কিৰিযাব্যাকতং

মনোধাতুচিত্তৱণ্ণনা

৫৬৬. ৱাতপুপ্ফন্তি মোঘপুপ্ফং. তং অচ্ছিন্নেপি ৰুক্খে ন ফলতি, ছিন্নৰুক্খপুপ্ফং পন অচ্ছিন্নে ফলেয্য. এৱং অচ্ছিন্নভৱমূলস্সপি পৱত্তমানং যং ন ফলতি, তং ৱাতপুপ্ফসদিসং. ইতৰস্সেৱ পন পৱত্তমানং ছিন্নৰুক্খপুপ্ফসদিসং. তঞ্হি অচ্ছিন্নে ভৱমূলে ফলেয্যাতি.

কিৰিযমনোৱিঞ্ঞাণধাতুচিত্তৱণ্ণনা

৫৬৮. লোলুপ্পতণ্হা পহীনাতি ইমস্স চিত্তস্স পচ্চযভূতা পুৰিমা পৱত্তি দস্সিতা. ইদং পন চিত্তং ৱিচাৰণপঞ্ঞাৰহিতন্তি কেৱলং সোমনস্সমত্তং উপ্পাদেন্তস্স হোতীতি. এৱং চেতিযপূজাদীসুপি দট্ঠব্বং. ৱত্তং কৰোন্তোতি ইদং ৱত্তং কৰোন্তস্স ফোট্ঠব্বাৰম্মণে কাযদ্ৱাৰচিত্তপ্পৱত্তিং সন্ধায ৱুত্তং. পঞ্চদ্ৱাৰানুগতং হুত্ৱা লব্ভমানং সন্ধায পঞ্চদ্ৱাৰে এৱ ৱা লোলুপ্পতণ্হাপহানাদিপচ্চৱেক্খণহেতুভূতং ইদমেৱ পৱত্তিং সন্ধায তত্থ তত্থ ‘‘ইমিনা চিত্তেন সোমনস্সিতো হোতী’’তি ৱুত্তন্তি ‘‘এৱং তাৱ পঞ্চদ্ৱাৰে লব্ভতী’’তি আহ. অতীতংসাদীসু অপ্পটিহতং ঞাণং ৱত্ৱা ‘‘ইমেহি তীহি ধম্মেহি সমন্নাগতস্স বুদ্ধস্স ভগৱতো সব্বং কাযকম্মং ঞাণানুপৰিৱত্তী’’তিআদিৱচনতো (মহানি. ১৫৬ অত্থতো সমানং) ‘‘ভগৱতো ইদং উপ্পজ্জতী’’তি ৱুত্তৱচনং ৱিচাৰেতব্বং. অহেতুকস্স মূলাভাৱেন সুপ্পতিট্ঠিততা নত্থীতি বলভাৱো অপৰিপুণ্ণো, তস্মা উদ্দেসৱাৰে ‘‘সমাধিবলং হোতি, ৱীৰিযবলং হোতী’’তি ন ৱুত্তং. ততো এৱ হি অহেতুকানং সঙ্গহৱাৰে ঝানঙ্গানি চ ন উদ্ধটানি. তেনেৱ ইমস্মিম্পি অহেতুকদ্ৱযে বলানি অনুদ্দেসাসঙ্গহিতানি. যস্মা পন ৱীৰিযস্স ৱিজ্জমানত্তা সেসাহেতুকেহি বলৱং, যস্মা চ এত্থ ৱিতক্কাদীনং ঝানপচ্চযমত্ততা ৱিয সমাধিৱীৰিযানং বলমত্ততা অত্থি, তস্মা নিদ্দেসৱাৰে ‘‘সমাধিবলং ৱীৰিযবল’’ন্তি ৱত্ৱা ঠপিতং. যস্মা পন নেৱ কুসলং নাকুসলং, তস্মা সম্মাসমাধি মিচ্ছাসমাধীতি, সম্মাৱাযামো মিচ্ছাৱাযামোতি চ ন ৱুত্তন্তি অধিপ্পাযো. এৱং সতি মহাকিৰিযচিত্তেসু চ এতং ন ৱত্তব্বং সিযা, ৱুত্তঞ্চ, তস্মা সম্মা, মিচ্ছা ৱা নিয্যানিকসভাৱাভাৱতো মগ্গপচ্চযভাৱং অপ্পত্তা সমাধিৱাযামা ইধ তথা ন ৱুত্তাতি দট্ঠব্বা.

৫৭৪. ইন্দ্ৰিযপৰোপৰিযত্তআসযানুসযসব্বঞ্ঞুতানাৱৰণঞাণানি ইমস্সানন্তৰং উপ্পজ্জমানানি যমকপাটিহাৰিযমহাকৰুণাসমাপত্তিঞাণানি চ ইমস্স অনন্তৰং উপ্পন্নপৰিকম্মানন্তৰানি ইমিনা আৱজ্জিতাৰম্মণেযেৱ পৱত্তন্তীতি আহ ‘‘ছ…পে… গণ্হন্তী’’তি. মহাৱিসযত্তা মহাগজো ৱিয মহন্তন্তি মহাগজং.

ৰূপাৱচৰাৰূপাৱচৰকিৰিযচিত্তৱণ্ণনা

৫৭৭. ইদানি যানি কিৰিযানি জাতানি, তানি ৱেদিতব্বানীতি এৱং যোজনা কাতব্বা. অত্তভাৱোতি পঞ্চক্খন্ধা ৱুচ্চন্তি.

চিত্তুপ্পাদকণ্ডৱণ্ণনা নিট্ঠিতা.