৩. নিৰোধসচ্চনিদ্দেসৱণ্ণনা

২০৪. তণ্হায ৱিৰজ্জনং হলিদ্দিৰাগস্স ৱিয পলুজ্জনন্তি কত্ৱা আহ ‘‘খযগমনৱসেনা’’তি. ৱিচ্ছিন্নং নিৰুজ্ঝনন্তি ৱুত্তং ‘‘অপ্পৱত্তিগমনৱসেনা’’তি. চজনং ছড্ডনং, হাপনং ৱাতি আহ ‘‘অনপেক্খতায চজনৱসেন, হানিৱসেন চা’’তি.

তদপ্পৱত্তি ৱিযাতি তস্সা তিত্তঅলাবুৱল্লিযা অপ্পৱত্তি ৱিয. অপ্পৱত্তিহেতুভূতম্পি নিব্বানং তণ্হায অপ্পৱত্তি ৱিয গয্হতীতি আহ ‘‘তদপ্পৱত্তি ৱিযা’’তি যথা ‘‘ৰাগক্খযো’’তি (সং. নি. ৪.৩১৫, ৩৩০). অপ্পৱত্তিভূতন্তি তণ্হায অপ্পৱত্তিযা পত্তং, পত্তব্বন্তি অত্থো. নিব্বানং আগম্ম নিৰুদ্ধাযপি তণ্হায পিযৰূপসাতৰূপেসু নিৰুদ্ধাতি ৱত্তব্বতাদস্সনত্থং ৱুত্তাতি যোজনা. এত্থ চ যস্মা মগ্গো, নিব্বানঞ্চ তণ্হায সমুচ্ছেদসাধনং, তস্মা ‘‘পুৰিমা ৱা উপমা’’তিআদিনা উপমাদ্ৱযং উভযত্থ যথাক্কমং যোজিতং, উভযট্ঠানিযং পন উভযত্থাপি লব্ভতেৱ.

নিৰোধসচ্চনিদ্দেসৱণ্ণনা নিট্ঠিতা.