৬. আৰামৱগ্গো

১-২. আৰামপৱিসনাদিসিক্খাপদৱণ্ণনা

সীসানুলোকিকাযাতি সীসং অনুলোকেন্তিযা. যত্থ ৱা ভিক্খুনিযো সন্নিপতিতাতি যত্থ ভিক্খুনিযো পঠমতৰং সজ্ঝাযনচেতিযৱন্দনাদিঅত্থং সন্নিপতিতা. আপদাসূতি কেনচি উপদ্দুতা হোতি, এৱৰূপাসু আপদাসু পৱিসিতুং ৱট্টতি.

দুতিযং উত্তানত্থমেৱ.

আৰামপৱিসনাদিসিক্খাপদৱণ্ণনা নিট্ঠিতা.

৩-৪. গণপৰিভাসনাদিসিক্খাপদৱণ্ণনা

সেসন্তি ‘‘অত্থধম্মঅনুসাসনিপুৰেক্খাৰাযা’’তিআদিকং অৱসেসং. তত্থ অনুসাসনিপুৰেক্খাৰাযাতি ‘‘ইদানিপি ত্ৱং বালা অব্যত্তা’’তিআদিনা (পাচি. অট্ঠ. ১০৩৬) নযেন অনুসাসনিপক্খে ঠত্ৱা ৱদন্তিযা অনাপত্তি.

চতুত্থং উত্তানত্থমেৱ.

গণপৰিভাসনাদিসিক্খাপদৱণ্ণনা নিট্ঠিতা.

৫. কুলমচ্ছৰিনীসিক্খাপদৱণ্ণনা

কুলে মচ্ছৰো কুলমচ্ছৰোতি পুৰিমস্মিং পক্খে সকত্থে ইনীপচ্চযো, তং কুলং অস্সদ্ধং অপ্পসন্নন্তি কুলস্স অগুণং, অযসং ৱা ভাসন্তিযাতি অত্থো. ভিক্খুনীনং অৱণ্ণং ভাসন্তিযাতি ‘‘ভিক্খুনিযো দুস্সীলা পাপধম্মা’’তি (পাচি. অট্ঠ. ১০৪৩) ভিক্খুনীনং অগুণং, অযসং ৱা ভাসন্তিযা.

সন্তংযেৱ আদীনৱন্তি কুলস্স ৱা ভিক্খুনীনং ৱা সন্তংযেৱ অগুণং.

কুলমচ্ছৰিনীসিক্খাপদৱণ্ণনা নিট্ঠিতা.

৬-৮. অভিক্খুকাৱাসাদিসিক্খাপদৱণ্ণনা

সমন্তপাসাদিকাযং ৱুত্তোতি সমন্তপাসাদিকায ওৱাদৱগ্গস্স পঠমসিক্খাপদে (পাচি. অট্ঠ. ১৪৪) ৱুত্তো.

সত্তমট্ঠমানি উত্তানত্থানেৱ.

অভিক্খুকাৱাসাদিসিক্খাপদৱণ্ণনা নিট্ঠিতা.

৯-১০. ওৱাদূপসঙ্কমনাদিসিক্খাপদৱণ্ণনা

উপোসথস্স পুচ্ছনং উপোসথপুচ্ছা, সাৱকপচ্চযং, ৰস্সত্তঞ্চ কত্ৱা ‘‘উপোসথপুচ্ছক’’ন্তি ৱুত্তাতি আহ ‘‘উপোসথপুচ্ছন’’ন্তি. ওৱাদত্থাযাতি ওৱাদযাচনত্থায.

দসমং উত্তানত্থমেৱ.

ওৱাদূপসঙ্কমনাদিসিক্খাপদৱণ্ণনা নিট্ঠিতা.

আৰামৱগ্গো ছট্ঠো.