২. সমুদযসচ্চনিদ্দেসৱণ্ণনা

২০৩. মনো ৱিযাতি মনো-সদ্দস্স ৱিয. ইক-সদ্দেনাতি ‘‘পোনোভৱিকা’’তি এত্থ ইক-সদ্দেন. গমিযত্থত্তাতি ঞাপিতত্থত্তা. কৰণসীলতা হি ইধ সীলত্থো, সো চ ইক-সদ্দেন ৱুচ্চতীতি কিৰিযাৱাচকস্স কৰণসদ্দস্স অদস্সনং অপ্পযোগো. ৱুত্তত্থানঞ্হি অপ্পযোগো. সতি পচ্চযন্তৰসমৱাযে পুনব্ভৱস্স দাযিকা, তদভাৱে অদাযিকাতি ৱুত্তাতি আহ ‘‘অদাযিকাপি পুনব্ভৱং দেতিচ্চেৱা’’তি তংসভাৱানতিৱত্তনতো. তেনেৱাহ ‘‘সমানসভাৱত্তা, তদানুভাৱত্তা চা’’তি. তত্থ সভাৱো তণ্হাযনং. আনুভাৱো পচ্চযসমৱাযে ফলনিপ্ফাদনসমত্থতা. ইতৰেসূতি অৱসিট্ঠকিলেসাদীসু. পৱত্তিৱিপাকদাযিনো কম্মস্স সহাযভূতা তণ্হা ‘‘উপধিৱেপক্কা’’তি অধিপ্পেতাতি আহ ‘‘উপধিম্হি যথানিব্বত্তে’’তিআদি. যথানিব্বত্তেতি অত্তনো পচ্চযেহি নিব্বত্তপ্পকাৰে. নন্দনং সংউপ্পিলাৱনং অভিতস্সনং. ৰঞ্জনং ৱত্থস্স ৱিয ৰঙ্গজাতেন চিত্তস্স ৱিপৰিণামনং, ৰমাপনং ৱা. ৰাগসম্বন্ধেনাতি ৰাগপদসম্বন্ধেন ‘‘উপ্পন্নস্সা’’তি পুল্লিঙ্গৱসেন ৱুত্তং. ৰূপাৰূপভৱৰাগো ৱিসুং ৱক্খতীতি এত্থ ৱক্খতি-কিৰিযাপদং কম্মত্থে ৱেদিতব্বং.

‘‘সৱত্থুকং চক্খু’’ন্তি ইমিনা সকলং চক্খুদসকমাহ, দুতিযেন সসম্ভাৰচক্খুং. ছিদ্দন্তি কণ্ণস্স ছিদ্দপদেসং. কণ্ণবদ্ধন্তি কণ্ণপাড়ি. ৱণ্ণসণ্ঠানতো ৰত্তকম্বলপটলং ৱিয, কিচ্চতো মুদুসিনিদ্ধমধুৰৰসদং মঞ্ঞন্তি. সামঞ্ঞেন গহিতাতি ৱিসযেন অৱিসেসেত্ৱা গহিতা. ৱিসযৱিসিট্ঠাতি চক্খাদিৱিসযৱিসিট্ঠা. এত্থ উপ্পজ্জতীতি সমুদাযাৱযৱেহি ৱিয সামঞ্ঞৱিসেসেহি ন নানত্তৱোহাৰো ন হোতি যথা ‘‘ৰুক্খো সিংসপা’’তি. ন হি সব্বো ৰুক্খো সিংসপা. তস্মা কিৰিযাভেদসব্ভাৱতো ‘‘সযানা ভুঞ্জন্তি সধনা’’তিআদীসু ৱিয ‘‘উপ্পজ্জমানা’’তি এত্থ কিৰিযায লক্খণতা, ইতৰত্থ লক্খিতব্বতা চ ৱুত্তা. যদি উপ্পজ্জমানা হোতীতি অনিচ্ছিতত্তা সাসঙ্কং উপ্পাদকিৰিযায অত্থিভাৱমাহ. তেন উপ্পাদে সতীতি অযমেতস্স অত্থোতি ‘‘উপ্পজ্জমানা’’তি এত্থ উপ্পাদো হেতুভাৱেন ৱুত্তো, ইতৰো চ তস্স ফলভাৱেনাতি আহ ‘‘সো হি তেন উপযোজিতো ৱিয হোতী’’তি. উপ্পজ্জমানাতি ৱা তণ্হায তত্থ উপ্পজ্জনসীলতা উপ্পজ্জনসভাৱো, উপ্পজ্জনসমত্থতা ৱা ৱুত্তা. তত্থেৱ চস্সা উপ্পজ্জনসীলতা সক্কাযতো অঞ্ঞস্মিং ৱিসযে পৱত্তিযা অভাৱতো, সমত্থতা পচ্চযসমৱাযেন, অঞ্ঞথা অসমত্থতা, যতো কদাচি ন উপ্পজ্জতি. নিৱিসমানা নিৱিসতীতি এত্থাপি ইমিনা নযেন অত্থো ৱেদিতব্বোতি.

সমুদযসচ্চনিদ্দেসৱণ্ণনা নিট্ঠিতা.