২০৩. সেট্ঠিভৰিযাদিৱত্থুকথা

৩৩০. যা নামাতি যা নাম ঘৰণী. কিম্পি মাযন্তি এত্থ একাৰলোপসন্ধীতি আহ ‘‘কিম্পি মে অয’’ন্তি. ইমিনা যকাৰাদেসসন্ধিং নিৱত্তেতি, ‘‘ম্যায’’ন্তিপি পাঠো, এৱং সতি আদেসসন্ধিযেৱ, ন লোপসন্ধি. অযং ঘৰণী মে কিঞ্চি দেয্যধম্মং কিম্পি দস্সতীতি যোজনা. তস্স চাতি সব্বিস্স চ, কতস্সাতিপি পাঠো. ৰোগূপসমস্স চাতি মম ৰোগস্স উপসমস্স চ, ইমেহি পদেহি সংযমস্সাতি পদস্স অত্থং দস্সেতি. ‘‘উপকাৰ’’ন্তি ইমিনা উপজানামীতি এত্থ উপসদ্দস্স অত্থং দস্সেতি. অধিপ্পাযোতি ঘৰণিযা আসযো.

৩৩১. ‘‘সব্বালঙ্কাৰং তুয্হং হোতূ’’তি ইদং ৱচনং ৰাজা সভাৱতো আহ, উদাহু কিঞ্চি চিন্তেত্ৱাতি আহ ‘‘ৰাজা’’তিআদি. তত্থ ইমন্তি অলঙ্কাৰং. পমাণযুত্তেতি কাৰণানুৰূপে. নন্তি জীৱকং. নাটকানম্পীতি পঞ্চসতিকানং নাটকানম্পি. সোপীতি জীৱকোপি. তেসন্তি অভযকুমাৰনাটকানং. মেতি ময্হং, ন পতিৰূপন্তি সম্বন্ধো. অয্যিকানন্তি মাতামহীনং. কতস্স মে উপকাৰন্তি যোজনা. ইমিনা অধিকাৰো চ উপকাৰো চ অত্থতো সদিসন্তি দস্সেতি. ৰাজা পসন্নো দত্ৱা আহাতি সম্বন্ধো.