পাটিদেসনীযকণ্ডং

২. তেলৱিঞ্ঞাপনাদিসিক্খাপদৱণ্ণনা

পাড়িযং অনাগতেসু পন অট্ঠসুপীতি পাড়িমুত্তকেসু সপ্পিআদীসু অট্ঠসুপি.

তেলৱিঞ্ঞাপনাদিসিক্খাপদৱণ্ণনা নিট্ঠিতা.

ইতি কঙ্খাৱিতৰণিযা পাতিমোক্খৱণ্ণনায

ৱিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খে পাটিদেসনীযৱণ্ণনা নিট্ঠিতা.

১. পৰিমণ্ডলাদিসিক্খাপদৱণ্ণনা

সেখিযানি চেৱাতি পঞ্চসত্ততি সেখিযানি চেৱ. ‘‘ভিক্খুপাতিমোক্খৱণ্ণনাযং ৱুত্তনযেনেৱ ৱেদিতব্বা’’তি ইমিনা যস্মা তাদিসংযেৱেত্থ অত্থৱিনিচ্ছযং ৱিদূ ৱদন্তি, তস্মা ৱিসুং তেসং অত্থৱণ্ণনা ন ৱুত্তা. তত্থ যা ৱুত্তা, সা ইধাপি ৱুত্তাযেৱাতি দস্সেতি.

পৰিমণ্ডলাদিসিক্খাপদৱণ্ণনা নিট্ঠিতা.

ইতি কঙ্খাৱিতৰণিযা পাতিমোক্খৱণ্ণনায

ৱিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খৱণ্ণনা নিট্ঠিতা.

নিগমনকথাৱণ্ণনা

যং পাতিমোক্খস্স ৱণ্ণনং আৰভিন্তি সম্বন্ধো. ‘‘মহাৱিহাৰৱাসীন’’ন্তি ইদং পুৰিমপচ্ছিমপদেহি সদ্ধিং সম্বন্ধিতব্বং, মহাৱিহাৰৱাসীনং পোৰাণট্ঠকথাহি ৱাতি চ. পাড়িযত্থঞ্চ কেৱলন্তি সকলং পাড়িঅত্থঞ্চ, উভতোৱিভঙ্গঞ্চাতি ৱুত্তং হোতি. এত্থাতি এতিস্সং কঙ্খাৱিতৰণিযং. যস্মা ন হি অত্থীতি সম্বন্ধো. যন্তি যং পদং. সীহড়ট্ঠকথানযন্তি সীহড়মাতিকট্ঠকথানযং. অট্ঠকথাসাৰন্তি সীহড়মাতিকট্ঠকথাযং অত্থসাৰং, অথ ৱা ৱিনযট্ঠকথাসু অত্থসাৰং. তেনেতং দস্সেতি – সীহড়মাতিকট্ঠকথাযং অত্থসাৰং আদায ইমং কঙ্খাৱিতৰণিং কৰোন্তো ৱিনযট্ঠকথাসুপি ইধ ৱিনিচ্ছযে যোগক্খমং অত্থসাৰং আদাযেৱ অকাসিন্তি.

ইদানি সদেৱকস্স লোকস্স অচ্চন্তসুখাধিগমায অত্তনো পুঞ্ঞং পৰিণামেন্তো ‘‘যথা চ নিট্ঠং সম্পত্তা’’তিআদিগাথাদ্ৱযমাহ. কল্যাণনিস্সিতাতি কুসলনিস্সিতা. সব্বসত্তানন্তি কামাৱচৰাদিভেদানং সব্বেসং সত্তানং.

নিগমনকথাৱণ্ণনা নিট্ঠিতা.

নিগমনকথা

এত্তাৱতা চ –

১. লঙ্কিস্সৰো যো ৱিজিতাৰিৰাজো;

ৰাজা পৰক্কন্তভুজো যসস্সী;

তিধাগতং সীহড়মেকৰজ্জং;

অকা নিকাযঞ্চ তথা সমগ্গং.

২. পুৰে পুলত্থিম্হি ৱৰে পুৰানং;

মজ্ঝম্হি নানাৰতনাকৰানং;

অনন্তসম্পত্তিভৰাভিৰামে;

ৱৰাচলুত্তঙ্গঘৰাভিৰামে.

