১৭০. যাগুমধুগোড়কাদিকথা

২৮২. এককোতি এত্থ একতো অসহাযত্থে কপচ্চযোতি আহ ‘‘নত্থি মে দুতিযো’’তি. সোতি ব্ৰাহ্মণো. ৱযং কত্ৱাতি পৰিব্বযং কত্ৱা, পটিযাদাপেসি কিৰাতি যোজনা. অনুমোদনগাথাযাতি অনুমোদনপকাসকায গাথায. ‘‘পত্থযতং ইচ্ছত’’ন্তি পদানং অলমত্থপযোগে সম্পদানত্তা ৱুত্তং ‘‘অলমেৱ দাতুন্তি ইমিনা সম্বন্ধো’’তি. সোযেৱ গহেতব্বোতি ‘‘দাতু’’ন্তিভাৱস্স কত্তুভাৱেন সো এৱ পাঠো গহেতব্বোতি অত্থো.

২৮৩. যা যাগু পৱাৰণং জনেতি, সা যাগু ভোজ্জযাগু নামাতি যোজনা. যন্তি কালং. ‘‘আদিং কত্ৱা’’তি ইমিনা যদগ্গেনাতি এত্থ অগ্গসদ্দো আদ্যত্থো কিৰিযাৱিসেসনত্থে কৰণৱচনন্তি দস্সেতি. ‘‘সগ্গনিব্বত্তকপুঞ্ঞ’’ন্তি ইমিনা সগ্গাতি এত্থ ফলূপচাৰং দস্সেতি. সোতি গুড়ো.

২৮৪. তথাৰূপেনাতি তথাসভাৱেন. গুড়স্স অনুৰূপসভাৱেনাতি অত্থো.