নমো তস্স ভগৱতো অৰহতো সম্মাসম্বুদ্ধস্স

ৱিনযৱিনিচ্ছযো

গন্থাৰম্ভকথা

১. ৱন্দিত্ৱা সিৰসা সেট্ঠং, বুদ্ধমপ্পটিপুগ্গলং;

ভৱাভাৱকৰং ধম্মং, গণঞ্চেৱ নিৰঙ্গণং.

২. ভিক্খূনং ভিক্খুনীনঞ্চ, হিতত্থায সমাহিতো;

পৱক্খামি সমাসেন, ৱিনযস্সৱিনিচ্ছযং.

৩. অনাকুলমসংকিণ্ণং, মধুৰত্থপদক্কমং;

পটুভাৱকৰং এতং, পৰমং ৱিনযক্কমে.

৪. অপাৰং ওতৰন্তানং, সাৰং ৱিনযসাগৰং;

ভিক্খূনং ভিক্খুনীনঞ্চ, নাৱাভূতং মনোৰমং.

৫. তস্মা ৱিনযনূপাযং, ৱিনযস্সৱিনিচ্ছযং;

অৱিক্খিত্তেন চিত্তেন, ৱদতো মে নিবোধথ.

ভিক্খুৱিভঙ্গো

পাৰাজিককথা

পঠমপাৰাজিককথা

৬. তিৱিধে তিলমত্তম্পি, মগ্গে সেৱনচেতনো;

অঙ্গজাতং পৱেসেন্তো, অল্লোকাসে পৰাজিতো.

৭. পৱেসনং পৱিট্ঠং ৱা, ঠিতমুদ্ধৰণম্পি ৱা;

সসিক্খো সাদিযন্তো সো, ঠপেত্ৱা কিৰিযং চুতো.

৮. সন্থতেনঙ্গজাতেন, সন্থতং ৱা অসন্থতং;

মগ্গং পন পৱেসেন্তো, তথেৱাসন্থতেন চ.

৯. উপাদিন্নেনুপাদিন্নে, অনুপাদিন্নকেন ৱা;

ঘট্টিতে অনুপাদিন্নে, সচে সাদিযতেত্থ সো.

১০. হোতি পাৰাজিকক্খেত্তে, পৱিট্ঠে তু পৰাজিতো;

খেত্তে থুল্লচ্চযং তস্স, দুক্কটঞ্চ ৱিনিদ্দিসে.

১১. মতে অক্খাযিতে চাপি, যেভুয্যক্খাযিতেপি চ;

মেথুনং পটিসেৱন্তো, হোতি পাৰাজিকো নৰো.

১২. যেভুয্যক্খাযিতে চাপি, উপড্ঢক্খাযিতেপি চ;

হোতি থুল্লচ্চযাপত্তি, সেসে আপত্তি দুক্কটং.

১৩. নিমিত্তমত্তং সেসেত্ৱা, খাযিতেপি সৰীৰকে;

নিমিত্তে মেথুনং তস্মিং, সেৱতোপি পৰাজযো.

১৪. উদ্ধুমাতাদিসম্পত্তে, সব্বত্থাপি চ দুক্কটং;

খাযিতাক্খাযিতং নাম, সব্বং মতসৰীৰকে.

১৫. ছিন্দিত্ৱা পন তচ্ছেত্ৱা, নিমিত্তুপ্পাটিতে পন;

ৱণসঙ্খেপতো তস্মিং, সেৱং থুল্লচ্চযং ফুসে.

১৬. ততো মেথুনৰাগেন, পতিতায নিমিত্ততো;

তাযং উপক্কমন্তস্স, দুক্কটং মংসপেসিযং.

১৭. নখপিট্ঠিপ্পমাণেপি, মংসে ন্হাৰুম্হি ৱা সতি;

মেথুনং পটিসেৱন্তো, জীৱমানে পৰাজিতো.

১৮. কণ্ণচ্ছিদ্দক্খিনাসাসু, ৱত্থিকোসে ৱণেসু ৱা;

অঙ্গজাতং পৱেসেন্তো, ৰাগা থুল্লচ্চযং ফুসে.

১৯. অৱসেসসৰীৰস্মিং, উপকচ্ছূৰুকাদিসু;

ৱসা মেথুনৰাগস্স, সেৱমানস্স দুক্কটং.

২০. অস্সগোমহিসাদীনং, ওট্ঠগদ্ৰভদন্তিনং;

নাসাসু ৱত্থিকোসেসু, সেৱং থুল্লচ্চযং ফুসে.

২১. তথা সব্বতিৰচ্ছানং, অক্খিকণ্ণৱণেসুপি;

অৱসেসসৰীৰেসু, সেৱমানস্স দুক্কটং.

২২. তেসং অল্লসৰীৰেসু, মতানং সেৱতো পন;

তিৱিধাপি সিযাপত্তি, খেত্তস্মিং তিৱিধে সতি.

২৩. বহি মেথুনৰাগেন, নিমিত্তং ইত্থিযা পন;

নিমিত্তেন ছুপন্তস্স, তস্স থুল্লচ্চযং সিযা.

