৯. ছত্তুপাহনৱগ্গো

১-২. ছত্তুপাহনাদিসিক্খাপদৱণ্ণনা

ৱুত্তলক্খণং ছত্তন্তি ‘‘ছত্তং নাম তীণি ছত্তানি – সেতচ্ছত্তং, কিলঞ্জচ্ছত্তং, পণ্ণচ্ছত্তং মণ্ডলবদ্ধং, সলাকবদ্ধ’’ন্তি (পাচি. ১১৮১) এৱং পদভাজনে ৱুত্তলক্খণং ছত্তং. তাদিসং ঠানং পত্ৱাতি গচ্ছকদ্দমাদীসু তং তং ঠানং পত্ৱা.

ছত্তস্সেৱাতি কদ্দমাদীনি পত্ৱা উপাহনা ওমুঞ্চিত্ৱা ছত্তস্সেৱ ধাৰণং. উপাহনানংযেৱ ৱাতি গচ্ছাদীনি দিস্ৱা ছত্তং অপনামেত্ৱা উপাহনানংযেৱ ধাৰণং.

দুতিযং উত্তানত্থমেৱ.

ছত্তুপাহনাদিসিক্খাপদৱণ্ণনা নিট্ঠিতা.

৩-৫. সঙ্ঘাণিআদিসিক্খাপদৱণ্ণনা

সঙ্ঘাণিন্তি কটিযং অনুভৱিতব্বং আভৰণং. তেনাহ ‘‘যং কিঞ্চি কটূপগ’’ন্তি.

চতুত্থপঞ্চমানি উত্তানত্থানেৱ.

সঙ্ঘাণিআদিসিক্খাপদৱণ্ণনা নিট্ঠিতা.

৬. ৱাসিতকসিক্খাপদৱণ্ণনা

গন্ধৱাসিতকেনাতি গন্ধপৰিভাৱিতেন.

ৱাসিতকসিক্খাপদৱণ্ণনা নিট্ঠিতা.

৭-১০. ভিক্খুনিউম্মদ্দাপনাদিসিক্খাপদৱণ্ণনা

গিলানাযাতি (পাচি. অট্ঠ. ১২০৮) অন্তমসো মগ্গগমনপৰিস্সমেনাপি আবাধিকায. আপদাসূতি চোৰভযাদিনা সৰীৰকম্পনাদীসু.

অট্ঠমনৱমদসমেসু কিঞ্চি ৱত্তব্বং নত্থি.

ভিক্খুনিউম্মদ্দাপনাদিসিক্খাপদৱণ্ণনা নিট্ঠিতা.

১১. অনাপুচ্ছাসিক্খাপদৱণ্ণনা

উপচাৰং সন্ধাযাতি সমন্তা দ্ৱাদসহত্থূপচাৰং সন্ধায.

অনাপুচ্ছাসিক্খাপদৱণ্ণনা নিট্ঠিতা.

১২. পঞ্হাপুচ্ছনসিক্খাপদৱণ্ণনা

অনোদিস্সাতি ‘‘অমুকস্মিং নাম ঠানে পুচ্ছামী’’তি এৱং অনিযমেত্ৱা কেৱলং ‘‘পুচ্ছিতব্বং অত্থি, পুচ্ছামি, অয্যা’’তি এৱং ৱত্ৱা.

পঞ্হাপুচ্ছনসিক্খাপদৱণ্ণনা নিট্ঠিতা.

১৩. অসংকচ্চিকসিক্খাপদৱণ্ণনা

পৰিক্খিত্তস্স গামস্স পৰিক্খেপং, অপৰিক্খিত্তস্স উপচাৰং অতিক্কমন্তিযা ৱা ওক্কমন্তিযা ৱাতি এত্থ পৰিক্খিত্তস্স গামস্স পৰিক্খেপং অতিক্কমন্তিযা ৱা অপৰিক্খিত্তস্স গামস্স উপচাৰং ওক্কমন্তিযা ৱাতি যথাক্কমং সম্বন্ধো ৱেদিতব্বো. আপদাসূতি মহগ্ঘং সংকচ্চিকং পাৰুপিত্ৱা গচ্ছন্তিযা উপদ্দৱো উপ্পজ্জতি, এৱৰূপাসু আপদাসু.

অসংকচ্চিকসিক্খাপদৱণ্ণনা নিট্ঠিতা.

ছত্তুপাহনৱগ্গো নৱমো.

ইতি কঙ্খাৱিতৰণিযা পাতিমোক্খৱণ্ণনায

ৱিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খে পাচিত্তিযৱণ্ণনা নিট্ঠিতা.

অসাধাৰণসমুট্ঠানৱণ্ণনা

অচিত্তকানীতি (সাৰত্থ. টী. পাচিত্তিয ৩.১২১৪) ‘‘নচ্চ’’ন্তিআদিনা অজানিত্ৱা দস্সনাদিং কৰোন্তিযা আপত্তিসম্ভৱতো ৱত্থুঅজাননচিত্তেন অচিত্তকানি. লোকৱজ্জানীতি ‘‘নচ্চ’’ন্তিআদিনা জানিত্ৱা দস্সনাদিং কৰোন্তিযা অকুসলেনেৱ আপজ্জনতো লোকৱজ্জানি. তেনাহ ‘‘অযং পনেত্থ অধিপ্পাযো’’তিআদি সচিত্তকানীতি ‘‘চোৰী’’তিআদিনা ৱত্থুং জানিত্ৱা কৰণেযেৱ আপত্তিসম্ভৱতো সচিত্তকানি. উপসম্পদাদীনং একন্তাকুসলচিত্তেনেৱ অকত্তব্বত্তা পণ্ণত্তিৱজ্জানি. ‘‘ইধ সচিত্তকাচিত্তকতা পণ্ণত্তিজাননাজাননতায অগ্গহেট্ঠা ৱত্থুজাননাজাননতায গহেতব্ব’’ন্তি ৱদন্তি.

অসাধাৰণসমুট্ঠানৱণ্ণনা নিট্ঠিতা.