৬. চাৰিত্তসিক্খাপদৱণ্ণনা

অন্তোউপচাৰসীমায দস্সনূপচাৰে ভিক্খুং দিস্ৱাতি যত্থ ঠিতস্স কুলানি পযিৰুপাসনচিত্তং উপ্পন্নং, ততো পট্ঠায গচ্ছন্তো অন্তোউপচাৰসীমায দস্সনূপচাৰে ভিক্খুং পস্সে ৱা অভিমুখে ৱা দিস্ৱা. পকতিৱচনেনাতি যং দ্ৱাদসহত্থব্ভন্তৰে ঠিতেন সোতুং সক্কা, তাদিসেন ৱচনেন, ইতো চিতো চ পৰিযেসিত্ৱা আৰোচনকিচ্চং পন নত্থি. যো হি এৱং পৰিযেসিতব্বো, সো অসন্তোযেৱ. তেনাহ ‘‘তাদিস’’ন্তিআদি. অনাপুচ্ছিত্ৱাতি অনাৰোচেত্ৱা.

অন্তৰাৰামভিক্খুনুপস্সযতিত্থিযসেয্যপটিক্কমনভত্তিযঘৰানীতি এত্থ অন্তৰাৰামন্তি অন্তোগামে ৱিহাৰো. পটিক্কমনন্তি আসনসালা. ভত্তিযঘৰন্তি নিমন্তিতঘৰং ৱা সলাকভত্তাদিদাযকানং ৱা ঘৰং. আপদাসূতি জীৱিতব্ৰহ্মচৰিযন্তৰাযেসু. কিৰিযাকিৰিযন্তি এত্থ কুলেসু চাৰিত্তাপজ্জনং কিৰিযং, অনাপুচ্ছনং অকিৰিযন্তি ৱেদিতব্বং.

চাৰিত্তসিক্খাপদৱণ্ণনা নিট্ঠিতা.