২৪. কাযসংসগ্গৰাগেন, নিমিত্তেন মুখেন ৱা;

নিমিত্তং ইত্থিযা তস্স, ছুপতো গৰুকং সিযা.

২৫. তথেৱোভযৰাগেন, নিমিত্তং পুৰিসস্সপি;

নিমিত্তেন ছুপন্তস্স, হোতি আপত্তি দুক্কটং.

২৬. নিমিত্তেন নিমিত্তং তু, তিৰচ্ছানগতিত্থিযা;

থুল্লচ্চযং ছুপন্তস্স, হোতি মেথুনৰাগতো.

২৭. কাযসংসগ্গৰাগেন, তিৰচ্ছানগতিত্থিযা;

নিমিত্তেন নিমিত্তস্স, ছুপনে দুক্কটং মতং.

২৮. অঙ্গজাতং পৱেসেত্ৱা, তমাৱট্টকতে মুখে;

তত্থাকাসগতং কত্ৱা, নীহৰন্তস্স দুক্কটং.

২৯. তথা চতূহি পস্সেহি, ইত্থিযা হেট্ঠিমত্তলং;

অছুপন্তং পৱেসেত্ৱা, নীহৰন্তস্স দুক্কটং.

৩০. উপ্পাটিতোট্ঠমংসেসু, বহি নিক্খন্তকেসু ৱা;

দন্তেসু ৱাযমন্তস্স, তস্স থুল্লচ্চযং সিযা.

৩১. অট্ঠিসঙ্ঘট্টনং কত্ৱা, মগ্গে দুৱিধৰাগতো;

সুক্কে মুত্তেপি ৱামুত্তে, ৱাযমন্তস্স দুক্কটং.

৩২. ইত্থিং মেথুনৰাগেন, আলিঙ্গন্তস্স দুক্কটং;

হত্থগ্গাহপৰামাস-চুম্বনাদীস্ৱযং নযো.

৩৩. অপদে অহযো মচ্ছা, কপোতা দ্ৱিপদেপি চ;

গোধা চতুপ্পদে হেট্ঠা, ৱত্থু পাৰাজিকস্সিমে.

৩৪. সেৱেতুকামতাচিত্তং, মগ্গে মগ্গপ্পৱেসনং;

ইদমঙ্গদ্ৱযং ৱুত্তং, পঠমন্তিমৱত্থুনো.

৩৫. দুক্কটং পঠমস্সেৱ, সামন্তমিতি ৱণ্ণিতং;

সেসানং পন তিণ্ণম্পি, থুল্লচ্চযমুদীৰিতং.

৩৬. ‘‘অনাপত্তী’’তি ঞাতব্বং, অজানন্তস্স ভিক্খুনো;

তথেৱাসাদিযন্তস্স, জানন্তস্সাদিকম্মিনো.

৩৭. ৱিনযে অনযূপৰমে পৰমে;

সুজনস্স সুখানযনে নযনে;

পটু হোতি পধানৰতো ন ৰতো;

ইধ যো পন সাৰমতে ৰমতে.

৩৮. ইমং হিতৱিভাৱনং ভাৱনং;

অৱেদি সুৰসম্ভৱং সম্ভৱং;

স মাৰবড়িসাসনে সাসনে;

সমো ভৱতুপালিনা পালিনা.

ইতি ৱিনযৱিনিচ্ছযে পঠমপাৰাজিককথা নিট্ঠিতা.

দুতিযপাৰাজিককথা

৩৯. আদিযন্তো হৰন্তোৱ-হৰন্তো ইৰিযাপথং;

ৱিকোপেন্তো তথা ঠানা, চাৱেন্তোপি পৰাজিতো.

৪০. তত্থ নানেকভণ্ডানং, পঞ্চকানং ৱসা পন;

অৱহাৰা দসেৱেতে, ৱিঞ্ঞাতব্বা ৱিভাৱিনা.

৪১. সাহত্থাণত্তিকো চেৱ, নিস্সগ্গো অত্থসাধকো;

ধুৰনিক্খেপনঞ্চাতি, ইদং সাহত্থপঞ্চকং.

৪২. পুব্বসহপযোগো চ, সংৱিদাহৰণম্পি চ;

সঙ্কেতকম্মং নেমিত্তং, পুব্বযোগাদিপঞ্চকং.

৪৩. থেয্যপসয্হপৰিকপ্প-পটিচ্ছন্নকুসাদিকা;

অৱহাৰা ইমে পঞ্চ, ৱেদিতব্বাৱ ৱিঞ্ঞুনা.

৪৪. ৱত্থুকালগ্ঘদেসে চ, পৰিভোগঞ্চ পঞ্চপি;

ঞত্ৱা এতানি কাতব্বো, পণ্ডিতেন ৱিনিচ্ছযো.

৪৫. দুতিযং ৱাপি কুদ্দালং, পিটকং পৰিযেসতো;

গচ্ছতো থেয্যচিত্তেন, দুক্কটং পুব্বযোগতো.

৪৬. তত্থজাতককট্ঠং ৱা, লতং ৱা ছিন্দতো পন;

দুক্কটং উভযত্থাপি, ৱুত্তং সহপযোগতো.

