২০২. জীৱকৱত্থুকথা

৩২৬. চীৱৰক্খন্ধকে পদক্খিণসদ্দস্স অপসব্যত্থং পটিক্খিপন্তো আহ ‘‘ছেকা কুসলা’’তি. অভিসটাতি এত্থ সৰধাতুযা গতিচিন্তাসু ইধ গত্যত্থেতি দস্সেন্তো আহ ‘‘অভিগতা’’তি. অভিগতাতি অভিমুখং গন্তব্বা. ননু পাড়িযং ‘‘অত্থিকানং অত্থিকানং মনুস্সান’’ন্তি ৱুত্তং, কস্মা পন ‘‘অত্থিকেহি অত্থিকেহি মনুস্সেহী’’তি ৱুত্তন্তি আহ ‘‘কৰণত্থে পনা’’তিআদি. ইমিনা ছট্ঠীকত্তা নাম ততিযাকত্তুনা সমানোযেৱাতি দস্সেতি. নিগমে ৱসতীতি নেগমোতি ৱুত্তে কুটুম্বিযগণো নেগমো নামাতি আহ ‘‘কুটুম্বিযগণো’’তি.

৩২৭. নগৰে নিৱসন্তীতি নাগৰা. দত্ৱা, ৱুট্ঠাপেসুন্তি সম্বন্ধো. আৰামুয্যানৱাহনাদীতি এত্থ আদিসদ্দেন অঞ্ঞানি উপভোগপৰিভোগানি সঙ্গণ্হাতি. গণিকট্ঠানেতি গণিকায ঠানে. গণিকাতি চ নগৰসোভিনী. সা হি অত্থিকেন জনগণেন অভিগন্তব্বাতি গণিকাতি ৱুচ্চতি. পটিসতেন চাতি এত্থ চসদ্দো অৱধাৰণত্থো. ৰত্তিং গমনস্স পটিনিধিসঙ্খাতেন সতেন এৱাতি হি অত্থো. গিলানন্তি এত্থ ভাৱপচ্চযেন ৱিনাপি ভাৱত্থো ঞাতব্বোতি আহ ‘‘গিলানভাৱ’’ন্তি. ‘‘জানাপেয্য’’ন্তি ইমিনা পটিৱেদেয্যন্তি এত্থ ৱিদধাতুযা ঞাণত্থং দস্সেতি. কত্তৰসুপ্পেতি এত্থ কত্তৰসদ্দো জিণ্ণপৰিযাযোতি আহ ‘‘জিণ্ণসুপ্পে’’তি. সুপন্তি সুনখাদযো এত্থাতি সুপ্পং, কত্তৰং সুপ্পং কত্তৰসুপ্পং.

৩২৮. তন্তি জীৱকং. অঞ্ঞে ৰাজদাৰকা ৱদন্তি কিৰাতি সম্বন্ধো. নত্থি মাতা এতস্সাতি নিম্মাতিকো. যথা চাতিআদীসু যথা পেসন্তি, তথাতি যোজনা. চসদ্দো সম্পিণ্ডনত্থো. ন কেৱলং ৱদন্তিযেৱ, অথ খো ন কোচি কিঞ্চি পেসেতীতি হি অত্থো. অঞ্ঞেসন্তি জীৱকতো অঞ্ঞেসং. তস্সাতি জীৱকস্স. ইতীতি এৱং. সোতি জীৱকো. তং সব্বন্তি ‘‘নিম্মাতিকো নিপ্পিতিকো’’তি ৱদনঞ্চ পণ্ণাকাৰস্স অপেসনঞ্চাতি তং সব্বং.

যংনূনাতি সাধু ৱত. অহং ৱজ্জসিপ্পং সিক্খেয্যং সাধু ৱতাতি যোজনা. তস্সাতি জীৱকস্স. এতদহোসীতি এতং অহোসি, পৰিৱিতক্কো অহূতি অত্থো. পৰূপঘাতপটিসংযুত্তানীতি পৰং উপগন্ত্ৱা, উপ ভুসেন ৱা হননেন পটিসংযুত্তানি. মেত্তাপুব্বভাগন্তি সিপ্পস্স পুব্বভাগে পৱত্তা মেত্তা এতস্সাতি মেত্তাপুব্বভাগং. ইতি অহোসীতি যোজনা. পুৰিমচিন্তায অনেকন্তভাৱতো একন্তভাৱং দস্সেন্তো আহ ‘‘অপি চা’’তিআদি. অপি চাতি একন্তেন. অযন্তি জীৱকো. ইতোতি ভদ্দকপ্পতো. অযন্তি উপাসকো. চতুপৰিসন্তৰেতি চতুপৰিসমজ্ঝে. পত্থতগুণন্তি পত্থৰিতগুণং. ঠানন্তৰন্তি ঠানভেদং, অহম্পীতি ন অযং উপাসকোযেৱ, অহম্পীতি অত্থো. ভগৱাতি আলপনপদমেতং. পত্থনন্তি ইচ্ছিতৱৰং. চোদিযমানোপীতি উয্যোজিযমানোপি. পিসদ্দেন পুৰিমচিন্তনমপেক্খতি. এসাতি এসো জীৱকো.

