৯. পৰিপাচিতসিক্খাপদৱণ্ণনা

পৰিপাচিতন্তি পৰিপাকমাপাদিতং, যথা লভতি, তথা কত্ৱা ঠপিতন্তি ৱুত্তং হোতি. তেনাহ ‘‘নেৱ তস্সা’’তিআদি তস্সাতি যো পৰিভুঞ্জেয্য, তস্স ভিক্খুনো. ভিক্খুস্স গুণং পকাসেত্ৱাতি ‘‘অয্যো ভাণকো, অয্যো বহুস্সুতো’’তিআদিনা (পাচি. ১৯৫) গুণং পকাসেত্ৱা. পিণ্ডপাতন্তি পঞ্চন্নং ভোজনানং অঞ্ঞতৰং. কম্মসাধনোযং সমাৰম্ভসদ্দোতি আহ ‘‘সমাৰদ্ধ’’ন্তি. পটিযাদিতস্সাতি সম্পাদিতস্স. যস্মা ঞাতকপ্পৱাৰিতেহি ভিক্খুস্স অত্থায অসমাৰদ্ধোপি পিণ্ডপাতো অত্থতো সমাৰদ্ধোৱ হোতি যথাসুখং হৰাপেতব্বতো, তস্মা ‘‘ঞাতকপ্পৱাৰিতানং ৱা সন্তক’’ন্তি ৱুত্তং.

উভযত্থাতি পৰিপাচিতাপৰিপাচিতেসু. অৱসেসেতি ভিক্খুনিপৰিপাচিতেপি যাগুখজ্জকফলাফলাদিকে সব্বত্থ. নিমিত্তোভাসপৰিকথাৱিঞ্ঞত্তিৱসেন পন অৱসেসেপি দুক্কটতো ন মুচ্চতি.

পৰিপাচিতসিক্খাপদৱণ্ণনা নিট্ঠিতা.