণোতি কোড়িৱীসসোণো, ভুঞ্জতীতি সম্বন্ধো. ততোতি সোণস্স সন্তিকা. তস্সাতি সোণস্স. সোতি সোণো. থেৰস্সাতি মোগ্গল্লানত্থেৰস্স. ইদং ‘‘পত্ত’’ন্তিপদে সামী, ‘‘অদাসী’’তি পদে সম্পদানং. অঞ্ঞং পিণ্ডপাতন্তি সম্বন্ধো.

ৰাজাপি খো ভুঞ্জিতুকামো অহোসীতি সম্বন্ধো. যঞ্চ সুজাতা অদাসি, যঞ্চ পৰিনিব্বানকালে চুন্দো কম্মাৰপুত্তো, ভাজনগতেসু দ্ৱীসুযেৱ তেসু পিণ্ডপাতেসু দেৱতা ওজং পক্খিপন্তীতি যোজনা. অঞ্ঞেসূতি দ্ৱীহি পিণ্ডপাতেহি অঞ্ঞেসু. ইচ্ছন্তি ৰুচিং. সোতি বিম্বিসাৰো ৰাজা. তৱেৱাতি তুয্হমেৱ. তন্তি ভগৱতো ৱচনং. ৰাজা অকাসীতি সম্বন্ধো. তেতি অসীতিকুলপুত্তসহস্সা. এতদত্থমেৱাতি সোণস্স অৰহত্তে পতিট্ঠাপনত্থমেৱ, ন ৰঞ্ঞো অনুগ্গহত্থন্তি অধিপ্পাযো.