৯. ৰূপিযসংৱোহাৰসিক্খাপদৱণ্ণনা

কতাদিৱসেনাতি কতঅকতকতাকতৱসেন. সুৱণ্ণাদিচতুব্বিধম্পি নিস্সগ্গিযৱত্থু ইধ ৰূপিযগ্গহণেন গহিতন্তি আহ ‘‘জাতৰূপৰজতপৰিৱত্তন’’ন্তি. ইদঞ্চ উক্কট্ঠপৰিচ্ছেদেন ৱুত্তন্তি দট্ঠব্বং. তেনাহ ‘‘পুৰিমসিক্খাপদেন হী’’তিআদি. পৰিৱত্তনন্তি সাদিতৰূপিযস্স পৰিৱত্তনং. পুৰিমনযানুসাৰেনাতি ‘‘অহং, ভন্তে, নানপ্পকাৰকং ৰূপিযসংৱোহাৰং সমাপজ্জিং, ইদং মে নিস্সগ্গিয’’ন্তিআদিনা (পাৰা. ৫৮৯).

ৰূপিযসংৱোহাৰৱত্থুস্মিন্তি পটিগ্গহণস্সেৱ পটিক্খিত্তত্তা পটিগ্গহিতপৰিৱত্তনে দোসং অদিস্ৱা ৰূপিযপৰিৱত্তনে. তস্স ৱাতি পৰিৱত্তিতস্স ৱা. ধনস্স ৱাতি অত্তনো মূলধনস্স ৱা. অত্তনো ৱা হি অৰূপিযেন পৰস্স ৰূপিযং চেতাপেয্য, অত্তনো ৱা ৰূপিযেন পৰস্স অৰূপিযং, উভযথাপি ৰূপিযসংৱোহাৰো কতোৱ হোতীতি.

ৰূপিযসংৱোহাৰসিক্খাপদৱণ্ণনা নিট্ঠিতা.