৩২৯. দিসাপামোক্খোতি পদস্স দিসাসু পামোক্খো দিসাপামোক্খোতি ৱচনত্থং দস্সেন্তো আহ ‘‘সব্বদিসাসূ’’তিআদি. তস্মিঞ্চ সমযেতি জীৱকস্স তস্মিং চিন্তনসমযে চ, আগমংসূতি সম্বন্ধো. তেতি ৱাণিজে, পুচ্ছীতি সম্বন্ধো. কুতোতি নগৰতো. তক্কসীলতোতি তক্কসীলনগৰতো. তত্থাতি তক্কসীলে. আমাতি সম্পটিচ্ছনত্থে নিপাতো, আম অত্থীতি হি অত্থো. তেতি ৱাণিজা. তথাতি যথা জীৱকো আহ, তথা অকংসূতি অত্থো. সোতি জীৱকো. পিতৰন্তি অভযৰাজকুমাৰং. তেহীতি ৱাণিজেহি.

তন্তি জীৱকং, পুচ্ছীতি সম্বন্ধো. সোতি জীৱকো. কস্মা তাত ত্ৱং ইধাগতো অসি পনাতি পুচ্ছীতি যোজনা. ততোতি পুচ্ছতো. সোতি জীৱকো. সিক্খিতুং আগতো অম্হীতি যোজনা. বহুঞ্চ গণ্হাতীতিআদীসু সো কিঞ্চি কম্মং অকত্ৱা সিপ্পস্সেৱ সিক্খিতত্তা বহুঞ্চ গণ্হাতীতি আহ ‘‘যথা’’তিআদি. তত্থ যথা সিক্খন্তিযেৱ, এৱং তথা সো ন সিক্খতীতি যোজনা. সো পনাতি জীৱকো পন, কৰোতি সিক্খতীতি সম্বন্ধো. একং কালন্তি একস্মিং কালে. এৱং সন্তে কস্মা সো বহুঞ্চ গণ্হাতীতি আহ ‘‘এৱং সন্তেপী’’তিআদি. মেধাৱিতাযাতি খিপ্পং গহণধাৰণপঞ্ঞতায, বহুঞ্চ সিপ্পন্তি সম্বন্ধো. অস্স জীৱকস্স গহিতঞ্চ সিপ্পং ন সম্মুস্সতীতি যোজনা.

যত্তকং সিপ্পং আচৰিযো জানাতি, তত্তকং অযং জীৱকো জানাতীতি যোজনা. যন্তি সিপ্পং. অযন্তি জীৱকো, ভৱিস্সতীতি সম্বন্ধো. নন্তি জীৱকং. যথাতি যেনাকাৰেন. কম্মৱিপাকন্তি কম্মৱিপাকজং ৰোগং. ‘‘ন’’ন্তি পদং ‘‘সিক্খাপেসী’’তি পদে কাৰিতকম্মং, ‘‘ভেসজ্জযোজন’’ন্তি পদং ধাতুকম্মং. ভেসজ্জযোজনন্তি ভেসজ্জেন ৰোগস্স যোজনং. সো পনাতি জীৱকো পন. ইমিনাতি জীৱকেন ন উগ্গহিতং, উগ্গহিতন্তি সম্বন্ধো. একেন দ্ৱাৰেনাতি চতূসু দ্ৱাৰেসু একেন দ্ৱাৰেন. আহিণ্ডন্তোতি ৱিচৰন্তো. পৰিত্তং পাথেয্যন্তি এত্থ পৰিত্তসদ্দস্স আৰক্খনত্থেপি পৱত্তনতো ইধ অপ্পত্থে পৱত্ততীতি দস্সেন্তো আহ ‘‘অপ্পমত্তক’’ন্তি. কস্মা অপ্পমত্তকং পাথেয্যং অদাসীতি যোজনা. তস্সাতি দিসাপামোক্খস্স. অযন্তি জীৱকো, লভিস্সতীতি সম্বন্ধো. ততোতি লভনতো. খীণে পাথেয্যেতি পাথেয্যে খীণে সতীতি যোজনা.