৩. তিকনিদ্দেসৱণ্ণনা

৭৬৮. পৰিপাচিতেসূতি সাধিতেসু. ‘‘ৱিহিতেসূ’’তি এত্থ দুদ্ধাদীসু ৱিয ভূতকালতা নাধিপ্পেতাতি আহ ‘‘ৱিসযৱিসেসনমত্তমেৱা’’তি. ‘‘কম্মং, সিপ্প’’ন্তি পঞ্ঞা কাৰণূপচাৰেন ৱুত্তাতি আহ ‘‘পঞ্ঞা এৱ ৱা…পে… ৱেদিতব্বা’’তি.

কুসলং কম্মং সকং একন্তং হিতসুখাৱহত্তা. তপ্পটিপক্খত্তা ইতৰং অকুসলং কম্মং নোসকং. সচ্চপটিৱেধানুলোমনং সচ্চানুলোমনং ৱুত্তন্তি আহ ‘‘তপ্পটিৱেধপচ্চযভাৱেনা’’তি. মগ্গসচ্চস্স অনুলোমনতো ৱা সচ্চানুলোমিকতা, তথা পৰমত্থসচ্চস্স অনুলোমনতো. তেনাহ অট্ঠকথাযং ‘‘মগ্গসচ্চস্সা’’তিআদি. পঞ্ঞা ৱুত্তা পঞ্ঞাৱিসযে পঞ্ঞাকিচ্চস্স দস্সিতত্তা. ‘‘যোগৱিহিতেসূ’’তিআদিনা ৱুত্তভূমিনিদ্দেসো, ‘‘কম্মস্সকতং সচ্চানুলোমিক’’ন্তি ৱুত্তসৰূপনিদ্দেসো, ‘‘ৰূপং অনিচ্চ’’ন্তিআদিনা ৱুত্তপ্পকাৰনিদ্দেসো চ যথাৱুত্তা…পে… নিদ্দেসা. ‘‘যোগৱিহিতেসু কম্মাযতনেসু খন্তিং, কম্মস্সকতং খন্তিং, ‘ৰূপং অনিচ্চ’ন্তি খন্তি’’ন্তিআদিনা খন্তিআদিপদেহি যোজেতব্বা. ওলোকনং পচ্চক্খকৰণং. ধম্মা ওলোকনং খমন্তীতি পঞ্ঞায তদোলোকনসমত্থতমাহ.

৭৬৯. মুঞ্চতীতি পজহতি. আৰব্ভ-কিৰিযায অধিট্ঠানং সমঙ্গিভাৱো, অধিকৰণং পট্ঠপনন্তি আহ ‘‘মুঞ্চ…পে… ৱত্তুং যুত্ত’’ন্তি.

৭৭০. পঞ্চসীলদসসীলানি কম্মৱট্টেকদেসভূতানি সন্ধায তেসং ধম্মট্ঠিতিযং সমৱৰোধো ৱুত্তো. সতিপি সৱনেতি ‘‘ইধ, ভিক্খৱে, অৰিযসাৱকো পাণাতিপাতা পটিৱিৰতো’’তিআদিনা (অ. নি. ৮.৩৯; কতা. ৪৮০) তথাগততো সৱনে সতিপি. ভিক্খুআদীনম্পি তং ৱুত্তং অধিসীলপঞ্ঞাপনং ৱিয ন বুদ্ধাৱেণিকন্তি.

অধিপঞ্ঞানিব্বত্তেসূতি ঠপেত্ৱা অধিপঞ্ঞং তদঞ্ঞেসু মগ্গফলধম্মেসু. তদধিট্ঠানেসূতি তস্সা অধিপঞ্ঞায অধিট্ঠানেসু ৱিপস্সনাধম্মেসু.

৭৭১. অপাযুপ্পাদনং অৱড্ঢিনিব্বত্তনং. তস্মিংযেৱ ঠানেতি তস্মিংযেৱ খণে.

তিকনিদ্দেসৱণ্ণনা নিট্ঠিতা.