২. সুদ্ধকাড়কসিক্খাপদৱণ্ণনা

কাড়কানন্তি সভাৱেন ৱা ৰজনেন ৱা কাড়কানং. যথাহ ‘‘কাড়কং নাম দ্ৱে কাড়কানি জাতিযা কাড়কং ৱা ৰজনকাড়কং ৱা’’তি. অঞ্ঞেহি অমিস্সিতানন্তি অঞ্ঞেহি অমিস্সিতকাড়কানন্তি অত্থো. ‘‘যথা পঠমে ‘একেনাপি কোসিযংসুনা’তি (কঙ্খা. অট্ঠ. কোসিযসিক্খাপদৱণ্ণনা) ৱুত্তং, তথা ইধাপি ‘একেনাপি অঞ্ঞেন অমিস্সেত্ৱা’তি অৱুত্তত্তা অঞ্ঞেন পন মিস্সকভোগেপি অপঞ্ঞাযমানৰূপকং চে ‘সুদ্ধকাড়ক’মিচ্চেৱ ৱুচ্চতী’’তি (ৱজিৰ. টী. পাৰাজিক ৫৪৭) ৱদন্তি.

এত্থ চ ‘‘ইদং মে, ভন্তে, সুদ্ধকাড়কানং এড়কলোমানং সন্থত’’ন্তিআদিনা (পাৰা. ৫৪৯) নিস্সজ্জনৱিধানং ৱেদিতব্বং. সেসন্তি পুব্বপযোগদুক্কটচতুক্কপাচিত্তিযাদিকং. অঙ্গেসু পন ‘‘সুদ্ধকাড়কভাৱো’’তি অযং ৱিসেসো.

সুদ্ধকাড়কসিক্খাপদৱণ্ণনা নিট্ঠিতা.