১. কোসিযসিক্খাপদৱণ্ণনা

কোসিযমিস্সকন্তি ‘‘কোসকাৰকা’’তি লদ্ধৱোহাৰানং পাণকানং কোসতো নিব্বত্তং অংসু কোসিযং, তেন মিস্সং কোসিযমিস্সকং. তেন পন কোসিযেন অপ্পকেনাপি মিস্সিতং কোসিযমিস্সকমেৱ, ন ইদং অব্বোহাৰিকন্তি ৱত্তুং লব্ভা. তেনাহ ‘‘একেনাপী’’তিআদি. কোসিযংসুনাতি কিমিকোসসম্ভৱেন অংসুনা. ‘‘অন্তমসো’’তিআদিকং পন ইমস্স সিক্খাপদস্স অচিত্তকত্তা ৱুত্তং. সন্থতং নাম সন্থৰিত্ৱা কতং অৱাযিমং. তেনাহ ‘‘সমে ভূমিভাগে’’তিআদি. ইমস্সেৱ ৱচনস্স অনুসাৰেনাতি ইমস্সেৱ পঠমসন্থতস্স নিস্সজ্জনৱিধানৱচনানুসাৰেন. সব্বসন্থতন্তি সব্বসন্থতনিস্সজ্জনৱিধানং.

অঞ্ঞস্সত্থায কাৰাপনে দুক্কটত্তা অত্তনো অত্থায কাৰাপনৱসেন ‘‘সাণত্তিক’’ন্তি ৱুত্তং. অত্তনা ৱিপ্পকতপৰিযোসাপননযেনাতি ‘‘অত্তনা ৱিপ্পকতং অত্তনা পৰিযোসাপেতি, নিস্সগ্গিযং পাচিত্তিযং. অত্তনা ৱিপ্পকতং পৰেহি পৰিযোসাপেতি, নিস্সগ্গিযং পাচিত্তিযং. পৰেহি ৱিপ্পকতং অত্তনা পৰিযোসাপেতি, নিস্সগ্গিযং পাচিত্তিযং. পৰেহি ৱিপ্পকতং পৰেহি পৰিযোসাপেতি, নিস্সগ্গিযং পাচিত্তিয’’ন্তি (পাৰা. ৫৪৫) ইমিনা নযেন. ৱিতানাদিকৰণেতি ৱিতানভূমত্থৰণসাণিপাকাৰভিসিবিব্বোহনকৰণে. যথা চ ৱিতানাদিকৰণে, এৱং তেনাকাৰেন পৰিভোগেপি অনাপত্তি. ‘‘অৱাযিম’’ন্তি (পাৰা. ৫৪৪) ৱুত্তত্তা ৱাযিত্ৱা কৰোন্তস্সাপি অনাপত্তি.

কোসিযসিক্খাপদৱণ্ণনা নিট্ঠিতা.