৪. চতুত্থসিক্খাপদং

৮০৬. চতুত্থে ৰঞ্ঞো ওৰোধা ৰাজোৰোধা, পুৰাণে ৰাজোৰোধা পুৰাণৰাজোৰোধাতি ৱচনত্থং দস্সেন্তো আহ ‘‘পুৰাণে’’তিআদি. ‘‘গিহিভাৱে’’তি ইমিনা পুৰাণেতি এত্থ ণপচ্চযস্স সৰূপং দস্সেতি. চিৰাচিৰন্তি নিপাতপটিৰূপকং. তেন ৱুত্তং ‘‘চিৰেন চিৰেনা’’তি. ‘‘সক্কোথা’’তি ইমিনা কথং তুম্হে ৰাগচিত্তং পটিহনিত্ৱা অত্তানং ধাৰেথ ধাৰেতুং সক্কোথাতি অত্থং দস্সেতি. অনাৰোচিতেপীতি ভূততো অনাৰোচিতেপি.

৮০৭. জতুনাতি লাখায. পট্ঠদণ্ডকেতি পটুভাৱেন ঠাতি পৱত্ততীতি পট্ঠো, সোযেৱ দণ্ডো পট্ঠদণ্ডো, তস্স পৱেসনং পট্ঠদণ্ডকং, তস্মিং নিমিত্তভূতে. এতন্তি ‘‘জতুমট্ঠকে’’তি এতং ৱচনন্তি. চতুত্থং.