৮. কুমাৰিভূতৱগ্গো

১-৫. পঠমকুমাৰিভূতাদিসিক্খাপদৱণ্ণনা

সব্বপঠমা দ্ৱে মহাসিক্খমানাতি গব্ভিনিৱগ্গে ৱুত্তা দ্ৱে সিক্খমানা. ‘‘সিক্খমানা’’ইচ্চেৱ ৱত্তব্বাতি সম্মুতিকম্মাদীসু এৱং ৱত্তব্বা. ‘‘গিহিগতা’’তি ৱা ‘‘কুমাৰিভূতা’’তি ৱা ন ৱত্তব্বাতি সচে ৱদন্তি, কম্মং কুপ্পতীতি অধিপ্পাযো.

চতুত্থপঞ্চমানি উত্তানত্থানেৱ.

পঠমকুমাৰিভূতাদিসিক্খাপদৱণ্ণনা নিট্ঠিতা.

৬-৮. খীযনধম্মাদিসিক্খাপদৱণ্ণনা

ৱুট্ঠাপনসম্মুতিযা যাচিতাযাতি উপসম্পদাসম্মুতিযা যাচিতায.

সত্তমট্ঠমানি উত্তানত্থানেৱ.

খীযনধম্মাদিসিক্খাপদৱণ্ণনা নিট্ঠিতা.

৯. সোকাৱাসসিক্খাপদৱণ্ণনা

আগচ্ছমানাতি আগচ্ছন্তী.

সোকাৱাসসিক্খাপদৱণ্ণনা নিট্ঠিতা.

১০. অননুঞ্ঞাতসিক্খাপদৱণ্ণনা

তেসং অত্থিভাৱং অজানন্তিযাতি (পাচি. অট্ঠ. ১১৬৩) তেসং মাতাদীনং অত্থিভাৱং অজানন্তিযা. অননুঞ্ঞাতসমুট্ঠানন্তি যং ৱাচতো, কাযৱাচতো, ৱাচাচিত্ততো, কাযৱাচাচিত্ততো চ সমুট্ঠাতি, তং অননুঞ্ঞাতসমুট্ঠানং. কথং? অব্ভানকম্মাদীসু কেনচিদেৱ কৰণীযেন খণ্ডসীমাযং নিসিন্না ‘‘পক্কোসথ সিক্খমানং, ইধেৱ নং উপসম্পাদেস্সামা’’তি উপসম্পাদেতি, এৱং ৱাচতো সমুট্ঠাতি. ‘‘উপস্সযতো উট্ঠায উপসম্পাদেস্সামী’’তি ৱত্ৱা খণ্ডসীমং গচ্ছন্তিযা কাযৱাচতো সমুট্ঠাতি. দ্ৱীসু ঠানেসু পণ্ণত্তিং জানিত্ৱা ৱীতিক্কমং কৰোন্তিযা ৱাচাচিত্ততো, কাযৱাচাচিত্ততো চ সমুট্ঠাতি. অননুজানাপেত্ৱা উপসম্পাদনতো কিৰিযাকিৰিযং.

অননুঞ্ঞাতসিক্খাপদৱণ্ণনা নিট্ঠিতা.

১১. পাৰিৱাসিকসিক্খাপদৱণ্ণনা

দাৰুণন্তি পাপং. পতিমানেন্তন্তি ওলোকেন্তং.

পাৰিৱাসিকসিক্খাপদৱণ্ণনা নিট্ঠিতা.

১২. অনুৱস্সসিক্খাপদৱণ্ণনা

একন্তৰিকন্তি একেন ৱস্সেন অন্তৰিকং কত্ৱা.

অনুৱস্সসিক্খাপদৱণ্ণনা নিট্ঠিতা.

১৩. একৱস্সসিক্খাপদৱণ্ণনা

মাতিকাযং একং ৱস্সং দ্ৱেতি একন্তৰিকে একেকস্মিং সংৱচ্ছৰে দ্ৱে. একন্তৰিকং ৱুট্ঠাপেন্তিযাতি ইমস্মিং ৱস্সে একং, পুন একন্তৰিকং একন্তি দ্ৱে ৱুট্ঠাপেন্তিযা অনাপত্তি.

একৱস্সসিক্খাপদৱণ্ণনা নিট্ঠিতা.

কুমাৰিভূতৱগ্গো অট্ঠমো.