৩. অভেজ্জপাকাৰসুগোপুৰস্মিং;

নিৰাকুলানেককুলাকুলস্মিং;

মুনিন্দদাঠঙ্কুৰৱাসভূতে;

যো লোচনানন্দৱহে ৱসন্তো.

৪. সুফুল্লিতব্ভোৰুহসাদুসীত

পসন্ননীৰেহি জলাসযেহি;

সুপুপ্ফিতানেককদম্বজম্বু-

পুন্নাগনাগাদিহি ৱাভিৰম্মে.

৫. সুধাৱদাতেহি মনোহৰেহি;

পাকাৰপন্তীহি চ গোপুৰেহি;

ৱিকিণ্ণমুত্তাফলসন্নিভেহি;

ৱিলোকনীযেহি সুধাতলেহি.

৬. কত্ৱান পাসাদসহস্সৰম্মে;

তহিং তহিং পীতিকৰে ৱিহাৰে;

মহাদযো জেতৱনাদযোপি;

সুসংযমানং যতিনং অদাসি.

৭. যো সাদুভূতং চতুপচ্চযঞ্চ;

গুণপ্পসন্নো সমণেসু তেসু;

নিচ্চং মহোঘং ৱিয ৱত্তযন্তো;

যোজেতি তে গন্থৱিপস্সনাসু.

৮. কাৰিতেসু ৱিহাৰেসু, তেন তেসু যসস্সিনা;

ৰম্মো যো পচ্ছিমাৰামো, পুপ্ফাৰামাদিসোভিতো.

৯. পৰিৱেণম্হি নামেন, তহিং চোড়কুলন্তিকে;

পাসাদে দস্সনীযম্হি, ৱসন্তো কৰুণাপৰো.

১০. সিস্সো সসীকৰস্ৱচ্ছ-সীলাচাৰস্স ধীমতো;

সাৰিপুত্তমহাথেৰ-মহাসামিস্স তাদিনো.

১১. ধীৰানেকগুণোঘেন, থেৰেন সুচিৱুত্তিনা;

ৱিনযট্ঠিতিকামেন, সুমেধেনাভিযাচিতো.

১২. সো বুদ্ধনাগত্থেৰোহং, ভিক্খূনং পৰমং হিতং;

মহাৱিহাৰৱাসীনং, যতীনং সমযানুগং.

১৩. ৱিনযত্থাদিমঞ্জূসং, লীনত্থস্স পকাসনিং;

মাতিকট্ঠকথাযেমং, অকাসিং সাধু ৱণ্ণনং.

১৪. সাযং সুবোধা বুধৱণ্ণনীযা;

সংৱণ্ণনা সত্তসহস্সমত্তা;

নিৰাকৰোন্তী ৱিনযম্হি মোহং;

তমং চৰন্তী সসি খেৱ ভাতু.

১৫. আকঙ্খমানেন পৰত্থমিট্ঠং;

মহত্থসাৰং সুৱিনিচ্ছযঞ্চ;

সংৱণ্ণনং সাধু পকুব্বতা যং;

চিতং মযা পুঞ্ঞমনপ্পভূতং.

১৬. পুঞ্ঞেন তেনাচিতদানসীল-

মযাদিনানেকৱিধেন চেৱ;

সত্তা অনীঘা সুখিনো অৱেৰা;

পপ্পোন্তু সব্বে সুগতিং সিৱঞ্চ.

১৭. সদ্ধিং যথোপদ্দৱমন্তৰেন;

গতা হি লীনত্থপদীপনীযং;

তথা জনানং অপি ধম্মযুত্তা;

মনোৰথা সিদ্ধিমুপেন্তু নিচ্চং.

১৮. কালে পৱস্সন্তু সদা পযোদা;

ধম্মেন পালেন্তু মহিং মহিন্দা;

সত্তা পসন্না ৰতনত্তযস্মিং;

দানাদিপুঞ্ঞাভিৰতা ভৱন্তূতি.

ৱিনযত্থমঞ্জূসা লীনত্থপ্পকাসনীনামিকাকঙ্খাৱিতৰণীঅভিনৱটীকা নিট্ঠিতা.