৪৭. পথৱিং খণতো ৱাপি, ব্যূহতো পংসুমেৱ ৱা;

আমসন্তস্স ৱা কুম্ভিং, হোতি আপত্তি দুক্কটং.

৪৮. মুখে পাসং পৱেসেত্ৱা, খাণুকে বদ্ধকুম্ভিযা;

বন্ধনানং ৱসা ঞেয্যো, ঠানভেদো ৱিজানতা.

৪৯. দ্ৱে ঠানানি পনেকস্মিং, খাণুকে বদ্ধকুম্ভিযা;

ৱলযং ৰুক্খমূলস্মিং, পৱেসেত্ৱা কতায ৱা.

৫০. উদ্ধৰন্তস্স খাণুং ৱা, ছিন্দতো সঙ্খলিম্পি ৱা;

থুল্লচ্চযং ততো কুম্ভিং, ঠানা চাৱেতি চে চুতো.

৫১. পঠমং পন কুম্ভিং ৱা, উদ্ধৰিত্ৱা তথা পুন;

ঠানা চাৱেতি খাণুং ৱা, সঙ্খলিং ৱাপি সো নযো.

৫২. ইতো চিতো চ ঘংসন্তো, মূলে সাৰেতি ৰক্খতি;

ৱলযং খেগতং তত্থ, কৰোন্তোৱ পৰাজিতো.

৫৩. জাতং ছিন্দতি চে ৰুক্খং, দুক্কটং কুম্ভিমত্থকে;

সমীপে ছিন্দতো তস্স, পাচিত্তিযমতত্থজং.

৫৪. অন্তোকুম্ভিগতং ভণ্ডং, ফন্দাপেতি সচে পন;

অপব্যূহেতি তত্থেৱ, তস্স থুল্লচ্চযং সিযা.

৫৫. হৰন্তো কুম্ভিযা ভণ্ডং, মুট্ঠিং ছিন্দতি অত্তনো;

ভাজনে ৱা গতং কত্ৱা, হোতি ভিক্খু পৰাজিতো.

৫৬. হাৰং ৱা পন পামঙ্গং, সুত্তাৰুড়্হং তু কুম্ভিযা;

ফন্দাপেতি যথাৱত্থুং, ঠানা চাৱেতি চে চুতো.

৫৭. সপ্পিআদীসু যং কিঞ্চি, পিৱতো পাদপূৰণং;

একেনেৱ পযোগেন, পীতমত্তে পৰাজযো.

৫৮. কত্ৱাৱ ধুৰনিক্খেপং, পিৱন্তস্স পুনপ্পুনং;

সকলম্পি চ তং কুম্ভিং, পিৱতো ন পৰাজযো.

৫৯. সচে খিপতি যং কিঞ্চি, ভণ্ডকং তেলকুম্ভিযং;

তং পাদগ্ঘনকং তেলং, ধুৱং পিৱতি তাৱদে.

৬০. হত্থতো মুত্তমত্তেৱ, থেয্যচিত্তো ৱিনস্সতি;

আৱিঞ্জেত্ৱাপি ৱা কুম্ভিং, তেলং গাড়েতি চে তথা.

৬১. তেলস্সাকিৰণং ঞত্ৱা, খিত্তং ৰিত্তায কুম্ভিযা;

পীতং তেলঞ্চ তং ভণ্ডং, উদ্ধৰন্তোৱ ধংসিতো.

৬২. তত্থেৱ ভিন্দতো তেলং, ছড্ডেন্তস্স তথেৱ চ;

ঝাপেন্তস্স অভোগং ৱা, কৰোন্তস্স চ দুক্কটং.

ভূমট্ঠকথা.

৬৩. ঠপিতং পত্থৰিত্ৱা চ, সাটকত্থৰণাদিকং;

ৱেঠেত্ৱা উদ্ধৰন্তস্স, মুত্তে ঠানা পৰাভৱো.

৬৪. ওৰিমন্তেন ৱা ফুট্ঠ-মোকাসং পাৰিমন্ততো;

পাৰাজিকমতিক্কন্তে, কড্ঢতো উজুকম্পি ৱা.

থলট্ঠকথা.

৬৫. পুৰতো মুখতুণ্ডঞ্চ, কলাপগ্গঞ্চ পচ্ছতো;

দ্ৱীসু পস্সেসু পক্খন্তো, হেট্ঠা পাদনখা তথা.

৬৬. উদ্ধঞ্চাপি সিখগ্গন্তি, গগনে গচ্ছতো পন;

মোৰস্স ছ পৰিচ্ছেদা, ৱেদিতব্বা ৱিভাৱিনা.

৬৭. ভিক্খু ‘‘সস্সামিকং মোৰং, গহেস্সামী’’তি খেগতং;

হত্থং ৱাপি পসাৰেতি, পুৰতো ৱাস্স তিট্ঠতি.

৬৮. মোৰোপি গগনে পক্খে, চাৰেতি ন চ গচ্ছতি;

দুক্কটং গমনচ্ছেদে, আমসন্তস্স চেৱ তং.