১০. কযৱিক্কযসিক্খাপদৱণ্ণনা

ৰূপিযসংৱোহাৰস্স পন হেট্ঠাসিক্খাপদেন গহিতত্তা কপ্পিযভণ্ডানমেৱেত্থ গহণন্তি আহ ‘‘চীৱৰাদীন’’ন্তিআদি. তত্থ চীৱৰাদীনং কপ্পিযভণ্ডানন্তি অন্তমসো দসিকসুত্তং উপাদায চীৱৰপিণ্ডপাতসেনাসনগিলানপচ্চযানং যেসং কেসঞ্চি কপ্পিযভণ্ডানং. কযং নাম পৰভণ্ডস্স গহণং. ৱিক্কযং নাম অত্তনো ভণ্ডস্স দানং. তেনাহ ‘‘ইমিনা ইমং দেহী’’তিআদি. পৰস্সাতি ঠপেত্ৱা পঞ্চ সহধম্মিকে অঞ্ঞস্স. এত্থ চ ‘‘অহং, ভন্তে, নানপ্পকাৰকং কযৱিক্কযং সমাপজ্জিং, ইদং মে নিস্সগ্গিযং, ইমাহং সঙ্ঘস্স নিস্সজ্জামী’’তিআদিনা (পাৰা. ৫৯৫) নযেন নিস্সজ্জিতব্বং. তেনাহ ‘‘ৱুত্তলক্খণৱসেনা’’তিআদি. ননু চেত্থ চীৱৰধোৱনে ৱা কেসচ্ছেদনে ৱা ভূমিসোধনাদিনৱকম্মে ৱা পৰভণ্ডং অত্তনো হত্থগতং নিস্সজ্জিতব্বং নাম নত্থি, তত্থ কিং কাতব্বন্তি আহ ‘‘অসন্তে পাচিত্তিযং দেসেতব্বমেৱা’’তি. যথা নিস্সগ্গিযৱত্থুম্হি পৰিভুত্তে ৱা নট্ঠে ৱা পাচিত্তিযং দেসেতি, এৱং ইধাপি দেসেতব্বমেৱাতি অধিপ্পাযো.

ইদং অম্হাকং অত্থীতি ইদং পটিগ্গহিতং তেলং ৱা সপ্পি ৱা অম্হাকং সংৱিজ্জতি. অম্হাকঞ্চ ইমিনা চ ইমিনা চ অত্থোতি অম্হাকঞ্চ তদঞ্ঞেন ইমিনা চ ইমিনা চ অপ্পটিগ্গহিতকেন অত্থো. ‘‘ৰূপিযসংৱোহাৰে ৱুত্তনযমেৱা’’তি ইমিনা ‘‘তিকপাচিত্তিযং অকযৱিক্কযে কযৱিক্কযসঞ্ঞিনো চ ৱেমতিকস্স চ দুক্কট’’ন্তি ইমং নযমতিদিসতি.

কযৱিক্কযসিক্খাপদৱণ্ণনা নিট্ঠিতা.

এড়কলোমৱগ্গো দুতিযো.