৩. ৱিকালগামপ্পৱেসনসিক্খাপদৱণ্ণনা

চাৰিত্তেতি চাৰিত্তসিক্খাপদে. উপচাৰন্তি দুতিযলেড্ডুপাতং. অঞ্ঞং গামং গচ্ছন্তানং পুন আপুচ্ছনকিচ্চং নত্থীতি উস্সাহং অপ্পটিপ্পস্সম্ভেত্ৱা অঞ্ঞং গামং গচ্ছন্তানং গামসতম্পি হোতু, পুন আপুচ্ছনকিচ্চং নত্থীতি অত্থো. তেনাহ ‘‘সচে পনা’’তিআদি. উস্সাহন্তি গামপ্পৱিসনুস্সাহং. অন্তৰাৰামাদীসু (পাচি. অট্ঠ. ৫১৫) ন কেৱলং অনাপুচ্ছা গচ্ছন্তস্সেৱ, কাযবন্ধনং অবন্ধিত্ৱা সঙ্ঘাটিং অপাৰুপিত্ৱা গচ্ছন্তস্সাপি অনাপত্তি. আপদাসূতি সীহো ৱা ব্যগ্ঘো ৱা আগচ্ছতি, মেঘো ৱা উট্ঠেতি, অঞ্ঞো ৱা কোচি উপদ্দৱো উপ্পজ্জতি, অনাপত্তি. এৱৰূপাসু আপদাসু বহিগামতো অন্তোগামং পৱিসিতুং ৱট্টতি.

ৱিকালগামপ্পৱেসনসিক্খাপদৱণ্ণনা নিট্ঠিতা.